অসম চুক্তিৰ ছয় নং দফাৰ উচ্চ-স্তৰীয় কমিটিৰ প্ৰতিবেদন কেন্দ্ৰক অৰ্পণ কৰাৰ ক্ষেত্ৰত ৰাজ্য চৰকাৰৰ জীয়া ফাঁকি ধৰা পৰিছে সংসদৰ ৰাজ্যসভাৰ মজিয়াত।
যোৱা ফেব্ৰুৱাৰী মাহতে ৰাজ্যৰ মুখ্যমন্ত্ৰী, বিত্ত, অসম চুক্তি ৰূপায়ণ মন্ত্ৰী হিমন্ত বিশ্ব শৰ্মা আৰু কেবিনেট মন্ত্ৰীৰ উপস্থিতিত ৬ নং দফা ৰূপায়ণৰ বাবে কেন্দ্ৰীয় চৰকাৰে গঠন কৰি দিয়া উচ্চ-স্তৰীয় কমিটিয়ে প্ৰতিবেদন দাখিল কৰিছিল যদিও বৰ্তমানলৈকে দিছপুৰৰ আলমিৰাতে আৱদ্ধ হৈ আছে সেই প্ৰতিবেদন।
তাৰ পাছতো অসমৰ মুখ্য মন্ত্ৰী সৰ্বানন্দ সোণোৱালৰ অসমৰ জনসাধাৰণৰ প্ৰতি আহ্বান জনায় কয় ‘‘সকলোৱে আমাৰ ওপৰত আস্থা ৰাখক”।
‘উচ্চ-স্তৰীয় কমিটিয়ে চৰকাৰৰ হাতত প্ৰতিবেদন অৰ্পণ কৰিলে। চৰকাৰৰ হাতত অৰ্পণ কৰাৰ লগে লগে আমাৰ যিটো প্ৰতিশ্ৰুতি আমি দায়ৱদ্ধতাৰে পালন কৰিম।‘ সোণোৱালে সংবাদ মাধ্যমৰ আগত এইদৰে কয়।
ইপিনে, ৬ নং দফা কমিটিয়ে যিখিনি পৰামৰ্শ দিছে সেয়া পৰীক্ষা নীৰিক্ষা কৰি চৰকাৰে কাৰ্য ব্যৱস্থা হাতত ল’ব বুলি সোণোৱালে দাবী কৰে।
প্ৰশ্ন হয় ৰাইজে এতিয়া সোণোৱালে জনোৱা আহ্বানৰ প্ৰতি সঁহাৰি জনাই তেওঁক আস্থাত ল’ব নে?
যোৱা ৬ মাহ ধৰি কেন্দ্ৰীয় চৰকাৰৰ হাতত অসম চুক্তিৰ ৬ নং দফা সন্দৰ্ভত গঠন কৰি দিয়া উচ্চ-স্তৰীয় কমিটিৰ পৰামৰ্শৰ প্ৰতিবেদনখন কেন্দ্ৰীয় চৰকাৰৰ হাতত অৰ্পণ কৰিব নোৱাৰিলে সোণোৱাল নেতৃত্বাধীন বিজেপি চৰকাৰে।
তেনে পৰিপ্ৰেক্ষিতত কেনেকৈ মুখ্যমন্ত্ৰীগৰাকীৰ আহ্বানৰ প্ৰতি ৰাইজে সঁহাৰি জনাব বুলিও এক প্ৰশ্ন উত্থাপিত হৈছে।
উল্লেখযোগ্য যে, ৰাজ্য চৰকাৰৰ তৰফৰ পৰা জনোৱা হৈছিল যে অসম চুক্তিৰ ছয় নং দফা কাৰ্যকৰীকৰণৰ বাবে কেন্দ্ৰীয় গৃহ মন্ত্ৰণালয়ে গঠন কৰি দিয়া উচ্চ-স্তৰীয় কমিটিয়ে আগবঢ়োৱা প্ৰতিবেদন কেন্দ্ৰীয় গৃহ দপ্তৰক অৰ্পণ কৰা হৈছিল।
কিন্তু ৰাজ্যসভাত এগৰাকী সাংসদৰ প্ৰশ্নৰ লিখিত প্ৰশ্নোত্তৰত কেন্দ্ৰীয় গৃহ ৰাজ্যমন্ত্ৰীয়ে জনায় যে কেন্দ্ৰীয় গৃহ মন্ত্ৰণালয়ে গঠন কৰি দিয়া অসম চুক্তিৰ ছয় নং দফাৰ উচ্চ-স্তৰীয় কমিটিয়ে আগবঢ়োৱা প্ৰতিবেদন এতিয়াও ৰাজ্য চৰকাৰে ‘পৰীক্ষা’ কৰি আছে।
বিশেষকৈ ৰাজ্য চৰকাৰে কোনো ধৰণৰ পদক্ষেপ গ্ৰহণ নকৰাৰ অভিযোগ তুলি সদৌ অসম ছাত্ৰ সন্থাই প্ৰতিবেদনখন সংবাদ মাধ্যমৰ যোগে ৰাজহুৱা কৰাৰ পাছতে তুমুল প্ৰতিক্ৰিয়াৰ সৃষ্টি হৈছিল ৰাজ্যৰ ৰাজনীতিত। ইয়াকে লৈ মন্ত্ৰী ডঃ হিমন্ত বিশ্ব শৰ্মাই তীৰ্যক মন্তব্য কৰাও পৰিলিক্ষিত হৈছিল।
