‘ভাৰতীয় ৰাজনীতিত তেওঁ অকপট’। দ্য গাৰ্ডিয়ানত মহুৱা মৈত্ৰৰ সাক্ষাৎকাৰৰ আধাৰত প্ৰকাশিত এটা নিবন্ধত এনেদৰে আৰম্ভ কৰা হৈছে। নিবন্ধটোৰ শিৰোনামতো লিখা হৈছে, ‘ভাৰতীয় ৰাজনীতিৰ নাৰীবিদ্বেষ আৰু ভণ্ডামিক মহুৱা মৈত্ৰাই কেনেকৈ জোকাৰি দিছে।’ তৃণমূলৰ সাংসদ মহুৱা মৈত্ৰই সেই সাক্ষাৎকাৰত বহু কথা কৈছে। ইয়াত তেওঁৰ নিজৰ ৰাজনৈতিক স্থিতিৰ লগতে পুৰুষৰ সৈতে তেওঁৰ অভিজ্ঞতাও সন্নিবিষ্ট হৈছে।
শেহতীয়াকৈ ২০২০ চনত তোলা তেওঁৰ জন্মদিনৰ ফটো ছ’চিয়েল মিডিয়াত ভাইৰেল হৈ পৰিছে। ছবিখনত মহুৱাক ৱাইনৰ গিলাচ এটা লৈ থকা দেখা গৈছে। ছবি সন্দৰ্ভত মহুৱাই নিজৰ বক্তব্য স্পষ্টকৈ ক’লে। তেওঁ কয় যে তেওঁৰ এজন প্ৰাক্তনে (এক্স) ছবিসমূহ ক্ৰপ কৰি ছ’চিয়েল মিডিয়াত প্ৰচাৰ কৰিবলৈ বিজেপিক গতাই দিছিল।
সাক্ষাৎকাৰত মহুৱাই নিজৰ ৰাজনৈতিক স্থিতি প্ৰকাশ কৰে, ‘মই কোন তাৰ বাবে মই কোনো অজুহাত দেখুৱাবলৈ যোৱা নাই। পৰিস্থিতিৰ লগত খাপ খুৱাই নিজকে সলনি কৰিবলৈও যোৱা নাই। বৰঞ্চ মোৰ লগত পৰিস্থিতি নিজেই সলনি হওক।’
লগতে পঢ়কঃ আধুনিক ভাৰতৰ নিৰ্মাতা জৱাহৰলাল নেহৰুৰ যি পাঁচটা অৱদান কেতিয়াও পাহৰিব নোৱাৰি
বিদেশত অধ্যয়নৰ পিছত তেওঁ নিউয়ৰ্ক আৰু লণ্ডনত জে পি মৰ্গান চেজৰ সৈতে বিনিয়োগ বেংকাৰ হিচাপে কাম কৰিবলৈ আৰম্ভ কৰিছিল। ২০০৮ চনত তেওঁ ভাৰতীয় ৰাজনীতিত যোগদান কৰে। মহুৱাৰ ভাষাত, ‘যেতিয়া মই ভাৰতীয় ৰাজনীতিত যোগদান কৰিছিলো, তেতিয়া মোৰ বাবে স্পষ্ট আছিল যে মই ৰাজহুৱা জীৱনত থাকিব বিচাৰো, কিন্তু নিজৰ ধৰণেৰে।’
বিগত কেইসপ্তাহমানৰ পৰা অহৰহ সংবাদ মাধ্যমৰ প্ৰচাৰত আছে মহুৱা মৈত্ৰৰ নাম। কিন্তু তেওঁক কেতিয়াও ক্লান্ত হোৱা দেখা নগ’ল। তেওঁৰ প্ৰাক্তন আৰু ছ’চিয়েল মিডিয়াত ভাইৰেল ফটোৰ পৰা কাহিনীটো আৰম্ভ হয়। মহুৱাই দাবী কৰে যে ফটোখন তেওঁৰ প্ৰাক্তন এজনে বিজেপিক গতাই দিছিল। স্পষ্টবাদী মহুৱাৰ ভাষাত, ‘পুৰুষৰ ক্ষেত্ৰত মোৰ পছন্দ ভয়ংকৰ।’
সাক্ষাৎকাৰত মহুৱাই কয় যে তেওঁৰ স্থিতিৰ আঁৰত তেওঁৰ পৰিয়ালৰ ডাঙৰ ভূমিকা আছে। তেওঁ কলিকতাৰ এনে এটা পৰিয়ালত ডাঙৰ-দীঘল হৈছিল য’ত পুৰুষ-মহিলাৰ কোনো বৈষম্য নাছিল। তেওঁৰ ভাষাত ‘মোৰ পৰিয়ালটো প্ৰগতিশীল আৰু অগতানুগতিক। ভাৰতীয় মহিলা কি হ’ব লাগে সেই প্ৰচলিত ধাৰণাৰে মই ডাঙৰ হোৱা নাছিলো।’
মহুৱাই কয় যে তেওঁ পশ্চিম বংগৰ এটা দলৰ সৈতে আছে যাৰ নেতৃত্বত আছে এগৰাকী মহিলা। যাৰ দলৰ সাংসদ আধা মহিলা। পশ্চিম বংগত দেৱীক শক্তি হিচাপে পূজা কৰা হয়। তেওঁৰ ভাষাত ‘বংগত আমি নাৰীক ক্ষমতা হিচাপেহে দেখিছোঁ, বশীভূত হিচাপে নহয়। আমাৰ দেৱী কালী বা দুৰ্গা।’
বিজেপিৰ সাংসদসকলে দামী আৰু চকমকীয়া কাপোৰ পিন্ধাৰ অভিযোগ উত্থাপন কৰিছে। এই প্ৰসংগত মহুৱাই কয়, ‘মই সদায় নিজকে ফিট কৰি ৰাখি ভাল পাওঁ। মোৰ ভোটাৰসকলে মোক লেতেৰা দেখাটো নিবিচাৰে। সাধাৰণ কাপোৰ পিন্ধিলে মোক উজ্জ্বল ৰং পিন্ধিবলৈ কয়।’
লগতে পঢ়কঃ গাজাত হামাছ নিয়ন্ত্ৰিত সংসদত প্ৰৱেশ কৰিলে ইজৰাইলী সেনা; দাবী ইজৰাইলৰ প্ৰতিৰক্ষা মন্ত্ৰীৰ
কিন্তু ভাৰতীয় ৰাজনীতিত তেওঁ নিজকে আদৰ্শ নাৰী হিচাপে তুলি ধৰিব বিচাৰেনে? এই সন্দৰ্ভত মহুৱাৰ বক্তব্য, তেওঁ নিজক লৈ ইমান গৌৰৱ নকৰে। অৱশ্যে ভাৰতীয় ৰাজনীতিত বৰ্তমান নতুন ৰোল মডেলৰ প্ৰয়োজন হৈছে।
