আমেৰিকাৰ ৰাষ্ট্ৰপতি ড’নাল্ড ট্ৰাম্পৰ কথা শুনি ভাৰতে সঁচাকৈয়ে ৰাছিয়াৰ পৰা তেল ক্ৰয় কৰা বন্ধ কৰিবনে নাই, সেই লৈ এতিয়াও প্ৰশ্নসমূহ আঁতৰা নাই। শেহতীয়াকৈ আমেৰিকাৰ সৈতে হোৱা বাণিজ্য চুক্তিৰ পাছত নতুন দিল্লীয়ে ৰাছিয়াৰ তেলৰ ক্ষেত্ৰত কি পদক্ষেপ ল’ব, তাক লৈ দেশজুৰি তীব্ৰ চৰ্চা চলিছে। বৈদেশিক পৰিক্ৰমা মন্ত্ৰালয়ে এই বিষয়ত যি উত্তৰ দিছে, সি সকলোৰে কৌতুহল হে বৃদ্ধি কৰিলে। কেন্দ্ৰীয় চৰকাৰে এই গুৰুত্বপূৰ্ণ প্ৰশ্নটোৰ এটা স্পষ্ট উত্তৰ দিয়াৰ পৰা কৌশলে বিৰত থকা পৰিলক্ষিত হৈছে।
ভাৰতীয় সামগ্ৰীৰ ওপৰত আমেৰিকাই আৰোপ কৰা শুল্ক হ্ৰাসৰ আঁৰত এটা বিশেষ চৰ্ত আছিল যে ভাৰতে ৰাছিয়াৰ তেল ক্ৰয় কৰা বন্ধ কৰিব লাগিব। আমেৰিকাৰ ৰাষ্ট্ৰপতি ট্ৰাম্পে দাবী কৰিছে যে ভাৰতে এই প্ৰতিশ্ৰুতি দিয়াৰ বাবেই তেওঁলোকে শুল্কৰ হাৰ হ্ৰাস কৰিছে। কিন্তু ভাৰত চৰকাৰে এতিয়ালৈকে এই সন্দৰ্ভত কোনো মুকলি মন্তব্য কৰা নাই। শনিবাৰে বাণিজ্য মন্ত্ৰী পীয়ুষ গোৱালেও এই দায়িত্ব বৈদেশিক পৰিক্ৰমা মন্ত্ৰালয়ৰ ওপৰত জাপি দিছিল। সকলোৱে আশা কৰিছিল যে চৰকাৰে বিষয়টো স্পষ্ট কৰিব, কিন্তু বাস্তৱত তেনে নহ’ল।
বৈদেশিক পৰিক্ৰমা মন্ত্ৰালয়ৰ মুখপাত্ৰ ৰণধীৰ জয়ছৱালে জনাইছে যে চৰকাৰৰ প্ৰধান লক্ষ্য হ’ল দেশৰ ১৪০ কোটি জনতাৰ শক্তিৰ প্ৰয়োজনীয়তা পূৰণ কৰা। তেওঁ কয় যে ক’ৰ পৰা তেল ক্ৰয় কৰা হ’ব, সেয়া সম্পূৰ্ণৰূপে আন্তঃৰাষ্ট্ৰীয় বজাৰ আৰু পৰিস্থিতিৰ ওপৰত নিৰ্ভৰ কৰিব। চৰকাৰে এই পৰিৱৰ্তিত পৰিস্থিতি চাইহে সিদ্ধান্ত ল’ব বুলি জানিবলৈ দিছে। ইয়াৰ দ্বাৰা ভাৰতে নিজৰ স্বাৰ্থক অগ্ৰাধিকাৰ দিয়াৰ ইংগিত দিছে যদিও ট্ৰাম্পৰ দাবীৰ বিপৰীতে কোনো পোনপটীয়া প্ৰত্যাখ্যান কৰা নাই।
আনহাতে আমেৰিকাই ভাৰতৰ ওপৰত তীক্ষ্ণ নজৰ ৰখাৰ ব্যৱস্থা কৰিছে। ৰাষ্ট্ৰপতি ট্ৰাম্পে ইতিমধ্যে সতৰ্ক কৰি দিছে যে যদি ভাৰতে পুনৰ ৰাছিয়াৰ তেল ক্ৰয় কৰে, তেন্তে ভাৰতীয় সামগ্ৰীৰ ওপৰত পুনৰ ২৫ শতাংশ ‘শাস্তিমূলক শুল্ক’ জাপি দিয়া হ’ব। কেৱল সেয়াই নহয়, ভাৰতে গোপনে ৰাছিয়াৰ পৰা তেল আনিছে নেকি তাক নিৰীক্ষণ কৰিবলৈ তেওঁ নিজৰ দেশৰ বাণিজ্য আৰু বিদেশ বিভাগক নিৰ্দেশ দিছে। এই সমগ্ৰ পৰিস্থিতিয়ে ভাৰতৰ বৈদেশিক নীতি আৰু শক্তি সুৰক্ষাক এক কঠিন প্ৰত্যাহ্বানৰ মুখলৈ ঠেলি দিছে।
এনে এক সন্ধিক্ষণত ৰাছিয়াৰ স্থিতিও মন কৰিবলগীয়া। ক্ৰেমলিনে কৈছে যে ভাৰতে য’ৰ পৰাই তেল ক্ৰয় নকৰক কিয়, সেয়া তেওঁলোকৰ নিজৰ সিদ্ধান্ত। ৰাছিয়াৰ মতে ভাৰতে বহু উৎসৰ পৰা শক্তি সংগ্ৰহ কৰে আৰু ৰাছিয়া একমাত্ৰ যোগানকাৰী নহয়। এতিয়া ট্ৰাম্পৰ কঠোৰ স্থিতি আৰু দেশৰ প্ৰয়োজনীয়তাৰ মাজত মোডী চৰকাৰে কেনেধৰণে ভাৰসাম্য ৰক্ষা কৰে, সেয়া হ’ব আটাইতকৈ ডাঙৰ লক্ষ্যণীয় বিষয়।
