মহাৰাষ্ট্ৰত গুলীৰ সংঘৰ্ষত নিহত হৈছে ১২জন মাওবাদী। আনহাতে, এই সংঘৰ্ষত এজন জোৱান আৰু এজন আৰক্ষী কৰ্মী আহত হয়। খবৰ অনুসৰি বুধবাৰে বিয়লিৰ পৰা আৰম্ভ হোৱা এই এনকাউণ্টাৰ এতিয়াও দীৰ্ঘসময় ধৰি চলিছিল।
এই সন্দৰ্ভত মুখ খুলিছে ৰাজ্যখনৰ উপ-মুখ্যমন্ত্ৰী দেৱেন্দ্ৰ ফাড়নভিছে। কমাণ্ডো বাহিনীৰ এই সফলতাৰ বাবে তেওঁ ইতিমধ্যে ৫১ লাখ টকাৰ পুৰস্কাৰৰ কথা ঘোষণা কৰিছে।
জানিব পৰা মতে, গাডচিৰ’লিত আত্মগোপন কৰি থকা মাওবাদীৰ তথ্য লাভ কৰি বুধবাৰে বিয়লিৰ পৰাই এই এনকাউণ্টাৰ আৰম্ভ হয়। মহাৰাষ্ট্ৰ-চত্তীশগড় সীমান্তৰ কাংকেৰ অঞ্চলত আৰক্ষীৰ চি ৬০ কমাণ্ডো বাহিনীয়ে এই এনকাউণ্টাৰ আৰম্ভ কৰে। দুপৰীয়া ডেৰ বজাৰ পৰা আৰম্ভ হোৱা এই এনকাউণ্টাৰত ১২ জন মাওবাদী নিহত হয়।
দেৱেন্দ্ৰ ফাড়নভিছে কয় যে অটোমেটিক মেচিনগানৰ পৰা আৰম্ভ কৰি মাওবাদীৰ পৰা বহু অত্যাধুনিক অস্ত্ৰ-শস্ত্ৰ উদ্ধাৰ কৰা হৈছে। লগতে উদ্ধাৰ হৈছে ১২জনৰ মৃতদেহ।
আনহাতে, গুলীয়াগুলিৰ এই ঘটনাত আহত হয় সতীশ পাটিল নামৰ এজন উপ-পৰিদৰ্শক। সেই স্থানৰ পৰাই তেওঁক গাডচিৰোলিলৈ স্থানান্তৰ কৰা হয়। পিছত এনকাউণ্টাৰৰ সময়ত এজন জোৱানো আহত হয়।
অৱশ্যে মহাৰাষ্ট্ৰৰ উপ-মুখ্যমন্ত্ৰীয়ে জনায় যে দুয়োজনেই এতিয়া বিপদমুক্ত। তেওঁ কয় যে নিশা ৯ বজালৈকে এই এনকাউণ্টাৰ চলি আছে। কিন্তু আৰক্ষী বাহিনী তাত সৰ্বাত্মক ৰূপত দমনীয় স্থিতিত আছে।
