বঙাইগাঁও জিলাৰ ৩৪নং অভয়াপুৰী উত্তৰ বিধান সভা সমষ্টিৰ অন্তৰ্গত সৃজনগ্ৰাম ব্লক কংগ্ৰেছৰ সভাপতি পদ লৈ টনা আঁজোৰা লগা কাৰ্য্যই কংগ্ৰেছী মহলত ব্যাপক চৰ্চা লাভ কৰিছে।
সৃজনগ্ৰাম ব্লক কংগ্ৰেছৰ সভাপতিৰ পদক লৈ কংগ্ৰেছৰ মাজত দুটা শিৱিৰৰ সৃষ্টি হোৱাৰ কথাটো কংগ্ৰেছৰ ১৩৬ তম প্ৰতিষ্ঠা দিৱসৰ দিনা স্পষ্ট হৈ পৰিছে।
সমগ্ৰ দেশ ব্যাপী কংগ্ৰেছৰ প্ৰতিষ্ঠা দিৱস সংকল্প দিৱস হিচাপে পালন কৰা হৈছে।
সমান্তৰাল ভাৱে বঙাইগাঁও জিলাৰ কীৰ্তনপাৰা আৰু গোলাপাৰাত পৃথকে পৃথকে ভাৰতীয় জাতীয় কংগ্ৰেছৰ ১৩৬ সংখ্যক প্ৰতিষ্ঠা দিৱস উপলক্ষে সংকল্প দিৱস পালন কৰা পৰিলক্ষিত হয়।
২৮ ডিচেম্বৰত বঙাইগাঁও জিলাৰ কীৰ্তনপাৰাত সৃজনগ্ৰাম ব্লক কংগ্ৰেছৰ উদ্যোগত ভাৰতীয় জাতীয় কংগ্ৰেছৰ ১৩৬ সংখ্যক প্ৰতিষ্ঠা দিৱস উপলক্ষে একতা সম্ভৱনাৰ সংকল্প গ্ৰহণ কৰে।
জাতি, ধৰ্ম বৰ্ণ নিৰ্বিশেষে সকলো লোকে একতাৰ এনাজৰীৰে বান্ধ খাই আগবাঢ়ি যোৱাৰ সংকল্প গ্ৰহণ কৰে।
সংকল্প গ্ৰহণ অনুষ্ঠানত সৃজনগ্ৰাম ব্লক কংগ্ৰেছৰ সভাপতি আব্দুল হালিম, বালাৰচৰ মাত্ৰাঘোলা গাওঁ পঞ্চায়তৰ সভাপতি ছেকান্দাৰ প্ৰধানী, ব্লক কংগ্ৰেছৰ সাধাৰণ সম্পাদক ক্ৰমে জাহেৰ আলী ভূঞা, আব্দুছ ছালাম, আব্দুল ৰৌফ চৌধুৰী, উপসভাপতি আফতাব উদ্দিন আহমেদৰ লগতে বিভিন্ন মণ্ডলৰ সভাপতি ক্ৰমে কোকিলা মণ্ডল কংগ্ৰেছৰ সভাপতি ফইজুদ্দিন, জপিয়াৰ আব্দুল মোতালেপ সিকদাৰ, গোলাপাৰাৰ নুৰুল ইছলাম, সৃজনগ্ৰামৰ ৰফিজ আলী, চক্ৰভোমৰ সিৰেন ৰয়, কাকোইজানাৰ ভূমিধৰ বৰ্মন, বালাৰচৰৰ মহিৰ উদ্দিন মণ্ডল, কীৰ্ত্তনপাৰা মণ্ডলৰ সুৰমুজ আলী আদি ব্যক্তিসকল উপস্থিত থাকে।
অনুৰূপ ধৰণে সৃজনগ্ৰাম ব্লক কংগ্ৰেছৰ আন এটা গোটৰ সভাপতি আফছাৰ আলী, আৰু জপিয়া নাম্বাৰপাৰা জিলা পৰিষদৰ সদস্য খাইৰুল ইছলামৰ লগতে একাংশ কংগ্ৰেছৰ নেতা কৰ্মী উপস্থিত থাকি প্ৰতিষ্ঠা দিৱস পালন কৰে।
ইয়াৰ পৰা স্পষ্ট হৈ পৰিছে যে সৃজনগ্ৰাম ব্লক কংগ্ৰেছৰ সভাপতি পদ লৈ দুটা গোটৰ সৃষ্টি হৈছে।
এইক্ষেত্ৰত আব্দুল হালিমে সাংবাদিকৰ প্ৰশ্নৰ উত্তৰত কয় যে অসম প্ৰদেশ কংগ্ৰেছৰ সভাপতি ৰিপুণ বৰাই বঙাইগাঁও জিলা সমিতিৰ জৰিয়তে সভাপতি নিযুক্ত কৰিছে আৰু সকলো মণ্ডল কংগ্ৰেছে ইয়াক আদৰণি জনাইছে।
স্থানীয় বিধায়ক আব্দুল হাই নাগৰীৰ পছন্দৰ প্ৰাৰ্থী আফছাৰ আলীৰ সভাপতি পদ লৈ প্ৰশ্নৰ অৱতাৰণা হৈছে। এটা ব্লকৰ দুজন সভাপতি হোৱাটোৱে প্ৰতিপন্ন কৰিছে যে উত্তৰ অভয়াপুৰী বিধান সভা সমষ্টিত কংগ্ৰেছৰ মাজত ব্যাপক গৃহকন্দলৰ সৃষ্টি হৈছে।
সমষ্টি ব্যাপী এই প্রশ্নই চৰ্চা লাভ কৰিছে যে সৃজনগ্ৰাম ব্লক কংগ্ৰেছৰ সভাপতি কোন আব্দুল হালিম নে আফছাৰ আলী।