শেহতীয়াকৈ পুণেত যোৱা ২৭ জানুৱাৰীৰ পৰা ৩১ জানুৱাৰীলৈ অনুষ্ঠিত হোৱা নেচনেল মাষ্টাৰ্ছ গেমছত অসমৰ সুসন্তান তথা বিশিষ্ট চিকিৎসক ডাঃ অনিন্দিতা প্ৰিয়দৰ্শিনী দাসে পাৱাৰ লিফটিঙত সোণৰ পদক অৰ্জন কৰি ৰাজ্যখনলৈ গৌৰৱ কঢ়িয়াই আনিছে। এগৰাকী সফল চিকিৎসক হোৱাৰ লগতে ক্ৰীড়া জগততো নিজৰ পাৰদৰ্শিতা প্ৰদৰ্শন কৰি তেওঁ বৰ্তমান সময়ত বহু লোকৰ বাবে অনুপ্ৰেৰণাৰ উৎস হৈ পৰিছে। এই সাফল্যই তেওঁৰ ক্ৰীড়া জীৱনত আন এক সোণালী অধ্যায় সংযোজন কৰিছে।
ডাঃ অনিন্দিতা প্ৰিয়দৰ্শিনী দাসৰ ক্ৰীড়া যাত্ৰা অত্যন্ত প্ৰশংসনীয়। ইয়াৰ পূৰ্বেও তেওঁ ২০১৯ চনত চেন্নাইত অনুষ্ঠিত ৰাষ্ট্ৰীয় মাষ্টাৰ্ছ পাৱাৰ লিফটিং প্ৰতিযোগিতাত সোণৰ পদক লাভ কৰি ষ্ট্ৰং অ’মেন অৱ ইণ্ডিয়া খিতাপ দখল কৰিছিল। সেই একেই বৰ্ষতে কানাডাত অনুষ্ঠিত কমনৱেলথ পাৱাৰ লিফটিং প্ৰতিযোগিতাতো তেওঁ সোণৰ পদক লাভ কৰি দেশলৈ সন্মান কঢ়িয়াই আনিছিল। ২০২০ চনত মুম্বাইত অনুষ্ঠিত ৰাষ্ট্ৰীয় প্ৰতিযোগিতাত তেওঁ পুনৰ সোণৰ পদক আৰু ষ্ট্ৰং অ’মেন অৱ ইণ্ডিয়াৰ খিতাপ অৰ্জন কৰে। ২০২১ চনত ইস্তানবুলত অনুষ্ঠিত এছিয়ান পাৱাৰ লিফটিং প্ৰতিযোগিতাতো তেওঁ সোণৰ পদক জিকিবলৈ সক্ষম হৈছিল।
বৃত্তিগত দিশত ডাঃ দাস এগৰাকী অতি উচ্চ শিক্ষিত আৰু অভিজ্ঞ চিকিৎসক। তেওঁ ১৯৯০ চনত গুৱাহাটী চিকিৎসা মহাবিদ্যালয়ৰ পৰা এম বি বি এছ ডিগ্ৰী লাভ কৰিছিল আৰু ১৯৯৬ চনত তাৰ পৰাই স্নাতকোত্তৰ ডিগ্ৰী সম্পূৰ্ণ কৰে। ইয়াৰ উপৰিও তেওঁ মাতৃ আৰু শিশু স্বাস্থ্যৰ বিশেষ ফেলশ্বিপ লাভ কৰাৰ লগতে ভাৰতীয় মেনোপজ ছ’চাইটিৰ পৰা স্বীকৃত চিকিৎসক হিচাপেও কাম কৰি আছে। তেওঁ জাৰ্মানী আৰু ভাৰতৰ বিভিন্ন আগশাৰীৰ প্ৰতিষ্ঠানৰ পৰা নান্দনিক স্ত্ৰী-ৰোগ চিকিৎসা আৰু এণ্টি-এজিং মেডিচিনৰ দৰে আধুনিক চিকিৎসা পদ্ধতিৰ ওপৰতো বিশেষ শিক্ষা গ্ৰহণ কৰিছে।
নিজৰ অসাধাৰণ কৃতিত্বৰ বাবে তেওঁ ইতিমধ্যে বহুকেইটা গুৰুত্বপূৰ্ণ বঁটা আৰু সন্মানেৰে বিভূষিত হৈছে। ইয়াৰ ভিতৰত ষ্ট্ৰং অ’মেন অৱ ইণ্ডিয়া, ওমেন অৱ দ্য ইয়াৰ এৱাৰ্ড, গ্ল’বেল ছুপাৰ এচিভাৰ্ছ এৱাৰ্ড আৰু ক্ৰীড়া ক্ষেত্ৰত আগবঢ়োৱা অৱদানৰ বাবে লাভ কৰা বিজু ফুকন স্বীকৃতি বঁটা অন্যতম। লগতে তেওঁক ষ্ট্ৰং অ’মেন অৱ আছাম আৰু স্বাস্থ্য তথা ফিটনেছৰ ক্ষেত্ৰত আগবঢ়োৱা নেতৃত্বৰ বাবে এছিয়ান আইকনিক ওমেন লিডাৰ বঁটাৰে সন্মানিত কৰা হৈছে। এগৰাকী মাতৃ, সফল চিকিৎসক আৰু আন্তঃৰাষ্ট্ৰীয় পৰ্যায়ৰ খেলুৱৈ হিচাপে তেওঁ প্ৰমাণ কৰিছে যে দৃঢ় ইচ্ছা থাকিলে যিকোনো বয়সতে সফলতা লাভ কৰা সম্ভৱ।
