মুখ্য মন্ত্ৰী সৰ্বানন্দ সোণোৱাল আৰু বিত্ত মন্ত্ৰী হিমন্ত বিশ্ব শৰ্মাৰ জিলাখনলৈ প্ৰস্তাৱিত ভ্ৰমণৰ বিৰুদ্ধে প্ৰতিবাদ জনাই বড়োলেণ্ড জনজাতি সুৰক্ষা মঞ্চ(বিজেএছএম)আৰু আন কেইবাটাও জনজাতীয় সংগঠনে আজিৰে পৰা তিনিদিনীয়া কোকৰাঝাৰ জিলা বন্ধৰ আহ্বান দিছে।
বিজেএছএমৰ সভাপতি জনকলাল বসুমতাৰীয়ে কয় যে বৰ্তমান ৰাজ্য চৰকাৰে ‘বি টি আৰ’ আৰ্হিত স্বাক্ষৰিত তথাকথিত নতুন বড়ো চুক্তিৰ ৰূপায়নৰ দ্বাৰা বিটিএডি আৰু বিটিচি ভংগ কৰাৰ এক ধ্বংসকাৰী তথা দুৰ্ভাগ্যজনক প্ৰচেষ্টা চলাইছে।
চুক্তিখনক এক ‘অসাৰ্থক’ বুলি অভিহিত কৰি তেওঁ কয় যে ইয়াৰ দ্বাৰা খিলঞ্জীয়া বড়ো জনজাতি লোকসকলৰ এখন সুকীয়া ৰাজ্যৰ ৫০ বছৰীয়া পুৰণি যুক্তিসংগত দাবীক মষিমূৰ কৰাৰ বাবে এটা নতুন ৰাজনৈতিক অভিসন্ধি কৰা হৈছে।
এক বিবৃতিত তেওঁ কয় যে জনজাতীয় সংগঠনসমূহে ৰাজ্য চৰকাৰৰ এনে নিৰ্ণায়ক ৰাজনৈতিক ষড়যন্ত্ৰৰ প্ৰবল বিৰোধিতা কৰিছে।
বসুমতাৰীয়ে লগতে কয় যে যোৱা ৭ অক্টোবৰত অসম চৰকাৰৰ কেবিনেটে সংবিধানৰ ৩৪৫ অনুচ্ছেদৰ অধীনত ৰাজ্য ভাষাৰ মৰ্যাদা প্ৰদানৰ পৰিৱৰ্তে বড়ো ভাষাক অসমৰ সহযোগী ভাষা হিচাপে গ্ৰহণ কৰি জাননী জাৰি কৰাৰ তীব্ৰ বিৰোধিতা কৰিছে জনজাতীয় সংগঠনসমূহে।
তেওঁ কয় যে তেওঁলোকে অসম চৰকাৰৰ এক অনিৰ্দিষ্টকাললৈ বিটিচিৰ নিৰ্বাচন পিছুওৱাৰ কৌশল তথা বিটিএডিত ৰাজ্যপালৰ শাসন বৃদ্ধি কৰাৰ প্ৰৱণতাৰো তীব্ৰ বিৰোধিতা কৰিছে।
দ্য অল বডো টেৰিটৰিছ ট্ৰাইবেল অ’ৰ্গেনাইজেশ্যনছ, নেশ্যনেল কো-অ’ৰ্ডিনেশ্যন কমিটি, অল বডো পিপুলছ চিভিল ছচাইটি , অল আছাম মংগলইড অৰিজিন ট্ৰাইবেল অ’ৰ্গেনাইজেশ্যন কনফেডাৰেশ্যন, অল ইণ্ডিয়া মংগলইড অৰিজিন ইণ্ডিজেনাছ ট্ৰাইবেল পিপুলছ কনফেডাৰেশ্যনে বন্ধলৈ সমৰ্থন আগবঢ়াইছে।
