এটা ঘৰৰ পৰা ৫ জন লোকৰ মৃতদেহ উদ্ধাৰ হোৱা ঘটনাই চাঞ্চল্যৰ সৃষ্টি কৰিছে। শনিবাৰে পুৱা কেৰালাৰ কোচিৰ ভাদুঠালা অঞ্চলত সংঘটিত হয় এই ঘটনা। আৰক্ষী সূত্ৰৰ পৰা জানিব পৰা মতে, নিহত দুজনৰ নাম হ’ল অৱস্থি নায়াৰ (৩৬) আৰু শ্ৰীকুমাৰী (৫৮)। তদুপৰি এজন ১৪ বছৰীয়া নাবালক আৰু ৪ আৰু ২ বছৰ বয়সৰ দুটা শিশুৰ মৃতদেহও উদ্ধাৰ কৰা হৈছে।
প্ৰথম অৱস্থাত অৱস্থি আৰু শ্ৰীকুমাৰীয়ে নাবালক আৰু শিশু দুটাক হত্যা কৰি আত্মহত্যা কৰা বুলি সন্দেহ প্ৰকাশ কৰিছে আৰক্ষীয়ে। হত্যাৰ পূৰ্বে শিশুকেইটাৰ চকুত ছানগ্লাছও লগোৱা হৈছিল।
সূত্ৰ অনুসৰি বিগত বৰ্ষৰ আগষ্ট মাহত অৱস্থিৰ স্বামীয়ে আত্মহত্যা কৰিছিল। আৰক্ষীয়ে জনোৱা মতে, আৱস্থিৰ স্বামীয়ে নিয়মিতভাৱে মদ খাইছিল। ইয়াৰ বাবেই তেওঁলোকৰ মাজত যথেষ্ট অশান্তিৰ সৃষ্টি হৈছিল। স্বামীৰ মৃত্যুৰ পিছত অৱস্থিয়ে ল’ৰা-ছোৱালীৰ সৈতে ভাদুঠালাৰ এই ভাড়া ঘৰটোত থাকিবলৈ আৰম্ভ কৰে। মাক শ্ৰীকুমাৰীও তেওঁৰ লগত আছিল।
জানিব পৰা মতে, স্বামীৰ মৃত্যুৰ পিছত অৱস্থি মানসিক বিষণ্ণতাত ভুগি আছিল। লগতে কেইবাবাৰো আত্মহত্যাৰ চেষ্টা চলাইছিল। ডাঙৰ পুত্ৰৰ চিকিৎসাৰ বাবে ভাদুঠালাৰ এই ঘৰটোত থাকিবলৈ আৰম্ভ কৰে। তদন্তকাৰীয়ে ঘৰটোত এখন চুইচাইড নোটও উদ্ধাৰ কৰে। চুবুৰীয়াই জনোৱা মতে, শুকুৰবাৰে পুৱাৰে পৰা সেই ঘৰৰ কাৰো লগত তেওঁলোকৰ দেখাদেখি হোৱা নাই।
আৰক্ষীয়ে জনোৱা মতে, শনিবাৰে পুৱা ঘৰত প্ৰৱেশ কৰাৰ পিছত প্ৰথমে অৱস্থি আৰু শ্ৰীকুমাৰীৰ মৃতদেহ উদ্ধাৰ কৰা হয়। পিছত এটা কোঠাৰ পৰা ৪ আৰু ২ বছৰীয়া দুজন ল’ৰা আৰু আন এটা কোঠাৰ পৰা ১৪ বছৰীয়া এট ল’ৰাৰ মৃতদেহ উদ্ধাৰ কৰে। আৰক্ষীয়ে মৃতদেহ উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰিছে। ঘটনাৰ তদন্ত অব্যাহত আছে।
