মহাবিদ্যালয়-বিশ্ববিদ্যালয়বোৰৰ ছাত্ৰ একতা সভাৰ নিৰ্বাচনবোৰ অধিক ৰাজনৈতিক সংঘাতৰ কঠীয়াতলীত পৰিণত হৈছে নেকি? যোৱা দুমাহৰ ভিতৰত অসমৰ কেইবাখনো মহাবিদ্যালয়ৰ ছাত্ৰ একতা সভাৰ নিৰ্বাচনত প্ৰতিদ্বন্দ্বী দলবোৰৰ মাজত বৃদ্ধি পোৱা সংঘাতে তেনে কথাৰে ইংগিত কৰে।
এই সময়ছোৱাৰ ভিতৰত কানৈ ছোৱালী মহাবিদ্যালয়, লংকা মহাবিদ্যালয়, বোকাখাতৰ জে ডি এছ জি মহাবিদ্যালয়কে ধৰি নিৰ্বাচনকেন্দ্ৰিক কেইবাটাও সংঘাত হৈছে।
একেদৰে আজি ডবকাৰ আনফৰ আলী মহাবিদ্যালয়ৰ ছাত্ৰ একতা সভাৰ নিৰ্বাচনক লৈও উত্তপ্ত পৰিস্থিতিৰ সৃষ্টি হয়। জানিব পৰামতে, আছু আৰু এ বি ভি পিৰ সমৰ্থকৰ মাজত হোৱা সংঘাতে মাৰপিটৰ ৰূপ লয়। ফলত আহত হৈছে দুজনকৈ ছাত্ৰ।
এটা সূত্ৰই জনোৱামতে, মনোনয়ন পত্ৰ দিয়াৰ সময়তে দুয়োটা দলৰ প্ৰাৰ্থী আৰু সমৰ্থকৰ মাজত প্ৰথমে তৰ্কাতৰ্কি আৰু পিছত মাৰপিট হয়। আহত হোৱা দুজন এ বি ভি পিৰ সমৰ্থক।
এই সন্দৰ্ভত এ বি ভি পিৰ সদস্যসকলে আছুৰ জাভেদ আহমেদ বৰভূঞা, ছাহিল ইছলাম তালুকদাৰৰ বিৰুদ্ধে আৰক্ষীক অভিযোগ দিছে।
