লোকসভাৰ সাংসদসকলৰ দৰমহা আৰু অন্যান্য সুবিধাৰ বিষয়ে কৌতুহলৰ সৃষ্টি হয়। এটি বিশেষ আৰ টি আইৰ তথ্য পোহৰলৈ আহিছে য’ত প্ৰকাশ পাইছে যে বৰ্তমান লোকসভাত মাত্ৰ ২ জন সাংসদেহে স্বেচ্ছাই দৰমহা লোৱা নাই। তাৰে এজন বিজেপিৰ সাংসদ আৰু আনজন কংগ্ৰেছৰ সাংসদ।
এপিনে কুৰুক্ষেত্ৰ, আনফালে ইম্ফল। সাংসদ দুগৰাকীয়ে দুটা সমষ্টিক প্ৰতিনিধিত্ব কৰে, যাৰ মাজৰ দূৰত্ব প্ৰায় ২৫৭৫ কিলোমিটাৰ। কিন্তু ইয়াৰে এজনে আকৌ এখোজ আগবাঢ়ি গৈ কোনো চৰকাৰী দৰমহা, সাংসদ হিচাপে লাভ কৰা কোনো ভাট্টা বা চৰকাৰী সুবিধাও লোৱা নাই।
লোকসভা সচিবালয়ৰ আৰ টি আইৰ উত্তৰ অনুসৰি এই দুজন সাংসদ হৈছে হাৰিয়ানাৰ কুৰুক্ষেত্ৰৰ নবীন জিন্দাল আৰু মণিপুৰৰ ইনাৰ মণিপুৰ সমষ্টিৰ বিমল আকোইজাম। তেওঁলোকৰ নিৰ্বাচনী শপতনামা অনুসৰি তেওঁলোকৰ আৰ্থিক অৱস্থাৰ মাজত ডাঙৰ পাৰ্থক্য আছে।
নবীন জিন্দালৰ শপতনামা অনুসৰি তেওঁৰ সম্পত্তিৰ পৰিমাণ ১২৪১ কোটি। বিমল আকোইজামৰ ঘোষিত সম্পত্তি ৯৭ লাখ।
অৱশ্যে এই দুজনৰ ভিতৰত নবীন জিন্দালে বিশেষ কাৰণত দৃষ্টি আকৰ্ষণ কৰিছে। আৰ টি আইৰ মতে তেওঁ সাংসদ হিচাপে কোনো ধৰণৰ দৰমহা, ভাট্টা বা চৰকাৰী সুবিধা গ্ৰহণ নকৰে।
অৱশ্যে বৰ্তমান তেওঁ লোকসভাৰ আটাইতকৈ ধনী সাংসদ নহয়। সেই খিতাপ দখল কৰিছে টিডিপিৰ গুণ্টুৰ সাংসদ চন্দ্ৰশেখৰ পেম্মাছানীয়ে। তেওঁৰ ঘোষিত সম্পত্তি ৫,৭০৫ কোটি। তেওঁৰ পিছত চেভালা কোণ্ডাৰ পৰা বিজেপি সাংসদ বিশ্বেশ্বৰ ৰেড্ডী। তেওঁৰ সম্পত্তিৰ পৰিমান ৪৫৬৮ কোটি।
আৰ টি আইৰ উত্তৰত সংসদৰ সামগ্ৰিক ছবিখনৰ বিষয়েও তথ্য পোৱা যায়। কোৱা হৈছে যে বৰ্তমান লোকসভাৰ ৪৮১ গৰাকী সাংসদে নিয়মীয়া দৰমহা লৈছে। লোকসভাত মুঠ ৫৪৩খন আসন আছে। ইয়াৰে ২ খন আসন বৰ্তমান খালী।
