বৰপেটাৰ হাউলীত সংঘটিত হৈছে এক ভয়াৱহ পথ দুৰ্ঘটনা। বৰপেটা-হাউলী পথৰ কদমগুৰিত ডাম্পাৰ আৰু মাৰুতি 800ৰ মাজত হোৱা মুখামুখি সংঘৰ্ষত দুজন লোক থিতাতে নিহত হোৱাৰ ঘটনাই জিলাখনতে তীব্ৰ চাঞ্চল্যৰ সৃষ্টি কৰিছে।
জানিব পৰা মতে নিহত দুজনৰ ভিতৰত এজন পুৰুষ আৰু আনগৰাকী মহিলা। নিহত লোকজন বৰপেটা নিৰ্বাচনী বিষষা কাৰ্যালয়ৰ কৰ্মচাৰী তথা বৰপেটাৰোডৰ নিবাসী জিতেন বৰ্মন বুলি চিনাক্ত কৰিছে। আনহাতে এই কৰুণ দুৰ্ঘটনাটোত নিহত হোৱা মহিলাগৰাকী গীতাঞ্জলী দাস বুলি জানিব পৰা গৈছে। গীতাঞ্জলী দাসৰো ঘৰ বৰপেটাৰোডত।
মন কৰিবলগীয়া যে দুৰ্ঘটনাটোত নিহত হোৱা মহিলাগৰাকী বৰপেটা জিলা অগপৰ এগৰাকী সক্ৰিয় মহিলা নেত্ৰী। বৰপেটা জিলা অগপই আয়োজন কৰা নাগৰিকত্ব সংশোধনী বিধেয়ক বিৰোধী প্ৰতিবাদী সমদলত অংশগ্ৰহনৰ বাবে আহিয়েই এইদৰে মৃত্যুক আকোঁৱালি লয় নেত্ৰীগৰাকীয়ে।
আজি ৰাতিপুৱা বৰপেটা ৰোডৰ নিজ গৃহৰ পৰা গীতাঞ্জলী দাসে অগপৰ প্ৰতিবাদী কাৰ্যসূচীত অংশলোৱাৰ বাবে বৰপেটা চহৰলৈ আহি থকাৰ সময়ত নিজ কাৰ্যালয়লৈ আহি থকা জিতেন বৰ্মনে নেত্ৰীগৰাকীকো নিজ গাড়ীত উঠাই বৰপেটা অভিমুখী আহিছিল।
এনেদৰে আহি থকা অৱস্থাতে কদমগুৰিত উক্ত ভয়ংকৰ দুৰ্ঘটনাটো সংঘটিত হয় আৰু দুয়োজনৰে ঘটনাস্থলতে মৃত্যু হয়।
উল্লেখ্য যে জিতেন বৰ্মনে অইন দিনাৰ দৰে আজিও নিজৰ AS 15 B 8686 নম্বৰৰ মাৰুতি 800 গাড়ী খনেৰে কাৰ্যালয়লৈ আহি থকা অৱস্থাতে নম্বৰপ্লেট বিহীন ডাম্পাৰৰ লগত সংঘৰ্ষ হয়। এই দুৰ্ঘটনাক লৈ জিলাখনত শোকৰ ছাঁ পৰিছে।