আমেৰিকা যুক্তৰাষ্ট্ৰ আৰু ইজৰাইলৰ সৈতে ইৰাণৰ চলি থকা যুদ্ধ সদৃশ পৰিস্থিতিৰ মাজতে শান্তি আলোচনাৰ প্ৰক্ৰিয়াক লৈ আমেৰিকাৰ ৰাষ্ট্ৰপতি ডনাল্ড ট্ৰাম্পে এক তাৎপৰ্যপূৰ্ণ মন্তব্য প্ৰকাশ কৰিছে। শুকুৰবাৰে ৰাষ্ট্ৰপতিগৰাকীয়ে স্পষ্ট কৰি দিয়ে যে যদিহে অহা বুধবাৰৰ ভিতৰত ইৰাণৰ সৈতে যুদ্ধ সমাপ্ত কৰাৰ বাবে কোনো দীৰ্ঘম্যাদী চুক্তিত উপনীত হ’ব পৰা নাযায়, তেন্তে বৰ্তমান বাহাল থকা ১০ দিনীয়া যুদ্ধবিৰতিৰ অন্ত পৰিব। লগতে তেওঁ সকীয়াই দিয়ে যে চুক্তি বিফল হ’লে ইৰাণৰ বন্দৰসমূহত চলি থকা অবৰোধ অব্যাহত থকাৰ উপৰিও আমেৰিকাই পুনৰ বোমা বৰ্ষণ আৰম্ভ কৰিবলৈ বাধ্য হ’ব। ইজৰাইল আৰু লেবাননৰ মাজত স্বাক্ষৰিত যুদ্ধবিৰতিৰ পাছতেই মধ্যপ্ৰাচ্যত শান্তি প্ৰতিষ্ঠাৰ বাবে চলি থকা প্ৰয়াসৰ মাজতে ট্ৰাম্পৰ এই মন্তব্যই আন্তঃৰাষ্ট্ৰীয় ৰাজনীতিত তীব্ৰ চাঞ্চল্যৰ সৃষ্টি কৰিছে।
শেহতীয়া শান্তি প্ৰক্ৰিয়াৰ অংশ হিচাপে ইৰাণে বাণিজ্যিক জাহাজৰ চলাচলৰ বাবে অতি গুৰুত্বপূৰ্ণ হৰমুজ প্ৰণালী সম্পূৰ্ণৰূপে মুকলি কৰি দিয়া বুলি শুকুৰবাৰে ঘোষণা কৰিছিল। বিশ্বৰ ২০ শতাংশ খাৰুৱা তেলৰ সৰবৰাহ এই জলপথেৰেই সম্পন্ন হয়। অৱশ্যে, ইৰাণে একে সময়তে সতৰ্ক কৰি দিছে যে যদিহে আমেৰিকাই ইৰাণৰ জাহাজ আৰু বন্দৰসমূহৰ ওপৰত আৰোপ কৰা অবৰোধ উঠাই নলয়, তেন্তে তেওঁলোকে পুনৰ এই প্ৰণালী বন্ধ কৰি দিব। আনহাতে, ট্ৰাম্পে স্পষ্ট কৰি দিছে যে ইৰাণৰ পাৰমাণৱিক কাৰ্যসূচীকে ধৰি সকলো বিষয় সামৰি এখন সম্পূৰ্ণ চুক্তি নোহোৱালৈকে আমেৰিকাৰ নৌসেনাই এই অবৰোধ কোনো কাৰণতে প্ৰত্যাহাৰ নকৰে।
ট্ৰাম্পে সাংবাদিকৰ আগত প্ৰকাশ কৰা অনুসৰি, এই সপ্তাহান্তিকত দুয়োখন দেশৰ মাজত আলোচনা অব্যাহত থাকিব আৰু তেওঁ এখন সফল চুক্তি হোৱাৰ ক্ষেত্ৰত আশাবাদী। তেওঁ লগতে উল্লেখ কৰে যে ইৰাণৰ সৈতে আমেৰিকাৰ বিশেষ কোনো ডাঙৰ পাৰ্থক্য বা মতানৈক্য বৰ্তমান নাই। এই যুদ্ধবিৰতি আৰু হৰমুজ প্ৰণালী মুকলি হোৱাৰ ফলশ্ৰুতিত এমাহৰো অধিক কাল ধৰি বন্ধ হৈ থকা ইৰাকৰ খাৰুৱা তেলৰ ৰপ্তানি পুনৰ আৰম্ভ হৈছে। ইপিনে, যুদ্ধৰ ফলত বিশ্বৰ বজাৰত তেলৰ মূল্যবৃদ্ধি নিয়ন্ত্ৰণ কৰিবলৈ আমেৰিকাৰ শক্তি বিভাগে কৌশলগত পেট্ৰ’লিয়াম ৰিজাৰ্ভৰ (SPR) পৰা তৃতীয় পৰ্যায়ত ২৬.০৩ মিলিয়ন বেৰেল খাৰুৱা তেল বিভিন্ন কোম্পানীক ধাৰলৈ দিয়াৰ কথা ঘোষণা কৰিছে।
