যোৰহাট চিকিৎসা মহাবিদ্যালয়ত যোৱা এসপ্তাহত ১৫টিকৈ নৱজাতকৰ মৃত্যুৱে গভীৰ উদ্বেগ সৃষ্টি কৰাৰ মাজতে আজিও দুটি শিশুৰ মৃত্যু হোৱা বুলি খবৰ পোৱা গৈছে।
এই লৈ চিকিৎসালয়খনৰ চিকিৎসক-নাৰ্ছসকলৰ দায়বদ্ধতা আৰু দক্ষতাত সন্দেহ প্ৰকাশ কৰিছে বহুজনে। আনহাতে নিজৰ নৱজাত সন্তানক হেৰুওৱা বহুকেইগৰাকী প্ৰসূতিয়ে ক্ষোভ প্ৰকাশ কৰিছে। চিকিৎসালয়খনৰ প্ৰসূতি বিভাগৰ দায়িত্বত থকা নাৰ্ছসকল দায়িত্বজ্ঞান নথকা বুলি অভিযোগ আনিছে বহুকেইজন ভুক্তভোগীয়ে।
চিকিৎসালয়খনত এক প্ৰকাৰৰ অৰাজকতাৰ সৃষ্টি হৈছে বুলি অভিযোগ উঠিছে। ৰোগীয়ে অতি প্ৰয়োজনৰ সময়তো চিকিৎসক-নাৰ্ছক বিচাৰি নাপায় তথা সংকটজনক অৱস্থাত থকা কেঁচুৱা বা আন ৰোগীকো চিকিৎসকে গুৰুত্ব নিদিয়াৰ অভিযোগ উঠিছে।
আনহাতে সন্তান প্ৰসৱৰ বাবে অহা বা অনা প্ৰসূতিসকলক উপযুক্ত স্বাস্থ্যসেৱা আগ বঢ়োৱাৰ পৰিৱৰ্তে তেওঁলোকক প্ৰায় অৱহেলিত অৱস্থাত য’তে-ত’তে ৰখা হয় বুলিও অভিযোগ আনিছে। এই ঠাণ্ডাৰ দিনতো বহুতক মজিয়াত পেলাই ৰখা হয় বুলিও অভিযোগ আনে এগৰাকী ৰোগীৰ অভিভাৱকে।
উল্লেখযোগ্য যে যোৰহাট চিকিৎসা মহাবিদ্যালয়ত পূৰ্বেও অৰাজকতা আৰু নিম্নমানৰ চিকিৎসা হোৱাৰ অভিযোগ সততে উত্থাপন হৈ আহিছে যদিও কৰ্তৃপক্ষই গুৰুত্বসহ লোৱা নাই।
আজি চিকিৎসালয় চৌহদত উপস্থিত হৈ বীৰ লাচিত সেনাকে ধৰি একাধিক সংগঠনে চিকিৎসালয়খনত ঘটি থকা এনে ঘটনাৰ প্ৰতিবাদ কৰে।
মন কৰিব লগীয়া যে চিকিৎসালয় কৰ্তৃপক্ষৰ সূত্ৰমতেই যোৱা ১ নৱেম্বৰৰ পৰা ৭ নৱেম্বৰৰ ভিতৰত ১৫টিকৈ নৱজাতকৰ মৃত্যু হৈছে।