প্ৰাক্তন সেনা মুৰব্বী জেনেৰেল এম এম নাৰৱণেৰ অপ্ৰকাশিত স্মৃতিগ্ৰন্থক লৈ সৃষ্টি হোৱা বিতৰ্কই এতিয়া তীব্ৰ ৰূপ ধাৰণ কৰিছে। জেনেৰেল নাৰৱণেৰ ফ’ৰ ষ্টাৰছ অৱ ডেষ্টিনী নামৰ কিতাপখনক লৈ শেহতীয়াকৈ দিল্লী আৰক্ষীয়ে ইয়াৰ প্ৰকাশক সংস্থা পেংগুইন ৰেণ্ডম হাউছ ইণ্ডিয়ালৈ এক জাননী প্ৰেৰণ কৰিছে। এই সমগ্ৰ ঘটনাৰ সূত্রপাত হৈছিল যেতিয়া ৰাহুল গান্ধীয়ে সংসদত এই অপ্ৰকাশিত গ্ৰন্থখনৰ কিছু অংশ উদ্ধৃতি দি চৰকাৰক সমালোচনা কৰিছিল। ইয়াৰ পিছতে কেনেকৈ এখন অপ্ৰকাশিত কিতাপ ৰাহুল গান্ধীৰ হাতত পৰিল, সেই লৈ আৰক্ষীয়ে তদন্ত আৰম্ভ কৰিছে।
দিল্লী আৰক্ষীৰ বিশেষ কোষে এই গ্ৰন্থখন ফাদিল হোৱাৰ আঁৰত কোনো অপৰাধমূলক ষড়যন্ত্ৰ আছে নেকি সেই সন্দৰ্ভত এটা গোচৰ ৰুজু কৰিছে। জাননীখনত প্ৰকাশক সংস্থাটোক তদন্তত সহায় কৰিবলৈ আৰু কিতাপখনৰ পাণ্ডুলিপি কেনেকৈ ৰাজহুৱা হ’ল সেই বিষয়ে উত্তৰ দিবলৈ কোৱা হৈছে। উল্লেখযোগ্য যে লোকসভাত ৰাহুল গান্ধীয়ে এই কিতাপখনৰ উদ্ধৃতি দি ২০২০ চনৰ ভাৰত-চীন সীমান্তৰ উত্তেজনাৰ সময়ত কেন্দ্ৰীয় চৰকাৰৰ ভূমিকাৰ ওপৰত প্ৰশ্ন উত্থাপন কৰিছিল। গান্ধীয়ে অভিযোগ কৰিছিল যে সেই সময়ত চৰকাৰে সেনাৰ ওপৰত কোনো স্পষ্ট নিৰ্দেশ দিয়া নাছিল।
অৱশ্যে বিজেপি আৰু প্ৰতিৰক্ষা মন্ত্ৰী ৰাজনাথ সিঙে সংসদত এই কথাক তীব্ৰ বিৰোধিতা কৰিছে। তেওঁলোকৰ মতে যিখন কিতাপ এতিয়ালৈকে প্ৰকাশেই হোৱা নাই, সেইখনৰ উদ্ধৃতি সংসদত দিয়াটো উচিত নহয়। অধ্যক্ষ ওম বিৰলায়ো ৰায় দিছে যে যিহেতু গ্ৰন্থখন এতিয়াও অপ্ৰকাশিত আৰু ইয়াৰ সত্যতা প্ৰমাণিত হোৱা নাই, সেয়েহে ইয়াৰ উদ্ধৃতি গ্ৰহণযোগ্য নহয়। ইয়াৰ উত্তৰত ৰাহুল গান্ধীয়ে সংসদৰ চৌহদত কিতাপখনৰ এটা কপি দেখুৱাই চৰকাৰৰ দাবী খণ্ডন কৰাৰ চেষ্টা কৰে আৰু কিতাপখন প্ৰধানমন্ত্ৰীক উপহাৰ দিয়াৰ কথাও কয়।
পেংগুইন ৰেণ্ডম হাউছ ইণ্ডিয়াই এক স্পষ্টীকৰণ দি জনাইছে যে কিতাপখন এতিয়াও প্ৰতিৰক্ষা মন্ত্ৰালয়ৰ অনুমোদনৰ বাবে ৰৈ আছে আৰু ই বজাৰলৈ অহা নাই। তেওঁলোকে সতৰ্ক কৰি দিছে যে কিতাপখনৰ কোনো ধৰণৰ কপি বা পিডিএফ প্ৰচাৰ কৰাটো আইনমতে দণ্ডনীয় হ’ব। জেনেৰেল নাৰৱণেও প্ৰকাশকৰ কথাতে সন্মতি জনাইছে। আনহাতে ৰাহুল গান্ধীয়ে যুক্তি দিছে যে কিতাপখন অনলাইনত ইতিমধ্যে প্ৰি-অৰ্ডাৰৰ বাবে উপলব্ধ আছিল। বৰ্তমান এই সমগ্ৰ বিষয়টোক লৈ ৰাজনৈতিক আৰু আইনী প্ৰক্ৰিয়া অধিক জটিল হৈ পৰিছে।
