ভাৰত-পাকিস্তান সীমান্তত পুনৰ পাকিস্তানে যুদ্ধবিৰতি উলংঘন কৰি কৰা তীব্ৰ গুলিচালনাৰ ফলত ভাৰতীয় সেনা বাহিনীৰ এগৰাকী বিষয়া আৰু এগৰাকী জোৱান চহিদ হ’বলগীয়া হয়।
জম্মু-কাশ্মীৰৰ ৰজৌৰীত আজি ৰাতিপুৱা পাকিস্তানী সেনাই কৰা গুলিচালনাৰ ফলত ভাৰতীয় সেনা বাহিনীৰ বিষয়া আৰু জোৱন গৰাকী চহিদ হয়।
ভাৰতীয় সেনা বাহিনীৰ সূত্ৰই প্ৰকাশ কৰা মতে, বিগত পাঁচদিনত পাকিস্তানী সেনাই ভাৰত-পাকিস্তান সীমান্তত কৰা যুদ্ধবিৰতি উলংঘনৰ ফলত চাৰিগৰাকী ভাৰতীয় সেনা জোৱান চহিদ হ’বলগীয়া হয়।
সোমবাৰে সন্ধিয়াৰ ভাগৰ পৰা পাকিস্তানী সেনাই জম্মু-কাশ্মীৰৰ ৰজৌৰী চেক্টৰত যুদ্ধবিৰতি উলংঘন কৰি গুলিচালনা অব্যাহত ৰাখিছিল।
উল্লেখযোগ্য যে, ভাৰত আৰু চীনৰ মাজত লাডাখত উত্তেজনাই বিৰাজ কৰি থকাৰ সময়ত পাকিস্তানে ভাৰত-পাকিস্তানত সীমান্তত যুদ্ধবিৰতি উলংঘনৰ ঘটনা বৃদ্ধি কৰিছে।
পাকিস্তানী সেনাই সীমান্তত গুলিচালনা কৰি পাকিস্তান সমৰ্থিত সন্ত্ৰাসবাদীক ভাৰতত প্ৰৱেশৰ ক্ষেত্ৰত সহায় কৰি আহিছে।