কালি ৰাজ্যৰ ৪০ টা সমষ্টিত তৃতীয় পৰ্যাৰ নিৰ্বাচনৰ ভোটগ্ৰহণ সম্পন্ন হোৱাৰ সময়তে নিশাৰ ভাগত এখন বাহনত দুটাকৈ ইভিএম উদ্ধাৰ হোৱাৰ ঘটনাই তীব্ৰ প্ৰতিক্ৰিয়াৰ সৃষ্টি কৰিছে।
নিশাৰ ঘটনাটোৰ ৰহস্য আৰু প্ৰতিক্ৰিয়া আজিও অব্যাহত থকা পৰিলক্ষিত হৈছে।
বাহনত ইভিএম উদ্ধাৰকলৈ কামৰূপ জিলাৰ ধাৰাপুৰৰ মজলিত উত্তপ্ত পৰিস্থিতিৰ সৃষ্টি হয়।
এখন বাহনত সন্দেহজনক অৱস্থাত দুটাকৈ ই ভি এম উদ্ধাৰক কেন্দ্ৰ কৰি তীব্ৰ উত্তেজনাই বিৰাজ কৰে আৰু বহুতে ইভিএম দুটা কিয় এনেদৰে বাহনত অনা হৈছিল তাকেলৈ প্ৰশ্ন কৰে।
যোৱা নিশা প্ৰায় ৮ বজাত এই ঘটনা সংঘটিত হয়।
পৰিস্থিতি ইমানেই উত্তেজনাপূৰ্ণ হৈ পৰে যে ঘটনাস্থলীত আৰক্ষী আৰু চি আৰ পি এফ মোতায়েন কৰিবলগীয়া হয়।
উত্তেজিত লোকসকলক নিয়ন্ত্ৰণ কৰিবলৈ আৰক্ষী-চি আৰ পি এফে লাঠিচালনা আৰু গুলিচালনা কৰাৰ ঘটনাও সংঘটিত হৈছে।
ধাৰাপুৰৰ মজলি প্ৰাথমিক বিদ্যালয়ৰ ভোটকেন্দ্ৰত প্ৰৱেশ কৰিছিল বাহনখনে।
বাহনখনৰ নম্বৰ AS 01 GC 6035।
উল্লেখ্য পশ্চিম গুৱাহাটী সমষ্টিৰ অন্তৰ্গত এই ভোটকেন্দ্ৰটো।