বাংলাদেশী কূটনৈতিক বিষয়াৰ পত্নীক টপচেম চিমেণ্টৰ কাৰ্য্যালয়ত নিযুক্তি দিয়া বুলি প্ৰকাশিত বাতৰি সন্দৰ্ভত স্পষ্টীকৰণ দাঙি ধৰিছে টপচেম চিমেণ্টে।
নিৱনুৱাই চাকৰি বিচাৰি হাহাকাৰ কৰি থকাৰ সময়ত থলুৱাক বঞ্চিত কৰি বাংলাদেশী কূটনৈতিক বিষয়াৰ পত্নীক টপচেম চিমেণ্টে নিযুক্তি দিয়া বুলি বাতৰি প্ৰকাশ হোৱাৰ পাছতে টপচেম চিমেণ্টৰ তৰফৰ পৰা এই সম্পৰ্কত স্পষ্টীকৰণ দাঙি ধৰি তেওঁলোকে থলুৱাৰ নিযুক্তিক লৈ যথেষ্ট সতৰ্ক আৰু প্ৰতিক্ষেত্ৰত থলুৱাক অগ্ৰাধিকাৰ প্ৰদান কৰাৰ চেষ্টা চলাই আহিছে বুলি উল্লেখ কৰে।
লগতে পঢ়ক: নিবনুৱাৰে ভাৰাক্ৰান্ত অসমত বাংলাদেশীক নিযুক্তি; গৰজি উঠিল কংগ্ৰেছ, জাতীয় দল-সংগঠন
‘‘বাংলাদেশৰ কোনো কূটনৈতিক বিষয়াৰ পত্নীক আমাৰ ফালৰ পৰা নিযুক্তি প্ৰদান কৰা হোৱা নাই। ইয়াৰ পৰিৱৰ্তে তেখেতে কেৱল ইণ্টাৰ্ণশ্বীপ কৰিবলৈ এটা নিৰ্দিষ্ট সময়ৰ বাবে ইয়ালৈ আহিছিল আৰু তেখেতৰ ইণ্টাৰ্ণশ্বীপৰ সময়সীমা ইতিমধ্যে অন্ত পৰিছে। বৰ্তমান আমাৰ কোম্পানীৰ সৈতে তেখেতৰ কোনো সম্পৰ্ক নাই,’’ টপচেম চিমেণ্টৰ ব্যৱস্থাপনা মণ্ডলীয়ে প্ৰকাশ কৰা স্পষ্টীকৰণ পত্ৰত এইদৰে উল্লেখ কৰে।
লগতে পঢ়ক : নিবনুৱাৰ পেটত গোৰ মাৰি Topcem চিমেন্টে গুৱাহাটীত নিযুক্তি দিলে বাংলাদেশী কূটনীতিকৰ পত্নীক
উল্লেখযোগ্য যে, গুৱাহাটীৰ মেগা প্লাজাত থকা টপচেম চিমেন্টৰ কৰ্পোৰেট কাৰ্যালয়ত ছিনিয়ৰ মেনেজাৰ হিচাপে মুনেৰা আজম নামৰ মহিলাগৰাকীয়ে চাকৰি কৰি থকা বুলি নৰ্থ-ইষ্ট নাওত বাতৰি প্ৰকাশ কৰা হৈছিল।
মুনেৰা গুৱাহাটীত থকা বাংলাদেশৰ সহকাৰী উচ্চায়ুক্ত শ্বাহ মহম্মদ তনভিৰ মনছুৰৰ পত্নী।
নৰ্থ-ইষ্ট নাওত এই সম্পৰ্কে সবিস্তাৰে বাতৰি প্ৰকাশ হোৱাৰ পাছতে টমচেম চিমেন্টৰ বিৰুদ্ধে কংগ্ৰেছকে ধৰি আছু, ছাত্ৰ মুক্তি সংগ্ৰাম সমিতিকে আদি কৰি বিভিন্ন জাতীয় দল-সংগঠনে জাঙুৰ খাই উঠিছিল।
