উত্তৰ প্ৰদেশৰ বুডাউনত এক হৃদয়বিদাৰক ঘটনাই চাঞ্চল্যৰ সৃষ্টি কৰিছে। এগৰাকী ৩০ বছৰীয়া মহিলাই অভিযোগ কৰিছে যে তেওঁৰ স্বামীয়ে তেওঁৰ দুজন বন্ধুৰ হাতত ১০০০ টকাৰ বিনিময়ত তেওঁক গতাই দিছিল। ইয়াৰ পিছতে এখন নিৰ্জন ইউকেলিপ্টাছ বাগিচাত তেওঁক দলবদ্ধ ধৰ্ষণ কৰা হয়।
বুদাউনৰ ফৈজগঞ্জ বেহটা থানাৰ অন্তৰ্গত অঞ্চলটোত সংঘটিত হৈছে এই ঘটনা। দেওবাৰে সন্ধিয়া থানাত লিখিত এজাহাৰ দাখিল কৰে নিৰ্যাতিতা গৰাকীয়ে। তেওঁ জনোৱা মতে, স্বামী ছুটকানে তেওঁক সামান্য টকাৰ বিনিময়ত বন্ধু বালকিছন আৰু পাপ্পুৰ সৈতে পঠিয়াইছিল।
অভিযোগত উল্লেখ আছে যে দুয়োজনে তেওঁক লৈ গৈছিল ‘ছাফেদে কা বাগ’ নামেৰে পৰিচিত ইউকেলিপ্টাছৰ বাগিচালৈ। তাত তেওঁক নিৰ্যাতন কৰা হৈছিল। অৱশেষত ঘৰলৈ উভতি আহি পৰিয়ালৰ লোকক এই বিষয়ে অৱগত কৰে। অভিযোগ লাভ কৰাৰ পিছতে আৰক্ষীয়ে তাৎক্ষণিক ব্যৱস্থা গ্ৰহণ কৰে।
তেওঁক চিকিৎসা পৰীক্ষাৰ বাবেবুদাউন জিলা মহিলা চিকিৎসালয়লৈ প্ৰেৰণ কৰা হয়। একে সময়তে স্বামী আৰু তেওঁৰ দুই বন্ধুৰ বিৰুদ্ধে একাধিক ধাৰাত এফআইআৰ ৰুজু কৰা হৈছে।
আৰক্ষী সূত্ৰৰ পৰা জানিব পৰা মতে, এজাহাৰ দাখিল কৰাৰ পাছতে সোমবাৰে বালকিছন আৰু পাপ্পুক গ্ৰেপ্তাৰ কৰা হয়। দুয়োকে সোধা-পোছা কৰা হৈছে। এই ঘটনাৰ লগত আন কোনো লোক জড়িত আছে নে নাই তাৰো তদন্ত অব্যাহত আছে। অৱশ্যে এতিয়াও পলাতক হৈ আছে মূল অভিযুক্ত স্বামী ছুটকান। তেওঁক গ্ৰেপ্তাৰ কৰিবলৈ দুটা পৃথক আৰক্ষী দল গঠন কৰা হৈছে। আৰক্ষীয়ে জনোৱা মতে, সম্ভাৱ্য আত্মগোপন স্থানত অবিৰতভাৱে তালাচী চলোৱা হৈছে।
বুডাউন গ্ৰাম্য এলেকাৰ আৰক্ষী অধীক্ষক হৃদয়েশ কাথেৰিয়াই কয় যে চিকিৎসা প্ৰতিবেদন পোৱাৰ লগে লগে অধিক আইনী ব্যৱস্থা গ্ৰহণ কৰা হ’ব। তদন্তত কোনো ধৰণৰ গাফিলতি ৰখা নহ’ব বুলিও তেওঁ আশ্বাস দিয়ে। ঘটনাটোক কেন্দ্ৰ কৰি অঞ্চলটোত তীব্ৰ ক্ষোভ আৰু আতংকৰ পৰিৱেশৰ সৃষ্টি হৈছে। স্থানীয় ৰাইজে দোষীক শীঘ্ৰে দৃষ্টান্তমূলক শাস্তি প্ৰদানৰ দাবী জনাইছে।
