অসম ৰাজ্যিক গ্ৰামীণ জীৱিকা অভিযানৰ অন্তৰ্গত মহিলা আত্মসহায়ক গোটৰ দ্বাৰা ক’ৰ’না ভাইৰাছ প্ৰতিৰোধৰ উদ্দেশ্যে প্ৰস্তুত কৰি উলিওৱা মাস্কৰ এখন বিপণী আজি শিৱসাগৰ জিলা উপায়ুক্ত লক্ষ্মীনন্দন গগৈয়ে মুকলি কৰে।
বিপণীখন মুকলি কৰি জিলা উপায়ুক্ত গৰাকীয়ে কয়, ‘বৰ্তমান সময়ত মাস্ক পৰিধান কৰাটো দৈনন্দিন জীৱন প্ৰণালীৰ এক অংশ হৈ পৰিছে। ক’ৰ’না ভাইৰাছ প্ৰতিৰোধ কৰিবৰ বাবে এনে মাস্কৰ চাহিদা ক্ৰমাৎ বৃদ্ধি পাই আহিছে। মহিলা গোট সমূহে এনে মাক্সৰ প্রচুৰ যোগান ধৰিব পাৰিব’।
ইয়াৰ বাবে প্ৰয়োজন হোৱা বিপণী সহজ কৰি তুলিবৰ বাবে শিৱসাগৰ জিলা প্ৰশাসনে এই বিক্ৰী কেন্দ্ৰ সাধাৰণ ৰাইজৰ বাবে মুকলি কৰিছে। মাক্সৰ উপৰি ঘৰুৱা উৎপাদিত শাক-পাচলিও ৰাইজৰ সুবিধাৰ্থে মুকলি কৰা হৈছে।
গোট সমূহৰ সদস্যৰ বাৰীত উৎপাদিত হোৱা বিভিন্ন বতৰৰ পাচলি, কণী আদি ৰাইজক বিক্ৰীৰ অৰ্থে মুকলি কৰা হৈছে। আজি মুকলি হোৱা এই বিপণীত ঘৰুৱাভাৱে উৎপাদিত বিভিন্ন সামগ্ৰী সহজলভ্য হ’ব।
অসম ৰাজ্যিক গ্ৰামীণ জীৱিকা অভিযানৰ অধীনস্থ শিৱসাগৰ জিলা প্ৰকল্প প্ৰবন্ধন গোটৰ তত্ত্বাৱধানত, ৰাজ্যিক পঞ্চায়ত আৰু গ্ৰামোন্নয়ন প্ৰতিষ্ঠান, জয়সাগৰ কেন্দ্ৰৰ সহযোগত তথা জিলাখনৰ পাঁচটা উন্নয়ন খণ্ডকে সামৰি আয়োজন কৰা এই বিপণী অসম ৰাজ্যিক গ্ৰামীণ জীৱিকা অভিযান, শিৱসাগৰৰ কাৰ্যালয় প্ৰাংগনত ৰাইজৰ বাবে উপলব্ধ থাকিব।
বিপণীখনৰ উদ্বোধনী অনুষ্ঠানত জিলা পৰিষদৰ মুখ্য কাৰ্যবাহী বিষয়া শেৱালি বৰদলৈ, এছ আই আৰ ডিৰ অধ্যক্ষ নেকিব শইকীয়া, জিলা পশুপালন বিষয়া ডাঃ অক্ষয়ভট কেচাৰী, অসম ৰাজ্যিক গ্ৰামীণ জীৱিকা অভিযান, শিৱসাগৰৰ জিলা প্ৰকল্প প্ৰৱন্ধক ডাঃ সুৰজ জ্যোতি গগৈকে আদি কৰি বিভিন্ন চৰকাৰী বিভাগৰ বিষয়াসকল উপস্থিত থাকে।
