নিষিদ্ধ মাওবাদী সংগঠৰ সাধাৰণ সম্পাদক নম্বালা কেশৱ ৰাও ছত্তীশগড়ৰ নাৰায়ণপুৰ জিলাৰ আবুঝমাদৰ অৰণ্যত ২১ মে’ ২০২৫ত নিৰাপত্তা বাহিনীৰ সৈতে হোৱা এক তীব্ৰ এনকাউণ্টাৰত ২৬ জন সতীৰ্থৰ সৈতে নিহত হয়। এই ঘটনা নিষিদ্ধ মাওবাদী সংগঠনটোৰ বাবে এক গুৰুতৰ বিপৰ্যয় হিচাপে পৰিগণিত হৈছে, কিয়নো চাৰি দশকৰো অধিক ইতিহাসত এই প্ৰথমবাৰৰ বাবে ইয়াৰ শীৰ্ষ নেতা এনকাউণ্টাৰত নিহত হৈছে। প্ৰধানমন্ত্ৰী নৰেন্দ্ৰ মোদী আৰু কেন্দ্ৰীয় গৃহমন্ত্ৰী অমিত শ্বাহে এই সফলতাক “নক্সালবাদ নিৰ্মূলৰ যুদ্ধত এক গুৰুত্বপূৰ্ণ কৃতিত্ব বুলি অভিহিত কৰিছে।
চোৰাংচোৱা তথ্যৰ ভিত্তিত নাৰায়ণপুৰ, দন্তৱাড়া, বিজাপুৰ আৰু কণ্ডাগাঁৱৰ পৰা জিলা সংৰক্ষিত ৰক্ষী বাহিনীৰ দল এই অভিযানৰ বাবে প্ৰেৰণ কৰা হৈছিল। কেইবাদিনো ধৰি চলি থকা এই অভিযানত বহু মাওবাদী কেডাৰ নিহত বা গুৰুতৰভাৱে আহত হৈছে বুলি জানিব পৰা গৈছে। শেহতীয়াকৈ আবুঝামদত সংঘটিত হোৱা এই মুখামুখি সংঘৰ্ষ হৈছে ছত্তীশগড়-তেলেংগানা সীমান্তৰ কাৰেগুটা পাহাৰত। নিৰাপত্তা বাহিনীৰ আন এক বৃহৎ অভিযানত ৩১ জন মাওবাদীৰ প্ৰাণহানি হোৱা বুলি বাতৰি প্ৰকাশ পাইছিল।
উল্লেখ্য যে নিহত মাওবাদী নেতা কেশৱ ৰাও মূৰত ১.৫ কোটি টকাৰ পুৰস্কাৰ আছিল। তেওঁ ১৯৭০ৰ দশকৰ পৰা মাওবাদী আন্দোলনৰ সৈতে জড়িত আছিল আৰু ২০১৮ চনত গণপতিৰ পৰা দলটোৰ নেতৃত্ব গ্ৰহণ কৰিছিল। তেওঁ ২০১০ চনৰ চিন্তালনাৰত ৭৫ জন চি আৰ পি এফ জোৱানৰ মৃত্যু হোৱা লেণ্ডমাইন আক্ৰমণ আৰু ২০১৩ চনৰ ঝিৰাম ঘাটিৰ কংগ্ৰেছ কনভয়ৰ এম্বুছৰ মাষ্টাৰমাইণ্ড আছিল কেশৱ ৰাও। তেওঁৰ নেতৃত্বতে মাওবাদী আন্দোলনৰ কৌশলগত আৰু সামৰিক কাৰ্যকলাপ তীব্ৰতৰ হৈছিল।
প্ৰোসংগ ক্ৰমে কেশৱ ৰাও অন্ধ্ৰ প্ৰদেশৰ শ্ৰীকাকুলাম জিলাৰ জিতন্নপেটা গাঁৱৰ বাসিন্দা আছিল। তেওঁ ৱাৰংগলৰ আঞ্চলিক অভিযান্ত্ৰিক মহাবিদ্যালয়ৰ ছাত্ৰ আছিল আৰু ১৯৮৪ চনত এম.টেক ডিগ্ৰী লাভ কৰিছিল। তেওঁ পি ডব্লিউৰো অন্যতম প্ৰতিষ্ঠাপক সদস্য আছিল। তেওঁবাসৱৰাজু, গংগন্না, প্ৰকাশ, কৃষ্ণ, বিজয়, কেশৱ, ৰাজু, উমেশকে ধৰি কেইবাটাও ছদ্মনামেৰে পৰিছিত আছিল। তেওঁ আছিল ইম্প্ৰভাইজড বিস্ফোৰক যন্ত্ৰৰ ব্যৱহাৰৰ বিশেষজ্ঞ আৰু গেৰিলা যুদ্ধৰ মাষ্টাৰমাইণ্ড আছিল। দলৰ কেন্দ্ৰীয় সামৰিক আয়োগ আৰু কেন্দ্ৰীয় সমিতিৰ মুৰব্বী আছিল আৰু পলিটব্যুৰোৰ সদস্য আছিল। এতিয়া ৰাওৰ মৃত্যুত সংঠনটো মেৰুদণ্ডহীন হৈ পৰিছে।
