প্ৰাক্তন মুখ্য মন্ত্ৰী তৰুণ গগৈৰ চিতাভষ্ম লৈ এখন সুসজ্জিত বাহনেৰে আজি গুৱাহাটীৰ পৰা আৰম্ভ হৈছে শান্তি সদ্ভাৱনা যাত্ৰা।
১২ ডিচেম্বৰ পৰ্যন্ত ৰাজ্যৰ বিভিন্ন প্ৰান্ত ভ্ৰমণ কৰিবলগীয়া এই যাত্ৰা পথত আজি বিয়লি প্ৰাক্তন মুখ্য মন্ত্ৰীগৰাকীৰ পত্নী ডলি গগৈ, সাংসদ পুত্ৰ গৌৰৱ গগৈ, জীয়ৰী চন্দিমা গগৈ সহ পৰিয়ালবৰ্গ আৰু কংগ্ৰেছৰ বহুসংখ্যক নেতা-কৰ্মীৰ এটা সজাতি দলে নগাঁও চহৰৰ ৰাজীৱ ভৱনত উপস্থিত হয়।
জিলা ৰাজীৱ ভৱনলৈ এই সজাতি দলটোক গায়ন বায়নেৰে আদৰণি জনোৱা হয়। পিছত জিলা কংগ্ৰেছৰ উদ্যোগত অনুষ্ঠিত শ্ৰদ্ধাঞ্জলি অনুষ্ঠান।
সজাতি দলটোৰ লগতে দলীয় নেতা-কৰ্মীসকলকে ধৰি অজস্ৰ লোকে প্ৰয়াত মুখ্যমন্ত্ৰী গৰাকীলৈ শ্ৰদ্ধা জ্ঞাপন কৰে।
উক্ত অনুষ্ঠানত অংশগ্ৰহণ কৰাৰ পিছত প্ৰাক্তন সাংসদ গৌৰৱ গগৈয়ে সংবাদ মাধ্যমৰ আগত কয়, “জননেতা তৰুণ গগৈৰ স্মৃতিত ৰাজ্যজুৰি শান্তি আৰু সদভাৱনা অনুষ্ঠানৰ আয়োজন কৰা হৈছে। তৰুণ গগৈ যদিও আমাৰ মাজত শাৰীৰিক ভাৱে নাই, তথাপিও আমি চৌদিশে তেওঁৰ হাহি দেখা পাও। সাধাৰণ ৰাইজৰ তেওঁৰ প্ৰতি থকা শ্ৰদ্ধা আৰু মৰমৰ পৰিৱেশ আজিও দেখা গৈছে।”
জিলা কংগ্ৰেছ ভৱনত শ্ৰদ্ধাঞ্জলি অনুষ্ঠান উপলক্ষে সৰ্বধৰ্ম প্ৰাৰ্থনা সভা অনুষ্ঠিত হয়।
তদুপৰি, তৰুণ গগৈ ছবি সম্বলিত এখন চিত্ৰ প্ৰদৰ্শনী মুকলি কৰে কবি ডাঃ প্ৰয়াগ শইকীয়াই। লগতে প্ৰাক্তন মন্ত্ৰী ৰকিবুল হুছেইনৰ সম্পাদিত “শ্ৰদ্ধাৰ পৰা শ্ৰদ্ধাঞ্জলি : ফটোৱে কথা কয়”- শীৰ্ষক এক গ্ৰন্থ উন্মোচন কৰা হয়।
গ্ৰন্থখন উন্মোচন কৰে শিক্ষাবিদ ডঃ খৰ্গেশ্বৰ ভূঞাই।
ইয়াৰ পিছতে তৰুণ গগৈৰ তিনিখন তথ্যচিত্ৰ ক্ৰমে “জন্মৰ পৰা মৃত্যুলৈ” মুকলি কৰে ডলি গগৈয়ে, “২০১১ৰ পৰা ২০১৬লৈ গগৈৰ কৰ্মৰাজি” মুকলি কৰে চন্দিমা গগৈয়ে আৰু “২০১৬ৰ পৰা মৃত্যুলৈকৈ বিৰোধীৰ ভুমিকাত গগৈ” মুকলি কৰে গৌৰৱ গগৈয়ে।
জিলা কংগ্ৰেছৰ সভাপতি তপন কুমাৰ শৰ্মাই আঁত ধৰা অনুষ্ঠানত সাংসদ প্ৰদ্যুৎ বৰদলৈ, বিধায়ক নুৰুল হুদা, প্ৰাক্তন বিধায়ক ডাঃ দুৰ্লভ চমুৱা, কংগ্ৰেছ নেতা ক্ৰমে সুৰেশ বৰা, শান্তনু শৰ্মাকে ধৰি সহস্ৰাধিক কংগ্ৰেছ নেতা-কৰ্মীয়ে অংশগ্ৰহণ কৰে।
ইপিনে, জিলাখনৰ বিভিন্ন স্থানত তৰুণ গগৈৰ স্মৃতিত শ্ৰদ্ধাঞ্জলি অনুষ্ঠান অনুষ্ঠিত হয়।
সন্ধিয়াৰ ভাগত সজাতি দলটোক তিতাবৰ অভিমুখী যাত্ৰা পথত ৩৭ নং ৰাষ্ট্ৰীয় ঘাইপথৰ উৰিয়াগাঁও বাইপাছ চকৰ ওচৰতো বঢ়মপুৰ যুৱ কংগ্ৰেছৰ তৰফৰ পৰা আদৰণি জনোৱাৰ লগতে কংগ্ৰেছৰ শতাধিক সদস্যই প্ৰয়াত তৰুণ গগৈক গভীৰ শ্ৰদ্ধাঞ্জলি জনায়।
