তুৰস্কত সংঘটিত এক মৰ্মান্তিক বিমান দুৰ্ঘটনাত লিবিয়াৰ সেনাধ্যক্ষ লেফটেনেণ্ট জেনেৰেল মহম্মদ আলী আহমেদ আল-হাদ্দাদকে ধৰি মুঠ ৮ জন লোকৰ মৃত্যু হোৱা বুলি জানিব পৰা গৈছে। লিবিয়াৰ প্ৰধানমন্ত্ৰী আব্দুল হামিদ দ্বেইবাহে এই মৰ্মান্তিক ঘটনাৰ কথা উল্লেখ কৰি ইয়াক দেশখনৰ বাবে এক অপূৰণীয় ক্ষতি বুলি অভিহিত কৰিছে।
প্ৰকাশিত বাতৰি অনুসৰি, ২৩ ডিচেম্বৰত লিবিয়াৰ প্ৰতিনিধি দলটোক কঢ়িয়াই নিয়া ‘ডাছল্ট ফেলকন-৫০‘ (Dassault Falcon 50) নামৰ ব্যক্তিগত জেট বিমানখনে তুৰস্কৰ ৰাজধানী আংকাৰাৰ এচেনবোগা বিমানবন্দৰৰ পৰা স্থানীয় সময় অনুসৰি সন্ধিয়া প্ৰায় ৫:১০ বজাত ট্ৰিপলি অভিমুখে উৰা মাৰিছিল। উৰণৰ কিছু সময়ৰ পিছতে বিমানখনত কাৰিকৰী বিজুতি দেখা দিয়াত পাইলটে জৰুৰীকালীন অৱতৰণৰ সংকেত প্ৰেৰণ কৰে। কিন্তু উৰণৰ প্ৰায় ৪২ মিনিটৰ পিছতে আংকাৰাৰ দক্ষিণৰ হাইমানা জিলাৰ ওপৰত বিমানখনৰ সৈতে যোগাযোগ বিচ্ছিন্ন হয়।
পৰৱৰ্তী সময়ত আংকাৰাৰ পৰা প্ৰায় ৭০ কিলোমিটাৰ দূৰত্বত অৱস্থিত কেচিক্কাভাক গাঁৱৰ ওচৰত বিমানখনৰ ধ্বংসাৱশেষ উদ্ধাৰ কৰা হয়। দুৰ্ঘটনাটোৰ সময়ত বিমানখনত লিবিয়াৰ সেনাধ্যক্ষৰ লগতে আন ৪ জন জ্যেষ্ঠ সামৰিক বিষয়া আৰু ৩ জন বিমানকৰ্মী আছিল। দুৰ্ভাগ্যবশতঃ বিমানখনত থকা আটাইকেইজন যাত্ৰীৰে থিতাতে মৃত্যু হয়।
এই দুৰ্ঘটনাৰ পিছতে সুৰক্ষাৰ খাতিৰত আংকাৰা বিমানবন্দৰৰ কাৰ্যসূচী সাময়িকভাৱে স্থগিত ৰখা হয় আৰু কেইবাখনো বিমানক অন্য বিমানবন্দৰলৈ ডাইভাৰ্ট কৰা হয়। তুৰস্কৰ গৃহমন্ত্ৰী আলী য়েৰলিকায়াই জনোৱা মতে, দুৰ্ঘটনাৰ প্ৰকৃত কাৰণ জানিবলৈ ইতিমধ্যে তদন্ত আৰম্ভ কৰা হৈছে।
উল্লেখযোগ্য যে, মহম্মদ আলী আহমেদ আল-হাদ্দাদ পশ্চিম লিবিয়াৰ সেনাধ্যক্ষ আছিল আৰু দেশখনৰ বিভক্ত সামৰিক বাহিনীক একত্ৰিত কৰাৰ ক্ষেত্ৰত তেওঁ গুৰুত্বপূৰ্ণ ভূমিকা পালন কৰিছিল।
