চলিত বিশ্বকাপৰ গ্ৰুপ ডিৰ শেষৰখন মেচত তুৰস্কই প্ৰায় অঘটন ঘটালে। ইতিমধ্যে প্ৰতিযোগিতাখনৰ পৰা তেওঁলোক বাহিৰ হৈছে। কিন্তু তেওঁলোকৰ শেষৰখন মেচত আৰ্ডা গুলাৰ বাহিনীয়ে আমেৰিকাক ৩-২ গ’লত পৰাস্ত কৰে। খেল শেষ হোৱাৰ কেইছেকেণ্ডমান আগতে তুৰস্কই কায়ান আয়হানৰ গ’লেৰে এই উত্তেজনাপূৰ্ণ মেচত জয়লাভ কৰে।
মেচখনৰ আৰম্ভণি অৱশ্যে আমেৰিকাৰ পক্ষত আছিল। খেলৰ মাত্ৰ তিনি মিনিটৰ ভিতৰতে এষ্টন ট্ৰাষ্টীৰ গ’লেৰে আমেৰিকাই অগ্ৰগতি লাভ কৰে। কিন্তু তাৰ পিছত তুৰস্ক পুনৰ মেচখনত সোমাই পৰে। ১০ মিনিটৰ পাছত যুৱ তুৰ্কী আৰ্ডা গুলাৰৰ গ’লেৰে সমতা স্থাপন কৰে।
তাৰ পাছত ৩১ মিনিটত তুৰস্কই আলপাৰ য়িলমাজৰ গ’লেৰে ব্যৱধান আৰু অধিক বৃদ্ধি কৰে। অৱশ্যে দ্বিতীয়াৰ্ধত পুনৰ মেচখনলৈ উভতি আহে আমেৰিকা। খেলখনৰ ৪৯ মিনিটত চেবাষ্টিয়ান বেৰহাল্টে গ’ল দি খেলখন সমতা স্থাপন কৰে।
তেতিয়াও দুয়োটা দলৰ সুযোগ আহে। কিন্তু কোনো গ’ল নহ’ল। যেতিয়া সকলোৱে ধৰি লৈছিল যে মেচখন ড্ৰ’ হ’ব, তেতিয়াই নাটকীয় মোৰটো আহিল। শেষ মুহূৰ্তত কায়ান আয়হানে গ’ল দি তুৰস্কক এক অবিস্মৰণীয় জয় আনি দিয়ে।
কিন্তু এই বিজয়ৰ পাছতো তুৰস্কই খালী হাতে ঘৰলৈ উভতি আহিবলগীয়া হৈছে। কাৰণ, প্ৰথম দুখন মেচত পৰাস্ত হোৱাৰ পিছত ইতিমধ্যে তেওঁলোক বিশ্বকাপৰ পৰা বাহিৰ হৈছিল।
ইপিনে, এই মেচত পৰাস্ত হোৱাৰ পাছতো আমেৰিকাই ৬ পইণ্টেৰে গ্ৰুপ চেম্পিয়ন হিচাপে নকআউট পৰ্যায়লৈ আগবাঢ়িল। এইবাৰ নকআউট পৰ্যায়ত তেওঁলোকৰ প্ৰতিদ্বন্দ্বী বছনিয়া-হাৰ্জেগোভিনা।
আনহাতে, তুৰ্কীৰ তাৰকা ফুটবলাৰ আৰ্ডা গুলাৰে এই মেচত গ’ল দি বিশ্বকাপৰ মঞ্চত নিজৰ একাউণ্ট খুলিলে। এই বিশ্বকাপত ২১ বছৰীয়া এই ফুটবলাৰগৰাকীক লৈ ৰিয়েল মাদ্রিদে বহু আশা কৰিছিল৷ কিন্তু যিহেতু দলটোৱে নকআউট পৰ্যায়ত প্ৰৱেশ কৰিব নোৱাৰিলে, সেয়েহে তেওঁৰ বিশ্বকাপৰ অভিযান ইয়াতেই শেষ হ’ল। গ্ৰুপ পৰ্যায়ৰ খেলত অষ্ট্ৰেলিয়া আৰু পেৰাগুৱেৰ হাতত পৰাস্ত হয় তুৰস্ক।
