মহানগৰীৰ জু ৰ’ড তিনিআলিত সংঘটিত হৈছে শোকাৱহ ঘটনা। কাম কৰি থকা অৱস্থাতে চাদৰ পৰা পৰি পংকজ ঘোষ(২৯) নামৰ এজন শ্ৰমিকে ঘটনা স্থলীতে কৰুণ মৃত্যুক সাবটি লয়। আজি দুপৰীয়া প্ৰায় ১২ বজাত ঘটনাটো সংঘটিত হৈছে।
প্ৰাপ্ত তথ্য অনুসৰি পংকজ ঘোষ নামৰ শ্ৰমিকজনে জু ৰ’ড তিনিআলিত থকা ৰাধা ভৱন মাৰ্কেটিং কমপ্লেক্সৰ ওপৰ মহলাত অপ্প’ মোবাইল কোম্পানীৰ চাইন ব’ৰ্ড লগাই আছিল। কাম কৰি থকা অৱস্থাতে অসাৱধনতাত হঠাৎ পিছলি তললৈ পৰি যায় শ্ৰমিকজন। আকস্মিক দুৰ্ঘটনাটোত প্ৰচুৰ ৰক্তক্ষৰণৰ ফলত ঘটনাস্থলীতে শ্ৰমিকজনৰ মৃত্যু হয়।
মৃত শ্ৰমিকজনৰ ঘৰ ফটাশিল আমবাৰীৰ চেগুণবাৰীত বুলি নিশ্চিত কৰা হৈছে। ইতিমধ্যে শ্ৰমিকজনৰ মৃতদেহ মৰণোত্তৰ পৰীক্ষাৰ বাবে জি এম চি এইচলৈ প্ৰেৰণ কৰা হৈছে।
উল্লেখযোগ্য যে, মহানগৰীত কাম কৰি থকা অৱস্থাত দুৰ্ঘটনা সংঘটিত হৈ শ্ৰমিকৰ মৃত্যু হোৱা ঘটনা এয়ে প্ৰথম নহয়। ইয়াৰ পূৰ্বেও বহু শ্ৰমিকে এনেদৰে দুৰ্ঘটনাত মৃত্যুক আকোৱালি ল’বলগীয়া হৈছে। ৰাজ্যৰ শ্ৰম কল্যাণ বিভাগৰ অকৰ্মণ্যতা আৰু শ্ৰমিক সকলৰ নিৰাপত্তাৰ বাবে প্ৰয়োজনীয় সুৰক্ষা ব্যৱস্থাৰ অভাৱৰ বাবে এনে ঘটনা সংঘটিত হৈ আহিছে।
