পশ্চিমবংগ বিধানসভা নিৰ্বাচনৰ পূৰ্বে শাসকীয় তৃণমূল কংগ্ৰেছতো প্ৰাৰ্থিত্বক লৈ আৰম্ভ হৈছে তীব্ৰ অসন্তুষ্টি। দলৰ পৰা টিকট লাভ নকৰাৰ ক্ষোভত শনিবাৰে কোচবিহাৰৰ প্ৰবীণ তৃণমূল নেতা তথা ৰাজ্যৰ প্ৰাক্তন মন্ত্ৰী ৰবীন্দ্ৰনাথ ঘোষৰ ঘনিষ্ঠ খোকন মিয়াঁই আনুষ্ঠানিকভাৱে কংগ্ৰেছত যোগদান কৰে। কোচবিহাৰ জিলা কংগ্ৰেছৰ কাৰ্যালয়ত ধীৰাজ কুমাৰ সাহু আৰু প্ৰদীপ কুমাৰ বালমুচুৰ উপস্থিতিত তেওঁ কংগ্ৰেছৰ পতাকা গ্ৰহণ কৰে। কংগ্ৰেছৰ সূত্ৰৰ মতে, আগন্তুক নিৰ্বাচনত তেওঁক কোচবিহাৰ দক্ষিণ বিধানসভা সমষ্টিৰ পৰা প্ৰাৰ্থিত্ব প্ৰদান কৰাৰ সম্ভাৱনা আছে।
দল ত্যাগ কৰাৰ সময়ত আৱেগিক হৈ পৰা প্ৰবীণ নেতাজনে সংবাদ মাধ্যমৰ আগত কান্দোনত ভাগি পৰে। ১৯৯৮ চনত তৃণমূল কংগ্ৰেছৰ জন্মলগ্নৰে পৰা দলটোৰ সৈতে জড়িত থকা খোকন মিয়াঁই সুদীৰ্ঘকাল ধৰি বিভিন্ন গুৰুত্বপূৰ্ণ দায়িত্ব পালন কৰি আহিছিল। ১৯৯৮ চনৰ পৰা ২০০৭ চনলৈ তেওঁ তৃণমূল যুৱ কংগ্ৰেছৰ সভাপতি আৰু ২০০৮ চনৰ পৰা ২০১৯ চনলৈ কোচবিহাৰ-১ ব্লকৰ সভাপতি আছিল। ইয়াৰ উপৰিও তেওঁ পঞ্চায়ত সমিতিৰ সদস্য তথা জিলা পৰিষদৰ পূৰ্ত আৰু পৰিবহণ কৰ্মাধ্যক্ষ হিচাপেও কাৰ্যনিৰ্বাহ কৰিছিল। এনে এজন নিষ্ঠাৱান পুৰণি কৰ্মীয়ে নিৰ্বাচনৰ সময়ত প্ৰাৰ্থিত্বৰ পৰা বঞ্চিত হোৱাটোৱে দলৰ পুৰণি নেতা-কৰ্মীসকলৰ মাজত তীব্ৰ প্ৰতিক্ৰিয়াৰ সৃষ্টি কৰিছে।
তৃণমূলৰ নেতৃত্বৰ বিৰুদ্ধে তীব্ৰ ক্ষোভ উজাৰি খোকন মিয়াঁই কয় যে বৰ্তমান তৃণমূল কংগ্ৰেছ কোনো ৰাজনৈতিক দল হৈ থকা নাই, ই এক কৰ্প’ৰেট সংস্থালৈ পৰ্যবসিত হৈছে আৰু তাত পুৰণি কৰ্মীসকলৰ কোনো সন্মান নাই। তেওঁ অভিযোগ কৰে যে প্ৰাৰ্থী তালিকা ঘোষণা কৰাৰ মাত্ৰ এঘণ্টা পূৰ্বে খেলপথাৰৰ পৰা এগৰাকী খেলুৱৈক আনি আগন্তুক নিৰ্বাচনত প্ৰাৰ্থিত্ব প্ৰদান কৰা হৈছে। যিসকল নেতাই দলৰ বাবে ত্যাগ স্বীকাৰ কৰিছে আৰু কষ্ট কৰিছে, তেওঁলোকে একোৱেই নাপালে বুলি তেওঁ আক্ষেপ প্ৰকাশ কৰে। ৰবীন্দ্ৰনাথ ঘোষ, জিতেন বৰ্মণ আৰু বিনয়কৃষ্ণ বৰ্মণৰ দৰে পুৰণি নেতাসকলৰ কপালতো টিকট নজুটাত তেওঁ তীব্ৰ নিৰাশা ব্যক্ত কৰে।
খোকন মিয়াঁৰ এই দলত্যাগ সন্দৰ্ভত তৃণমূল কংগ্ৰেছৰ নেতৃত্বই প্ৰতিক্ৰিয়া প্ৰকাশ কৰিছে। কোচবিহাৰ জিলা তৃণমূলৰ সহ-সভাপতি আব্দুল জলিল আহমেদে কয় যে দলত ক্ষোভ বা অসন্তুষ্টি থকাটো স্বাভাৱিক কথা, কিন্তু সেয়া দলৰ ভিতৰতে আলোচনাৰ মাধ্যমেৰে মীমাংসা কৰা উচিত। আন দলত গৈ বিক্ষোভ প্ৰদৰ্শন কৰাটো গ্ৰহণযোগ্য নহয় বুলি তেওঁ মন্তব্য কৰে। আনহাতে, তৃণমূলৰ অধ্যক্ষ গিৰিন্দ্ৰনাথ বৰ্মণে খোকন মিয়াঁক এজন বলিষ্ঠ নেতা বুলি স্বীকাৰ কৰাৰ লগতে সকলোকে দলৰ নেত্ৰীৰ সিদ্ধান্ত মানি চলিবলৈ আহ্বান জনায়। নিৰ্বাচনৰ ঠিক পূৰ্বে হোৱা এই দলত্যাগে কোচবিহাৰৰ ৰাজনৈতিক প্ৰেক্ষাপটত শাসকীয় দলটোৰ বাবে এক প্ৰত্যাহ্বানৰ সৃষ্টি কৰিছে।
