বিদ্যুৎ বিভাগৰ ভুলৰ বাবেই প্ৰাণ হেৰুৱালে এটি নিস্পাপ ছাত্ৰই। পথত পৰি থকা উন্মুক্ত বিদ্যুৎ পৰিবাহী তাঁৰত লাগি মৃত্যুক আকোৱালি ল’লে ছাত্ৰগৰাকীয়ে।
এই মৰ্মান্তিক ঘটনা সংঘটিত হৈছে অন্ধ্ৰপ্ৰদেশত।
জানিব পৰা মতে, এখন চাইকেলত উঠি আহি আছিল দুই স্কুলীয়া ছাত্ৰ। ৰাস্তাত পৰি আছিল বিদ্যুৎ পৰিবাহী এডাল উন্মুক্ত তাঁৰ। উক্ত তাঁৰত লাগি যায় চাইকেলখন।
উচ্চ প্ৰাবল্যত পৰিবাহী হৈ থকা বিদ্যুতৰ তাঁৰত লাগি এজন ছাত্ৰই মৃত্যুক সাৱটি লয় আৰু আনজন ছাত্ৰ গুৰুতৰভাবে আহত হয়। সংকটজনক অৱস্থাত তেওঁক চিকিৎসালয়ত ভৰ্তি কৰোৱা হয়।
অন্ধ্ৰপ্ৰদেশৰ কদাপা চহৰৰ এই দুৰ্ঘটনাৰ চিচিটিভি ফুটেজ ভাইৰেল হৈ পৰিছে ছ’চিয়েল মিডিয়াত। এই কথা দেখি স্তম্ভিত হৈ পৰিছে নেটিজেনসকল।
স্থানীয় সূত্ৰৰ পৰা জানিব পৰা মতে, এঠাইত বিদ্যুতৰ খুঁটাৰ পৰা তাঁৰ ছিগি পথৰ ওপৰত ওলমি আছিল।
বিদ্যুৎস্পৃষ্ট হৈ মৃত্যু হোৱা ছাত্ৰজনৰ নাম তনবীৰৰ। তানবীৰে চলাই আহিছিল চাইকেলখন। চাইকেলখনৰ পিছফালে উঠি আহিছিল আদম নামত বন্ধুজন।
ঘটনাৰ পিছত স্থানীয় ৰাইজে বিদ্যুৎ পৰিবাহী তাঁৰ কাটি গুৰুতৰভাৱে আহত আদমক উদ্ধাৰ কৰি চিকিৎসালয়লৈ প্ৰেৰণ কৰে। যদিও সেই সময়লৈকে বিদ্যুৎস্পৃষ্ট হৈ তনবীৰৰ মৃত্যু হৈছিল।
স্থানীয় ৰাইজে জনোৱা মতে, বিদ্যালয়ৰ পৰা চাইকেলেৰে ঘৰলৈ উভতি আহিছিল দুই নাবালক। ছাত্ৰজনৰ মৃত্যুৰ পিছত সমগ্ৰ অঞ্চলটো উত্তপ্ত হৈ পৰে। বিদ্যুৎ বিভাগৰ বিৰুদ্ধে স্থানীয় ৰাইজে ক্ষোভ প্ৰকাশ কৰে। এই ঘটনাৰ গোচৰ ৰুজু কৰি আৰক্ষীয়ে তদন্ত আৰম্ভ কৰিছে।
