ইণ্ডোনেছিয়াৰ জাকাৰ্টাত চলি থকা ১৮ সংখ্যক এছিয়ান গেইমছত চমকপ্ৰদ প্ৰদৰ্শনেৰে দুটাকৈ বৃহৎ সাফল্য অৰ্জন কৰিবলৈ সক্ষম হোৱাৰ পাছত আজি জাকাৰ্টাৰ ট্ৰেকত অন্তিম বাৰৰ বাবে দৌৰিব দেশৰ চাৰিশ মিটাৰৰ সম্প্ৰাজ্ঞী তথা অসম কন্যা হিমা দাস।
উল্লেখ্য যে আজি হিমাই এছিয়াডত নিজৰ শেষ ইভেণ্ট হিচাপে মহিলাৰ ৪x৪০০ মিটাৰৰ ৰীলেত প্ৰতিদ্বণ্ডিতা আগবঢ়াব। ৪x৪০০ মিটাৰৰ মহিলা ভাৰতীয় দলটোত হিমাৰ উপৰি আছে এম আৰ পুভাম্মা, সৰিতাবেন গাইকোৱাড় আৰু ভি কে বিস্ময়া।
ভাৰতীয় সময়মতে ৪x৪০০ মিটাৰৰ চূড়ান্ত মেচখন আজি সন্ধিয়া ৬.৫০ বজাত অনুষ্ঠিত হ’ব। এই ইভেণ্টৰো হিমা দাস তথা তেওঁৰ সংগীৰ মূল প্ৰতিদ্বন্দ্বী হ’ব বাহৰেইন। বাহৰেইনক নেতৃত্ব দিব হিমাক চাৰিশ মিটাৰৰ ব্যক্তিগত ইভেণ্টত পৰাস্ত কৰা ছালৱা ঈদ নাছেৰে।
উল্লেখ্য যে, ভাৰতীয় দলটো যোৱা ২৪ আগষ্টত জাকাৰ্টাত দলৰ প্ৰশিক্ষক গেলিনা বুখাৰিনাই এক ট্ৰায়েলৰ জৰিয়তে নিৰ্বাচিত কৰে।
মনকৰিবলগীয়া যে আজিৰ এই ৰীলেতো ভাৰতীয় দলৰ মূল অস্ত্ৰ হ’ব অসম কন্যা হিমা দাস। কিয়নো উপৰ্যুপৰি দুটা দিনত জাকাৰ্টা এছিয়ান গেইমছত দুবাৰকৈ চাৰিশ মিটাৰৰ ৰাষ্ট্ৰীয় অভিলেখ ভংগ কৰাৰ লগতে ৪০০ মিটাৰৰ ব্যক্তিগত আৰু মিক্সড ৰেলীত ৰূপৰ পদক অৰ্জন কৰি ইতিহাস সৃষ্টি কৰি থৈছে।
