ৰাছিয়ান সেনাই স্নেক আইলেণ্ডৰ গুৰুত্বপূৰ্ণ কৃষ্ণ সাগৰৰ আউটপোষ্ট খালী কৰিছে। ইউক্ৰেইনৰ বন্দৰ চহৰ ওডেছাৰ কাষৰ কৃষ্ণ সাগৰে যুদ্ধৰ আৰম্ভণিৰ পৰাই গুৰুত্ব লাভ কৰি আহিছে। ৰাছিয়াৰ প্ৰতিৰক্ষা মন্ত্ৰালয়ে ঘোষণা কৰে যে ইউক্ৰেইনৰ কৃষ্ণ সাগৰৰ বন্দৰসমূহৰ পৰা শস্য ৰপ্তানিৰ বাবে ঠাই প্ৰদান কৰিবলৈ কৌশলগতভাৱে পিছুৱাই আহিছে।
ৰাছিয়ান ফেডাৰেচনে ৰাষ্ট্ৰসংঘৰে সহমতত উপনীত হৈ মানৱীয় শস্য কৰিডৰৰ উদ্দেশ্যে ঝমেইনি দ্বীপৰ পৰা নিজৰ স্থিতি পৰিত্যাগ কৰাৰ সিদ্ধান্ত লৈছে বুলি প্ৰতিৰক্ষা মন্ত্ৰালয়ে প্ৰকাশ কৰিছে।
আনহাতে ইউক্ৰেইনে ৰাছিয়া বাহিনীক দুখন স্পীড ব’টত উঠি ৰাতিটোৰ ভিতৰতে পলায়ন কৰিবলৈ বাধ্য কৰা বুলি দাবী কৰিছে। দ্বীপটো ইউক্ৰেইনে পুনৰ দখল কৰা বুলি দাবী কৰিছে। ইউক্ৰেইনৰ ৰাষ্ট্ৰপতি ভল’ডিমিৰ জেলেনস্কিৰ কাৰ্যালয়ৰ মুৰব্বী এণ্ড্ৰি ইয়েৰমাকেও নিশ্চিত কৰে যে ৰাছিয়াই স্নেক আইলেণ্ডৰ পৰা সৈন্য প্ৰত্যাহাৰ কৰিছে। টুইটাৰত য়েৰমাকে লিখিছে, “KABOOM! স্নেক দ্বীপত এতিয়া আৰু কোনো ৰাছিয়ান সৈন্য নাই। আমাৰ সশস্ত্ৰ বাহিনীয়ে এটা ডাঙৰ সফলতা লাভ কৰিলে।”
স্নেক আইলেণ্ড হৈছে কৃষ্ণ সাগৰৰ এটা ক্ষুদ্ৰ অংশ কিন্তু কৌশলগতভাৱে পৰিপূৰ্ণ ইউক্ৰেইনৰ দ্বীপ। ইউক্ৰেইনৰ বিৰুদ্ধে যুদ্ধৰ আৰম্ভণিৰ পৰ্যায়তে ৰাছিয়াই কৃষ্ণ সাগৰ দখল কৰিছিল।
স্নেক আইলেণ্ডে ২৪ ফেব্ৰুৱাৰীতে আন্তঃৰাষ্ট্ৰীয় খ্যাতি লাভ কৰিছিল। ৰাছিয়াৰ যুদ্ধজাহাজ এখনে আত্মসমৰ্পণ কৰিবলৈ দিয়া আলটিমেটামক নাকচ কৰি ইউক্ৰেনিয়ান সৈন্যসকলে দেৱালৰ দৰে থিয় হৈ যুঁজ দিছিল।
ইউক্ৰেইন আৰু পশ্চিমীয়া দেশসমূহে ৰাছিয়াই শস্যৰ ৰপ্তানি ৰোধ কৰিবলৈ ইউক্ৰেইনৰ বন্দৰসমূহ অৱৰোধ কৰাৰ অভিযোগ উত্থাপন কৰি আহিছে। ৰাছিয়াই এই বন্দৰসমূহ দখল কৰাৰ ফলত খাদ্য সংকটৰ সৃষ্টি হোৱাৰ লগতে বিশ্বজুৰি নাটনি, ক্ষুধা আৰু ৰাজনৈতিক অস্থিৰতা বৃদ্ধি হোৱাৰ অভিযোগো কৰি আহিছে ইউক্ৰইনে।
ইউক্ৰেইন ৰাছিয়া যুদ্ধই বিশ্বজুৰি খাদ্য সংকটৰ সৃষ্টি কৰিছে, শস্য, ৰন্ধন তেল, ইন্ধন আৰু সাৰৰ দাম আকাশলংঘী হৈছে। বিশ্বত ঘেঁহু যোগান প্ৰায় এক তৃতীয়াংশ ৰাছিয়া আৰু ইউক্ৰেইনৰ পৰা হয়। আনহাতে ৰাছিয়া সাৰ এক্সপোৰ্টাৰ দেশ আৰু ইউক্ৰেইন কুঁহিয়াৰ আৰু সূৰ্য্যমুখী তেলৰ প্ৰধান ৰপ্তানিকাৰী দেশ।
ৰাষ্ট্ৰসংঘই অনুমান কৰিছে ৪১খন দেশৰ ১৮.১ কোটি লোকে খাদ্য সংকটৰ সন্মুখীন হ’ব পাৰে বা সম্পূৰ্ণ দুৰ্ভিক্ষৰ সন্মুখীন হ’ব পাৰে যদিহে যুদ্ধ শেষ নহয়।
