আন্তঃৰাষ্ট্ৰীয় চলচ্চিত্ৰ মঞ্চত পুনৰ উজলি উঠিল অসমৰ যুৱ চলচ্চিত্ৰ নিৰ্মাতা মহৰ্ষি তুহীন কাশ্যপ। ইটালীৰ বাচিলিকাটাৰ পিষ্টিচিত অনুষ্ঠিত ২৭ সংখ্যক লুকাৰ্নিয়া চলচ্চিত্ৰ মহোৎসৱত তেওঁৰ প্ৰথম পূৰ্ণদৈৰ্ঘ্যৰ ছবি ‘কক কক ক’ক’ক’ৰ (Kok Kok Kokoook) বাবে লাভ কৰিছে সন্মানীয় ‘ছিক্ৰেট প্ৰগ্ৰেম ফেলিনি বঁটা’ (Secret Program Fellini) বঁটা। ইটালীৰ কিংবদন্তি চলচ্চিত্ৰ নিৰ্মাতা ফেডেৰিকো ফেলিনিৰ স্মৃতিত আৰু বিশ্ব চলচ্চিত্ৰলৈ তেওঁৰ চিৰস্থায়ী অৱদানৰ প্ৰতি শ্ৰদ্ধা জনাই এই বঁটা প্ৰদান কৰা হয়।
এই ছবিখন মহোৎসৱৰ ‘ছিক্ৰেট প্ৰগ্ৰেম’ৰ বাবে নিৰ্বাচিত হৈছিল, যাৰ নিৰ্বাচক আছিল আন্তঃৰাষ্ট্ৰীয়ভাৱে সমাদৃত ইৰাণী চলচ্চিত্ৰ নিৰ্মাতা মহচেন মখমলবাফ। ছবিখন প্ৰদৰ্শনৰ অন্তত মহচেন মখমলবাফে নিজেই কাশ্যপক এই বঁটা প্ৰদান কৰে। উল্লেখযোগ্য যে, লুকাৰ্নিয়া চলচ্চিত্ৰ মহোৎসৱৰ জৰিয়তেই এই ছবিখনে ইউৰোপত আত্মপ্ৰকাশ কৰে। ইয়াৰ পূৰ্বে ছবিখনৰ ৱৰ্ল্ড প্ৰিমিয়াৰ বুছান আন্তঃৰাষ্ট্ৰীয় চলচ্চিত্ৰ মহোৎসৱত অনুষ্ঠিত হোৱাৰ লগতে কেৰালা আৰু ঢাকা আন্তঃৰাষ্ট্ৰীয় চলচ্চিত্ৰ মহোৎসৱতো প্ৰদৰ্শিত হৈছিল।
সত্যজিৎ ৰায় ফিল্ম এণ্ড টেলিভিছন ইনষ্টিটিউটৰ (SRFTI) স্নাতক প্ৰকল্প হিচাপে নিৰ্মাণ কৰা এই ছবিখন চিকেন নামৰ এজন প্ৰব্ৰজিত কুকুৰা বিক্ৰেতাৰ কাহিনীক লৈ আধাৰিত। ঘটনাচক্ৰত চিকেনৰ প্ৰিয় আৰ এক্স ১০০ বাইকখন হেৰাই যায় আৰু ভুৱা আৰক্ষীৰ গোচৰত সাঙোৰ খাই পৰাৰ ভয়ত হতাশ হৈ পৰা চিকেনৰ যাত্ৰাই এনে এটা অদ্ভুত দিশ লয় য’ত তেওঁ নিজেই বাইকলৈ ৰূপান্তৰিত হয়। যাদু বাস্তৱবাদ আৰু সামাজিক বাৰ্তাৰ এক সুন্দৰ সংমিশ্ৰণেৰে নিৰ্মিত এই ছবিখনে অসম তথা ভাৰতৰ সমসাময়িক ৰাজনীতিৰ লগতে প্ৰব্ৰজিত শ্ৰমিকসকলৰ দুৰ্বলতা আৰু বাস্তৱ অভিজ্ঞতাক দাঙি ধৰিছে।
এই সাফল্য সন্দৰ্ভত সংবাদ মাধ্যমৰ আগত তুহীন কাশ্যপে কয়, “কিংবদন্তি চলচ্চিত্ৰ নিৰ্মাতা মহচেন মখমলবাফৰ দ্বাৰা আমাৰ ছবিখন নিৰ্বাচিত হোৱা আৰু তেওঁৰ হাতৰ পৰাই বঁটা গ্ৰহণ কৰাটো সঁচাকৈয়ে এক সপোন যেন অনুভৱ হৈছে। তেওঁৰ চলচ্চিত্ৰই মোক সদায় গভীৰভাৱে প্ৰভাৱিত আৰু অনুপ্ৰাণিত কৰি আহিছে।” তেওঁ এই বঁটাৰ শ্ৰেয় ছবিখনৰ সমগ্ৰ অভিনেতা-অভিনেত্ৰী আৰু কলা-কুশলীসকলক অৰ্পণ কৰে।
উল্লেখ্য যে, ‘কক কক ক’ক’ক’ কাশ্যপৰ প্ৰথম পূৰ্ণদৈৰ্ঘ্যৰ ছবি। ইয়াৰ পূৰ্বে তেওঁৰ চুটি ছবি ‘দ্য হৰ্ছ ফ্ৰম হেভেন’ ২০২৩ চনৰ অস্কাৰৰ অফিচিয়েল এণ্ট্ৰি হিচাপে নিৰ্বাচিত হোৱাৰ লগতে ভিজিআইকে চলচ্চিত্ৰ মহোৎসৱ, গোল্ডেন ৰেভেন চলচ্চিত্ৰ মহোৎসৱ আৰু বেংগালুৰু আন্তঃৰাষ্ট্ৰীয় চুটি চলচ্চিত্ৰ মহোৎসৱত শ্ৰেষ্ঠ ছবিৰ বঁটা লাভ কৰিবলৈ সক্ষম হৈছিল। ইয়াৰ উপৰি তেওঁৰ নন-ফিকচন ছবি ‘ফ্লাৱাৰ্ছ ইন এ হেইলষ্টৰ্ম’ জাপানৰ নাৰা আন্তঃৰাষ্ট্ৰীয় চলচ্চিত্ৰ মহোৎসৱত প্ৰদৰ্শিত হৈছিল।
