অসম চৰকাৰ তথা বিশ্ববিদ্যালয় কৰ্তৃপক্ষৰ অৱহেলাৰ বাবেই এতিয়া পৰিত্যক্ত হৈ পৰি আছে কটন বিশ্ববিদ্যালয়ৰ ঐতিহ্যপূৰ্ণ ছাত্ৰাৱাসসমূহ। হাবি-জংঘলৰ মাজত ক্ৰমান্বয়ে জহিখহি যাবলৈ ধৰা এই ছাত্ৰাৱাসসমূহৰ কি হ’বগৈ তাৰ নাই কোনো স্পষ্ট ছবি নাই।
এখন আৰ টি আই আৱেদনৰ উত্তৰত এশ বছৰৰ অধিক সময়ৰ ঐতিহ্য বহন কৰি অহা এই ছাত্ৰাবাসসমূহক লৈ বিশ্ববিদ্যালয় কৰ্তৃপক্ষৰ উদাসীনতা স্পষ্ট হৈ পৰিছে। এই বাতৰি ইতিমধ্যে নৰ্থ-ইষ্ট নাওত প্ৰকাশ পাইছে।
কটনৰ ছাত্ৰাৱাসবোৰৰ এই দুৰৱস্থাক লৈ নৰ্থ-ইষ্ট নাওৰ আগত আক্ষেপ প্ৰকাশ কৰিছে কটন কলেজৰ দুগৰাকী অৱসৰপ্ৰাপ্ত অধ্যক্ষ তথা ছাত্ৰাবাসৰ প্ৰাক্তন আবাসীয়ে।
এই বিষয়ত অৱসৰপ্ৰাপ্ত অধ্যক্ষ উদয়াদিত্য ভৰালীয়ে কয়, “আধুনিকতা শিপাহীন হ’ব নোৱাৰে। ঐতিহ্যক বাদ দিলে বা অতীতক বাদ দিলে নহ’ব। এই অতীতসমূহৰ পৰাই এতিয়াৰ প্ৰজন্মই অনুপ্ৰেৰণা লাভ কৰে। আমাক উন্নয়ন লাগিবই। কিন্তু ঐতিহ্য ভাঙি শেষ কৰি কোনো উন্নয়ন নহয়। এইটোও নহয় যে চৰকাৰৰ মাটি নাই। গতিকে কটনৰ সম্প্ৰসাৰণৰ বাবে আন এটা চৌহদৰ ব্যৱস্থা কৰক।”
তেওঁ লগতে কয় যে কলকাতাৰ সকলোতকৈ গুৰুত্বপূৰ্ণ ঠাইখিনিত প্ৰেছিডেন্সি কলেজ আছে। প্ৰেছিডেন্সি কলেজৰ সম্প্ৰসাৰণৰ বাবে পুৰণা বিল্ডিংবোৰ ভাঙি দিয়া নাই। বৰং তেওঁলোকে সুকীয়া ঠাইত বেলেগ চৌহদৰ ব্যৱস্থা কৰিছে। উন্নয়নৰ বাবে কেমব্ৰীজ, অক্সফ’ৰ্ড আদিৰ দৰে বিশ্ববিদ্যালয়সমূহে নিজৰ পুৰণা বিল্ডিংবোৰ ভাঙি দিয়া নাই।
“আজি বিদেশৰ যিবিলাক উন্নত দেশ তেওঁলোকৰ বেয়াখিনি লোৱাত আমাৰ মানুহে আগ বাঢ়ি গৈছে কিন্তু ভালখিনি ল’ব নোখোজেই। তেওঁলোকৰ বিভিন্ন মহাবিদ্যালয়-বিশ্ববিদ্যালয়ত পঢ়ি যোৱা ব্যক্তিসকলে তেওঁলোকে এই শিক্ষানুষ্ঠানসমূহলৈ যথেষ্ট দান-বৰঙনি আগ বঢ়ায়। কিন্তু তেনেকৈ দান-বৰঙনি দিবলৈ তেওঁলোকৰ সৈতে আত্মিক সম্পৰ্ক থাকিবলৈ সেই ঠাইখিনি থাকিব লাগিব। সেইটোৱে যদি নাথাকে, তাৰ সন্মুখেৰে পাৰ হৈ গ’লে যদি নিজৰ পুৰণি স্মৃতি মনলৈ নাহে তেনেহ’লে এইটো মোৰ বুলি ভাবটো কেনেকৈ আহিব। সেই কথাখিনি যদি বুজি নাপায় সেই উন্নয়ন হ’ব ঠেৰুছিগা। তাৰ শিপা নাই”, প্ৰাক্তন অধ্যক্ষ উদয়াদিত্য ভৰালীয়ে কয়।
ইপিনে, কটন কলেজৰ আন এগৰাকী অৱসৰপ্ৰাপ্ত অধ্যক্ষ ড০ সীতানাথ লহকৰে ছাত্ৰাবাসকেইটা সন্দৰ্ভত বিশ্ববিদ্যালয় কৰ্তৃপক্ষই সোনকালে সিদ্ধান্ত লোৱাৰ প্ৰয়োজনীয়তা আছে বুলি মন্তব্য কৰে।
তেওঁ কয়, “এই বিষয়ত আমি কটন কলেজত থাকোতে যেতিয়া ড০ ইন্দ্ৰ কুমাৰ ভট্টাচাৰ্য্য অধ্যক্ষ হৈ আছিল, তেতিয়া এটা সিদ্ধান্ত হৈছিল। সেই সময়ত সেই ছাত্ৰাবাসকেইটা ভাঙি দিয়া হ’ব বুলি শুনি বহুতেই আপত্তি কৰিছিল আৰু সেই ছাত্ৰাবাসসমূহ সংৰক্ষণৰ দাবী তুলিছিল। কিন্তু যিহেতু ছাত্ৰ-ছাত্ৰীৰ কাৰণে নতুন ছাত্ৰাবাস লাগিবই গতিকে ‘নতুন আৱাস নিৰ্মাণ কৰিলেও তাৰ ওপৰত বা সন্মুখত পুৰণি ছাত্ৰাবাসৰ পূৰ্ণ আৰ্হি এটা ৰখা হওক। লগতে ছাত্ৰাবাসৰ নাম একে ৰখা যাওক।’ –এই সিদ্ধান্ত লোৱা হৈছিল।”
তেওঁ লগতে কয় যে যদি কটনৰ পাণবজাৰৰ পুৰণি চৌহদ একে ৰাখি আন ঠাইত থকা বিশ্ববিদ্যালয়ৰ মাটিত নতুন চৌহদ নিৰ্মাণ কৰে সেয়াও গ্ৰহণযোগ্য। কিন্তু বিশ্ববিদ্যালয় কৰ্তৃপক্ষই বৰ্তমানৰ ছাত্ৰাবাসকেইটা মেৰামতি কৰি সংৰক্ষণ কৰিব পাৰিব নে নাই সেই কথা স্পষ্ট কৰিব লাগে।
কটন কলেজৰ দুগৰাকী অধ্যক্ষৰ মন্তব্যৰ বিপৰীতে কিন্তু বৰ্তমান ছাত্ৰাবাসকেইটা সন্দৰ্ভত কোনো স্পষ্ট সিদ্ধান্ত নথকাত অসন্তুষ্ট তাহানিৰ কটন কলেজ আৰু এতিয়াৰ বিশ্ববিদ্যালয়ৰ প্ৰাক্তন আৰু এতিয়াৰ বহু ছাত্ৰ-ছাত্ৰী।
