চলিত বছৰৰ শেষৰ ফালে ত্ৰিপুৰা মুকলিত মলত্যাগ মুক্ত (ODF) ৰাজ্য হিচাপে পৰিগণিত হ’বলৈ গৈ আছে। ২ অক্টোবৰত ৰাজ্যখনৰ মুখ্য মন্ত্ৰী বিপ্লব কুমাৰে দেবে এই কথা ঘোষণা কৰি হৈছে যে চলিত বৰ্ষৰ ৩১ ডিচেম্বৰৰ ভিতৰত ত্ৰিপুৰাক মুকলিত মলত্যাগ মুক্ত ৰাজ্য হিচাপে ঘোষণা কৰা হ’ব।
গান্ধী জয়ন্তী উপলক্ষে আগৰতলাৰ হৰিজন কলনিত উপস্থিত হৈ ‘স্মাৰ্ট টয়লেট’ প্ৰকল্প এটাৰ আধাৰশিলা স্থাপন অনুষ্ঠানত অংশগ্ৰহণ কৰি মুখ্য মন্ত্ৰী বিপ্লব দেবে এইদৰে কয়। তেওঁ কয়, ‘‘স্বচ্ছ ভাৰত অভিযানৰ অন্তৰ্গত ভাৰতক মুকলিত মলত্যাগ মুক্ত দেশ হিচাপে গঢ়ি তোলাৰ বাবে প্ৰধান মন্ত্ৰী নৰেন্দ্ৰ মোদীৰ যি সপোন তাৰ এটা অংশ হিচাপে চলিত বৰ্ষৰ শেষৰ ফালে ত্ৰিপুৰাক মুকলিত মলত্যাগমুক্ত ৰাজ্য হিচাপে গঢ়ি তোলাৰ লক্ষ্য নিৰ্ধাৰণ কৰা হৈছে।‘’
মুখ্য মন্ত্ৰীগৰাকীয়ে আৰু জনাইছে যে এই একেই লক্ষ্য আগত ৰাখি ৰাজ্য চৰকাৰে ৫০ টা ‘স্মাৰ্ট টয়লেট’ নিৰ্মাণ কৰা হ’ব। ইয়াৰে ২৫ টা গাঁও এলেকাত আৰু ২৫টা নগৰীয়া বস্তি অঞ্চলত নিৰ্মাণ কৰা হ’ব বুলি মুখ্য মন্ত্ৰী বিপ্লব দেবে জনাইছে। মুখ্য মন্ত্ৰীগৰাকীয়ে আৰু জনাইছে যে প্ৰতিটো টয়লেটত সৰ্বমুঠ ১৪ লাখ টকা ব্যয় হ’ব আৰু কেন্দ্ৰই প্ৰতিটো টয়লেটৰ বাবদ ৪ লাখ টকা যোগান ধৰিব আৰু আৰু ৰাজ্য চৰকাৰে বাকী ১০ লাখ টকাৰ ব্যয় বহন কৰিব।
তাৰোপৰি, সমগ্ৰ ত্ৰিপুৰাক মুকলিত মলত্যাগ মুক্ত ৰাজ্য হিচাপে গঢ়ি তোলাৰ বাবে ৰাজ্য আৰু কেন্দ্ৰ চৰকাৰৰ বিত্তীয় সাহায্যত কেইবা শ টয়লেট নিৰ্মাণ কৰা হৈছে বুলি মুখ্য মন্ত্ৰীজনে জনায়।
স্থানীয় বাসিন্দাসকলে মুখ্য মন্ত্ৰীয়ে তেওঋঁলোকৰ এলেকাটোলৈ অহাত আনন্দ প্ৰকাশ কৰি কৈছে যে চৰকাৰে টয়লেট নিৰ্মাণত সহায় কৰিলে তেওঁলোক যথেষ্ট উপকৃত হ’ব।
উল্লেখ্য যে স্বচ্ছ ভাৰত অভিযানৰ অন্তৰ্গত মুঠতে ১১খন ৰাজ্য আৰু কেন্দ্ৰীয় শাসিত এলেকাক মুকলিত মলত্যাগ মুক্ত এলেকা হিচাপে ঘোষণা কৰা হৈছে।
