জম্মু-কাশ্মীৰত পুনৰ উগ্ৰপন্থীৰ আক্ৰমণ। বাতৰি অনুসৰি শুকুৰবাৰে সন্ধিয়া কুলগামত প্ৰব্ৰজিত শ্ৰমিকৰ ওপৰত গুলীচালনা কৰা হয়। ফলত এজন শ্ৰমিক থিতাতে নিহত হয়। আন এজন আহত শ্ৰমিকৰো পিছত মৃত্যু হয়। ইতিমধ্যে সন্দেহযুক্ত উগ্ৰপন্থীৰ সন্ধানত অভিযান আৰম্ভ কৰা হৈছে। সমগ্ৰ অঞ্চলটো ঘেৰাও কৰি ৰখা হৈছে।
সংবাদ সংস্থাৰ খবৰ অনুসৰি সন্ধিয়া কেলামৰ ইটা ভাটাত শ্ৰমিকৰ ওপৰত আক্ৰমণ সংঘটিত হয়। আহত হয় দুজন শ্ৰমিক। চিকিৎসালয়লৈ নিয়াৰ পূৰ্বে মৃত্যু হয় এজন শ্ৰমিকৰ। আনজনক অনন্তনাগৰ জিএমচি হাস্পতালত ভৰ্তি কৰোৱা হয় যদিও পিছত তেওঁৰো মৃত্যু হয়। জানিব পৰা মতে, মৃত শ্ৰমিক দুজনৰ এজন ছত্তীশগড়ৰ আৰু আনজন উত্তৰ প্ৰদেশৰ।
কিছুদিন পূৰ্বে অনন্তনাগত উগ্ৰপন্থী আক্ৰমণত এজন আৰক্ষী বিষয়া শ্বহীদ হৈছিল। যোৱা সপ্তাহৰ বুধবাৰে (২২ জুলাই) অমৰনাথ যাত্ৰাৰ বাবে কৰ্তব্যৰত এজন আৰক্ষী বিষয়াক উগ্ৰপন্থীয়ে ওচৰৰ পৰা গুলীয়াই হত্যা কৰে।
বিষয়াসকলে জনোৱা মতে, আছিক হুছেইন ভাৰতীয় সংৰক্ষিত আৰক্ষীৰ তৃতীয় বেটেলিয়নৰ মুখ্য কনিষ্টবল আছিল। লালচৌকৰ সমীপৰ ব্যস্ত অনন্তনাগ-কোকেৰনাগ পথত তেওঁ কৰ্তব্যৰত আছিল। নিশা প্ৰায় ১২:৩০ বজাত উগ্ৰপন্থীয়ে তেওঁক আৰু এজন সহকৰ্মীৰ ওপৰত গুলীচালনা কৰে।
ঘটনাৰ পিছতে আছিকক চিকিৎসালয়লৈ প্ৰেৰণ কৰা হয়। অৱশ্যে অনন্তনাগ চিকিৎসালয় পোৱাৰ লগে লগে তেওঁক মৃত ঘোষণা কৰা হয়। চিচিটিভি ফুটেজত দেখা গৈছে যে ব্যস্ত বজাৰখনৰ এখন দোকানৰ সন্মুখত আৰক্ষীৰ ওপৰত একাধিকবাৰ গুলীচালনা কৰা হৈছে।
