দেশত চলি থকা লকডাউনৰ বাবে এচাম দিন হাজিৰা কৰা দুখীয়া, শ্ৰমিক শ্ৰেণীৰ লোক কৰ্মহীন হৈ পৰিছে আৰু তীব্ৰ খাদ্য সংকট, অৰ্থনৈতিক সংকটত ভুগিব লগীয়া হৈছে।
কিন্তু এনে সংকটৰ সময়তো এচাম দুষ্ট ব্যৱসায়ীয়ে নিজৰ খেয়াল খুচি মতে অত্যাৱশ্যকীয় সামগ্ৰীৰ মূল্যবৃদ্ধি কৰিছে।
এই ক্ষেত্ৰত উদ্বিগ্নতা প্ৰকাশ কৰি ৰাজহ ,দুৰ্যোগ প্ৰশমন আৰু জলসিঞ্চন মন্ত্ৰী ভৱেশ কলিতাই উক্ত ব্যৱসায়ীসকলক অত্যাৱশ্যকীয় সামগ্ৰীৰ কৃত্ৰিম নাটনিৰ সৃষ্টি কৰি গ্ৰাহকৰ পৰা অধিক মূল্য নল’ববলৈ সকিয়াই দিয়ে।
আজি সংবাদ মাধ্যমৰ আগত মন্ত্ৰীজনে দোকানীসকলক গ্ৰাহকৰ পৰা চৰকাৰে নিৰ্ধাৰণ কৰি দিয়া মূল্য ল’বলৈ কয়।
তেওঁ লগতে কয় যে যিসকল ব্যৱসায়ীয়ে বজাৰত কৃত্ৰিম নাটনিৰ সৃষ্টি কৰি গ্ৰাহকৰ পৰা অধিক মূল্য আদায় কৰি আছে তেওঁলোকৰ বিৰুদ্ধে আইনী ব্যৱস্থাও গ্ৰহণ কৰা হ’ব।
এইক্ষেত্ৰত মন্ত্ৰী গৰাকীয়ে যোগান বিভাগৰ বিষয়া কৰ্মচাৰী সকলক এনে ব্যৱসায়ীৰ ওপৰত চোকা দৃষ্টি ৰাখিবলৈ নিৰ্দেশ দিয়ে।
বিশ্বত কোভিড ১৯ ৰ ভয়াৱহতাৰ কথা উল্লেখ কৰি মন্ত্ৰী গৰাকীয়ে কয় যে কোভিড ১৯ মাৰাত্মক ভাইৰাছ বিধৰ পৰা ৰক্ষা পাবলৈ এক মাত্ৰ উপায় হৈছে লক ডাউনৰ নীতি নিয়ম মানি চলা।
কোভিড-১৯ প্ৰতিহত কৰাৰ ক্ষেত্ৰত মন্ত্ৰী গৰাকীয়ে ৰাইজক লকডাউন মানি চলিবলৈ অনুৰোধ জনাই কয় যে যধে মধে ৰাইজে বাহিৰলৈ ওলাই আহিব নালাগে।
এৰাব নোৱাৰা কাৰণত ৰাইজে বাহিৰলৈ ওলাই আহিলে ৬ ফুট দূৰত্বত থাকি সামাজিক ব্যৱধান মানি চলিব লাগে। মাস্ক পৰিধান কৰি নাইবা মাস্ক নাথাকিলে গামোচাখন মুখত ব্যৱহাৰ কৰিহে বাহিৰলৈ ওলাই আহিবলৈ তেওঁ আহ্বান জনায়।