অসমৰ জনগণৰ প্ৰবল বিৰোধিতাৰ পাছতো শনিবাৰে প্ৰধানমন্ত্ৰী নৰেন্দ্ৰ মোডীয় অসমত আহি নাগৰিকত্ব সংশোধনী বিধেয়ক গৃহীত কৰিবই বুলি পুনৰ ঘোষণা কৰাৰ পাছতে গোলাঘাটৰ দক্ষিণহেঙ্গেৰা অঞ্চলৰ ৰাইজ বিজেপিৰ বিৰুদ্ধে জাঙুৰ খাই উঠে।
সদৌ টাই আহোম ছাত্ৰ সন্থাৰ দক্ষিণহেঙ্গেৰা আঞ্চলিকৰ উদ্যোগত শনিবাৰে সন্ধিয়া ৰাইজে কঠিয়াতলী চাৰিআলিৰ পৰা দক্ষিণহেঙ্গেৰা বজাৰলৈ এক জোঁৰ সমদলৰ কাৰ্যসূচী ৰূপায়ণ কৰে।
আটাছুৰ দক্ষিণহেঙ্গেৰা আঞ্চলিকৰ সভাপতি কৌশিক বুঢ়াগোঁহাই, যুটীয়া সম্পাদক বিতোপন দুৱৰা, তুলসী দুৱৰাৰ নেতৃত্বত সংগঠিত এই কাৰ্যসূচীৰ আৰম্ভণিতে কঠিয়াতলী চাৰিআলিত আটাছুৰ কেন্দ্ৰীয় সাংস্কৃতিক সম্পাদক সুনিল গগৈয়ে এই জাতিধংসী বিধেয়কৰ বিৰুদ্ধে বক্তব্য ৰাখি সমদল মুকলি কৰে।
উল্লেখযোগ্য যে হিন্দু, মুছলমান, চাহ জনগোষ্ঠীকে মূখ্য কৰি অঞ্চলটোৰ সকলো সম্প্ৰদায়ৰ প্ৰায় ডেৰ সহস্ৰাধিক ৰাইজে অংশগ্ৰহণ কৰি নাগৰিকত্ব বিধেয়ক বাতিল কৰক, বিজেপি গ’ বেক, আৰএছএছ হুচিয়াৰ আদি শ্ল’গানেৰে অঞ্চলটোৰ আকাশ বতাহ কঁপাই তোলে।
সমদলৰ শেষত দক্ষিণহেঙ্গেৰাত অনুষ্ঠিত আটাছুৰ জিলা কাৰ্যকৰী সভাপতি পংকজ গগৈয়ে আঁত ধৰা প্ৰতিবাদী সভাত মদ মুক্তি দাবী সমিতিৰ সভাপতি প্ৰবীণ দাস, আটাছুৰ জিলা যুটীয়া সম্পাদক গৌতম লাহন, এআইএছএফৰ ৰাজ্যিক উপসভাপতি বিতোপন গগৈ, ছাত্ৰ মুক্তি সংগ্ৰাম সমিতিৰ পিন্টু গগৈ, কংগ্ৰেছৰ জিলা সম্পাদক লুটফুৰ ৰহমান আদিয়ে বক্তব্য ৰাখে।
বক্তাসকলে এই বিধেয়ক কোনো কাৰণতে গৃহীত কৰিবলৈ দিয়া নহ’ব বুলি কৈ শেষ বিন্দু তেজ থকালৈকে অসমীয়াই ইয়াৰ বিৰুদ্ধে যুঁজিব বুলি সকীয়াই দি বিজেপিক ইয়াৰ উত্তৰ নিৰ্বাচনত দিব বুলি স্পষ্ট কৰি দিয়ে।
এই প্ৰতিবাদী কাৰ্যসূচীত আটাছুৰ জিলা উপসভাপতি ধ্ৰুৱজ্যোতি শইকীয়া, যুটীয়া সম্পাদক দ্বীপজ্যোতি তামূলী, প্ৰচাৰ সম্পাদক জুমন কোঁৱৰ, মুখ্য সাংগঠনিক সম্পাদক পাৰ্থ কোঁৱৰো উপস্থিত থাকে।