সদৌ অসম বাঙালী যুৱ ছা্ত্ৰ ফেডাৰেশ্বনে আজি দিয়া অসম বন্ধৰ মাজতে কাচাৰ জিলাৰ হৰিনগৰত দুগৰাকী সন্দেহযুক্ত বিদ্ৰোহী গোটৰ সদস্য স্থানীয় লোকৰ গণপ্ৰহাৰত মৃত্যু হোৱা ঘটনাই চাঞ্চল্যৰ সৃষ্টি কৰিছে।
প্ৰাপ্ত তথ্য মতে আজি পুৱা জিলাখনৰ লক্ষীপুৰ মহকুমাৰ জয়পুৰ আৰক্ষী থানাৰ অন্তৰ্গত হৰিনগৰ বজাৰ এলেকাত উক্ত যুৱক দুজনে প্ৰৱেশ কৰাৰ সময়তে স্থানীয় লোকসকলে তেওঁলোকক বাহিৰৰ পৰা অহা বুলি সন্দেহ কৰি সোধ-পোছ আৰম্ভ কৰে।
কিন্তু তেওঁলোকৰ পৰা কোনো বিশ্বাসযোগ্য উত্তৰ লাভ নকৰাত ৰাইজৰ সন্দেহ বৃদ্ধি পায় বুলি উল্লেখ কৰি নাম প্ৰকাশত অনিচ্ছুক এগৰাকী স্থানীয় বাসিন্দাই কয়, ‘যুৱকদ্বয়ে কঢ়িয়াই অনা মোনাৰ পৰা এক মাৰণাস্ত্ৰৰ নলী ওলাই থকা দেখা পাই ৰাইজৰ সন্দেহ অধিক বৃদ্ধি হয়।‘
ইয়াৰ পিছতে সমগ্ৰ গাঁওবাসীয়ে যুৱকদুজনক ঘেৰাও কৰি তেওঁলোকৰ ওপৰত প্ৰচণ্ড মাৰপিট আৰম্ভ কৰে বুলি জানিবলৈ দি উপৰুক্ত লোকজনে লগতে কয়, ‘বন্ধৰ পেট্ৰলিঙৰ দায়িত্বত থকা আৰক্ষী আৰু নিৰাপত্তা বাহিনীৰ লোক ঘটনাস্থলীত উপস্থিত হৈ দুয়োজনকে আটক কৰে।‘
কিন্তু স্থানীয় ৰাইজৰ প্ৰহাৰত অতি গুৰুতৰভাৱে আঘাতপ্ৰাপ্ত দুয়োগৰাকী যুৱকেই শিলচৰ চিকিৎসা মহাবিদ্যালয় আৰু হাস্পিতাললৈ নি থকা অৱস্থাতে শেষ নিশ্বাস ত্যাগ কৰে।
নিহত যুৱক দুজনক এই পৰ্যন্ত চিনাক্ত কৰিব পৰা হোৱা নাই বুলি জানিবলৈ দি কাচাৰৰ উপায়ুক্ত ড০ এছ লক্ষ্মণনে কয় যে ঘটনাৰ ন্যায়িক তদন্তৰ পিছত কাইলৈ তেওঁলোকৰ মৰণোত্তৰ পৰীক্ষা কৰোৱা হ’ব।
আনহাতে জিলাখনৰ ভাৰপ্ৰাপ্ত আৰক্ষী বিষয়া ৰাকেশ ৰোশনে জনোৱা মতে নিহত যুৱক দুজনৰ পৰা ১টা ১২ ব’ৰ ছিংগল বেৰেল ৰাইফল, ৩টা এ কে ৫৬ ৰাইফল, এটা চাইনিজ এল এম জি ৰাইফল, ২টা ৫৬ এম এম ৰাইফল, ১টা .২২ এম এম পিষ্টল আৰু প্ৰায় ৭০০ সক্ৰিয় কাৰ্টিজ আৰু ১টা চিনত নিৰ্মিত হেণ্ড গ্ৰেণেড উদ্ধাৰ কৰা হয়।
উক্ত ঘটনাৰ পিছতে সম্প্ৰতি অঞ্চলটোত নিৰাপত্তা বাহিনীয়ে ব্যাপক তালাচি অভিযান আৰম্ভ কৰা পৰিলক্ষিত হৈছে।