তামিলনাডুৰ নিৰ্বাচনৰ পিছৰ ৰাজনীতিত চৰম অস্থিৰতাৰ সৃষ্টি হৈছে। অভিনেতা বিজয়ৰ দল তামিলাগা ভেত্ৰী কাঝাগামে স্পষ্ট কৰি দিছে যে যদি ডি এম কে বা এ আই এ ডি এম কেয়ে চৰকাৰ গঠন কৰিবলৈ চেষ্টা কৰে তেন্তে তেওঁলোকৰ দলৰ সকলো বিধায়কে একেলগে পদত্যাগ কৰিব।
এফালে বিজয়ে যেতিয়া কংগ্ৰেছ আৰু অন্যান্য ৰাজনৈতিক দলৰ সমৰ্থনত চৰকাৰ গঠনৰ চেষ্টা চলাইছে, সেই সময়তে তেওঁলোকৰ এই ঘোষণাই তামিলনাডুৰ ৰাজনীতিত আলোড়নৰ সৃষ্টি কৰিছে।
টিভিকেই অভিযোগ কৰিছে যে তামিলনাডুৰ পৰম্পৰাগত দ্ৰাবিড় দল দুটা – ডিএমকে আৰু এআইএডিএমকেয়ে ‘গোপনে’ চৰকাৰ গঠনৰ চেষ্টা চলাইছে। ইয়াৰ দ্বাৰা ৰাজ্যবাসীয়ে দিয়া জনসমৰ্থনক অসন্মান কৰা হৈছে বুলি দাবী কৰে।
নির্বাচনত টিভিকে ১০৮খন আসন লাভ কৰাৰ বিপৰীতে বিজয়ে নিজেই দুখন আসন লাভ কৰে৷ এতিয়া দলটোৰ ১০৭ জন বিধায়ক। সংখ্যাগৰিষ্ঠতা পাবলৈ ১১৮খন আসনৰ প্ৰয়োজন। ফলত টিভিকেক চৰকাৰ গঠন কৰিবলৈ এতিয়াও ১০খন আসনৰ প্ৰয়োজন। ইতিমধ্যে কংগ্ৰেছে সমৰ্থন প্ৰকাশ কৰিছে, কংগ্ৰেছৰ পাঁচজন বিধায়ক। টিভিকেই বাওঁ শিবিৰ আৰু আন কেইবাটাও সৰু সৰু দলৰ সৈতে আলোচনা অব্যাহত ৰাখিছে।
এনে পৰিস্থিতিত নতুন অচলাৱস্থাৰ সৃষ্টি হৈছে। বুধবাৰে পুৱা বিজয়ে ৰাজ্যপাল আৰ ভি আৰ্লেকাৰক সাক্ষাৎ কৰি চৰকাৰ গঠনৰ দাবী জনায়। কিন্তু ৰাজ্যপালে স্পষ্টকৈ উল্লেখ কৰে যে টিভিকেৰ প্ৰয়োজনীয় সংখ্যাগৰিষ্ঠতা নাই। বিজয়ে সংখ্যাগৰিষ্ঠতাত উপনীত হ’বলৈ যি পৰিকল্পনা ৰূপৰেখা দাঙি ধৰিছিল, সেই পৰিকল্পনাতো তেওঁ সন্মতি প্ৰকাশ কৰা নাছিল।
ৰাজভৱনে জনোৱা মতে, “প্ৰত্যাশিত সংখ্যাগৰিষ্ঠতাৰ কোনো প্ৰমাণ নাই, গতিকে চৰকাৰ গঠনৰ দাবী মানি ল’ব নোৱাৰি।” ১১৮জন বিধায়কৰ স্বাক্ষৰসহ এখন পত্ৰ দাখিল কৰিব লাগিব বুলিও ৰাজ্যপালগৰাকীয়ে জানিবলৈ দিয়ে।
ইফালে ডি এম কেৰ ভিতৰতো কাৰ্যকলাপ বৃদ্ধি পাইছে। দলৰ বৈঠকত চাৰিটা প্ৰস্তাৱ গৃহীত হয়। ইয়াৰে এটা হৈছে দলৰ নেতা এম কে ষ্টেলিনক ‘জৰুৰীকালীন পৰিস্থিতিত সিদ্ধান্ত’ ল’বলৈ সম্পূৰ্ণ ক্ষমতা দিয়া। ডি এম কেয়ে কয় যে তেওঁলোকৰ মূল লক্ষ্য হৈছে নতুন নিৰ্বাচন এৰাই চলি ৰাজ্যখনত এখন সুস্থিৰ চৰকাৰ গঠন কৰা, যাতে ‘সাম্প্ৰদায়িক শক্তি’য়ে সুযোগ নাপায়। লগতে ডি এম কেৰ সকলো বিধায়কক চেন্নাইত থাকিবলৈ নিৰ্দেশ দিছে।
মুঠতে ৰাজনৈতিক সমীকৰণৰ এক আকৰ্ষণীয় হিচাপ-নিকাচ এতিয়া তামিলনাডুত চলি আছে। কোনে চৰকাৰ গঠন কৰিব, সংখ্যাগৰিষ্ঠতা কেনেকৈ প্ৰমাণিত হ’ব—ৰাজ্যৰ জনসাধাৰণে তালৈকে চাই আছে।
