লোকসভা নিৰ্বাচনলৈ কেইটামান দিন বাকী থকা অৱস্থাত সঘনাই পট পৰিৱৰ্তন হ’বলৈ ধৰিছে উত্তৰ-পূবৰ ৰাজনীতি। ১৮ মাৰ্চত মেঘালয় আৰু অৰুণাচলৰ কেইবাজনো বিজেপি দলৰ নেতাই দলত্যাগ কৰাৰ পাছত আজি ত্ৰিপুৰা বিজেপিৰ উপ সভাপতি সুবল ভৌমিকৰ দলত্যাগে ৰাজনৈতিক মহলত ব্যাপক চৰ্চা লাভ কৰিছে।
পশ্চিম ত্ৰিপুৰা সমষ্টিৰ পৰা প্ৰতিদ্বন্দ্বিতা কৰিবলৈ মন মেলা ভৌমিকে ১৮ মাৰ্চৰ নিশা ত্ৰিপুৰা প্ৰদেশ কগ্ৰেছৰ অধ্যক্ষ প্ৰদ্যুৎ কিশোৰ মানিক্যৰ সৈতে হোৱা বৈঠকৰ অন্ততে বিজেপি এৰি কংগ্ৰেছত যোগদান কৰাৰ সিদ্ধান্ত গ্ৰহণ কৰে। উল্লেখ্য যে পশ্চিম ত্ৰিপুৰা সমষ্টিৰ পৰা কংগ্ৰেছে ভৌমিকক প্ৰাৰ্থিত্ব প্ৰদান কৰিব।
‘মই আজি কংগ্ৰেছ দলত যোগদান কৰিম। কাইলৈ খুমুলঙত অনুষ্ঠিত হ’ব লগীয়া কংগ্ৰেছৰ জনসভাত ৰাহুল গান্ধীয়ে মোৰ প্ৰাৰ্থিত্বৰ নাম ঘোষণা কৰিব’। ভৌমিকে ‘দা হিন্দু’ৰ আগত এই কথা সদৰী কৰে।
জানিব পৰা মতে সুবল ভৌমিকে তেওঁৰ সমৰ্থকসকলৰ সৈতে আজি কংগ্ৰেছত যোগদান কৰিব। ইফালে ভৌমিকৰ এই সিদ্ধান্তক প্ৰদেশ কংগ্ৰেছৰ সাধাৰণ সম্পাদক বাপ্তি চক্ৰৱৰ্তীয়ে আদৰণি জনাইছে।
উল্লেখ্য যে কিছু বছৰ পূৰ্বে দলীয় নেতৃত্বৰ ওপৰত ক্ষুন্ন হৈ কংগ্ৰেছ দল ত্যাগ কৰা প্ৰাক্তন বিধায়ক সুবল ভৌমিকে বিজেপিত যোগ দিয়াৰ পূৰ্বে এটা আঞ্চলিক ৰাজনৈতিক দলো গঠন কৰিছিল।