দেশ কঁপাই যোৱা কাৰ্বি আংলঙৰ ডকমকাৰ অভিজিত নাথ-নিলোৎপল দাস হত্যাকাণ্ডৰ অভিযোগত আৰক্ষীয়ে গ্ৰেপ্তাৰ কৰা আৰু নগাঁও কেন্দ্ৰীয় কাৰাগাৰত থকা অভিযুক্তসকলক আজি নগাঁৱৰ মুখ্য ন্যায়িক দণ্ডাধীশৰ আদালতত হাজিৰ কৰোৱা হয়।
উক্ত নাৰকীয় ঘটনাৰ মুঠ ৪৮ টা অভিযুক্তৰ এটা নাবালকৰ গোচৰ জুভেনাইল আদালতত চলি থকাৰ বিপৰীতে বাকী ৪৭ টা অভিযুক্তৰ গোচৰ নগাওঁ আদালতত চলি আছে। নগাঁও আদালতে যোৱা ৮ নৱেম্বৰত দিয়া তাৰিখৰ পৰিপ্ৰেক্ষিততে অহা ১ ডিচেম্বৰত শুনানিৰ তাৰিখ ঘোষণা কৰিছিল। এক ডিচেম্বৰৰ পৰাই আদালতে ডকমকা কাণ্ডৰ সাক্ষ্য গ্ৰহণ কৰাৰ সম্ভাৱনা আছে।
আনহাতে, আদালতে ৮ নৱেম্বৰৰ দিনাই ১৪ দিনৰ পিছত অৰ্থাৎ আজি ‘167 criminal procedure এটা ডিমাণ্ড ডেট’ ধার্য কৰিছিল আৰু তাৰ পৰিপ্ৰেক্ষিততে আজি আদালতত ৪৭ জন অভিযুক্ত হাজিৰ কৰা হয়।
কাৰ্বি আংলং জিলাৰ আৰক্ষীয়ে ডিফু কাৰাগাৰত থকা উক্ত হত্যাকাণ্ডৰ ৪৭ জন অভিযুক্তক ১৮ ছেপ্টেম্বৰত নগাঁৱলৈ আনি সেইদিনাই প্ৰথম আদালতত হাজিৰ কৰাইছিল। আদালতত হাজিৰ কৰোৱাৰ পিছত অভিযুক্তসকলক নগাঁও কেন্দ্ৰীয় কাৰাগাৰলৈ প্ৰেৰণ কৰা হয়। ইয়াৰ পিছত ১০ অক্টোবৰত দ্বিতীয় বাৰৰ বাবে আদালতত হাজিৰ কৰোৱাৰ লগতে ৮ নৱেম্বৰত শুনানিৰ তাৰিখ ধাৰ্য কৰিছিল।
উল্লেখ্য যে অভিজিৎ নাথ আৰু নীলোৎপল দাসৰ পিতৃ-মাতৃয়ে ডিফুৰ আদালতত গোচৰটোৰ বিচাৰ প্ৰক্ৰিয়া চলিলে অভিযুক্ত পক্ষৰ হেঁচাত ভূক্তভোগীয়ে সঠিক ন্যায় পোৱাৰ ক্ষেত্ৰত শংকা প্ৰকাশ কৰি গোচৰটোৰ বিচাৰ নগাঁও আদালতলৈ স্থানান্তৰ কৰাৰ বাবে আবেদন জনাইছিল।তাৰেই পৰিপ্ৰেক্ষিতত গোচৰটো নগাঁও আদালতলৈ স্থানান্তৰ কৰা হয়।
