টাইম আলোচনীৰ ২০২৬ বৰ্ষৰ তালিকা: বিশ্বৰ ১০০ প্ৰভাৱশালী খেলুৱৈৰ ভিতৰত একমাত্ৰ ভাৰতীয় হিচাপে উজ্বলিল স্মৃতি মান্ধানা

ভাৰতীয় মহিলা ক্ৰিকেট দলৰ তাৰকা অপেনাৰ তথা উপ-অধিনায়ক স্মৃতি মান্ধানাই পুনৰবাৰ সমগ্ৰ বিশ্বতে ভাৰতৰ নাম উজ্বলাই তুলিছে। বিখ্যাত টাইম আলোচনীয়ে ২০২৬ বৰ্ষৰ বাবে বিশ্বৰ এশগৰাকী প্ৰভাৱশালী খেলুৱৈৰ তালিকা প্ৰকাশ কৰিছে আৰু এই সন্মানীয় তালিকাত স্থান লাভ কৰা স্মৃতি মান্ধানা হৈছে একমাত্ৰ ভাৰতীয় খেলুৱৈ।

টাইম আলোচনীৰ এই তালিকাত ক্ৰীড়া জগতখন সলনি কৰা খেলুৱৈ, প্ৰশিক্ষক আৰু বিনিয়োগকাৰীসকলক অন্তৰ্ভুক্ত কৰা হৈছে। এই তালিকাত আমেৰিকাৰ বাস্কেটবলৰ কিংবদন্তি লেব্ৰন জেমছ, ফুটবলৰ মহানায়ক লিঅ’নেল মেছি আৰু খ্ৰিষ্টিয়ানো ৰোনাল্ডো, টেনিছ তাৰকা কাৰ্লোছ আলকাৰাজ আৰু ফিফাৰ সভাপতি জিয়ানি ইনফান্তিনোৰ দৰে ডাঙৰ নাম অন্তৰ্ভুক্ত আছে। ক্ৰিকেট জগতৰ পৰা স্মৃতিৰ উপৰিও দক্ষিণ আফ্ৰিকাৰ অধিনায়ক টেম্বা বাভুমাইও ইয়াত স্থান লাভ কৰিবলৈ সক্ষম হৈছে।

https://x.com/PTI_News/status/2066749656630202765?s=20

২৯ বছৰীয়া স্মৃতি মান্ধানাৰ বিষয়ে লিখি টাইম আলোচনীয়ে কয় যে মুম্বাইত জন্মগ্ৰহণ কৰা এইগৰাকী বাঁওহতীয়া বেটছমেনে ক্ৰমাগতভাৱে নতুন অভিলেখ গঢ়ি আছে। তেওঁ ঘৰুৱা এদিনীয়া ক্ৰিকেটত দ্বিশতক অৰ্জন কৰা প্ৰথমগৰাকী ভাৰতীয় মহিলা। ইয়াৰ লগতে ক্ৰিকেটৰ তিনিওটা ফৰ্মেটত অৰ্থাৎ টেষ্ট, এদিনীয়া আৰু টি-টুৱেণ্টিত শতক অৰ্জন কৰা তেৱেঁই প্ৰথমগৰাকী ভাৰতীয় মহিলা খেলুৱৈ। তেওঁৰ নামত আন্তঃৰাষ্ট্ৰীয় ক্ৰিকেটত যুটীয়াভাৱে সৰ্বাধিক ১৭ টা শতক সন্নিৱিষ্ট আছে।

স্মৃতি হৈছে এটা কেলেণ্ডাৰ বৰ্ষত এদিনীয়া ক্ৰিকেটত ১০০০ তকৈ অধিক ৰান সংগ্ৰহ কৰা প্ৰথমগৰাকী মহিলা ক্ৰিকেটাৰ। অৱশ্যে স্মৃতিয়ে নিজে ব্যক্তিগত অভিলেখতকৈ দলৰ জয়ক বেছি গুৰুত্ব দিয়ে। তেওঁৰ অধিনায়কত্বত ৰয়েল চেলেঞ্জাৰ্ছ বেংগালুৰুৱে ২০২৪ আৰু ২০২৬ চনত মহিলা প্ৰিমিয়াৰ লীগৰ খিতাপ দখল কৰিছিল। ইয়াৰ উপৰিও যোৱা বছৰ আই চি চি মহিলা বিশ্বকাপত ভাৰতীয় দলৰ খিতাপ জয়তো তেওঁ উপ-অধিনায়ক হিচাপে এক ডাঙৰ ভূমিকা পালন কৰিছিল আৰু প্ৰতিযোগিতাখনত দ্বিতীয় সৰ্বাধিক ৰান সংগ্ৰহকাৰী আছিল। ২০২৪ চনত তেওঁ এবছৰত সৰ্বাধিক ৰান সংগ্ৰহৰ অভিলেখ গঢ়িছিল আৰু পৰৱৰ্তী বছৰত নিজৰেই অভিলেখ ভংগ কৰিছিল। এই সুন্দৰ প্ৰদৰ্শনৰ বাবেই তেওঁক ২০২৫ চনৰ বি বি চি ইণ্ডিয়ান স্প‘ৰ্টছৱমেন অৱ দ্য ইয়েৰ হিচাপেও নিৰ্বাচিত কৰা হৈছিল।