১৭ ডিচেম্বৰত অনুষ্ঠিত হ’বলগীয়া তিৱা জনগোষ্ঠীৰ স্বাভিমানৰ প্ৰতীক স্বৰূপ পৰিষদৰ নিৰ্বানৰ বাবে শাসক বিৰোধীৰ মনোনীত প্ৰাৰ্থীসকলে জোৰদাৰ নিৰ্বাচনী প্ৰচাৰ অভিযানে উত্তাল কৰি তুলিছে পৰিবেশ পৰিস্থিতি।
পৰিষদত এইবাৰ মৰিগাঁও জিলাত ১৯ টা সমষ্টিত প্ৰাৰ্থী প্ৰক্ষেপ কৰিছে ভাৰতীয় জাতীয় কংগ্ৰেছ দলে।
সেই অনুসৰি ৯ নং দমাল সমষ্টিৰ পৰা প্ৰতিদ্বন্দ্বিতা আগবঢ়াইছে ৰাজু পাটৰে।
৪১১৯ গৰাকী ভোটাৰ থকা সমষ্টিত বিজেপি বিৰোধী স্থিতিৰে কংগ্ৰেছ দলৰ প্ৰাৰ্থীগৰাকীয়ে নিজৰ নিৰ্বাচনী প্ৰচাৰ উত্তপ্ত কৰি তুলিছে।
কংগ্ৰেছ শাসনলৈ আহিলেই বিগত সময়ত পৰিষদত সংঘটিত ব্যাপক দুৰ্নীতি, অনীতিয়ে পৰিষদখনক ধ্বংসৰ দিশলৈ লৈ যোৱা শাসকীয় দলটোৰ দুৰ্নীতিকাৰীসকলৰ বিৰুদ্ধে আইনী ব্যৱস্থা গ্ৰহণ কৰিব বুলিও কংগ্ৰেছৰ প্ৰক্ষেপিত প্ৰাৰ্থীগৰাকীয়ে সংবাদ মাধ্যমক জানিবলৈ দিয়ে।
ইফালে, নিৰ্বাচনৰ সংক্ৰান্তত নিজৰ অভিমত প্ৰকাশ কৰি জিলা কংগ্ৰেছৰ সাধাৰণ সম্পাদক শশী মোহন বিস্বাসে কয় যে দুৰ্নীতি ভ্ৰষ্টাচাৰী গেৰুৱা বাহিনীৰ সকলো কু-কৰ্মই ইতিমধ্যে ৰাইজক অতিষ্ট কৰি তুলিছে আৰু সেয়ে এখন নিকা স্বচ্ছ পৰিষদ গঠনৰ বাবে সমষ্টিৰ ৰাইজে কংগ্ৰেছ দলকেই বিপুল ভোটৰ ব্যৱধানত জয়ী কৰিব।
লগতে কংগ্ৰেছ দলে পৰিষদ গঠন কৰিলে পূৰ্বৰ পৰিষদৰ সকলো দুৰ্নীতি-কেলেংকাৰিৰ তদন্ত কৰি আইনী ব্যৱস্থা গ্ৰহণ কৰিবলৈ বদ্ধ পৰিকৰ বুলি কংগ্ৰেছৰ সাধাৰণ সম্পাদক গৰাকীয়ে স্পষ্টভাৱে সংবাদ মাধ্যমৰ আগত সদৰী কৰে।
