আমেৰিকান কংগ্ৰেছৰ উচ্চ সদন চিনেটত ভিডিঅ’ টেলিকনফাৰেন্সিং ছফটৱেৰ ‘জুম’ৰ জৰিয়তে আজি বক্তব্য ৰাখিব ইউক্ৰেইনৰ ৰাষ্ট্ৰপতি ভলোডিমিৰ জেলেনস্কিয়ে।
যোৱা ২৪ ফেব্ৰুৱাৰীত ৰাছিয়াই ইউক্ৰেইনৰ বিৰুদ্ধে আক্ৰমণ চলোৱাৰ দিন ধৰি জেলেনস্কিয়ে আমেৰিকাৰ ৰাষ্ট্ৰপতি জো বিডেনৰ সৈতে যোগাযোগ ৰক্ষা কৰি চলিছে।
কিন্তু যুদ্ধৰ ৯দিন অতিক্ৰম কৰাৰ পিছত আমেৰিকাৰ সম্পূৰ্ণ চিনেটে জেলেনস্কিৰ সৈতে কথা পাতিব বিচাৰিছে।
লগতে পঢ়ক: যুদ্ধ আৰম্ভ হোৱাৰ পৰা আঠদিনত ১২লাখ ইউক্ৰেইনৰ নাগৰিকে এৰিছে দেশ: ৰাষ্ট্ৰসংঘ
যোৱা সপ্তাহত ইউক্ৰেইনত থকা আমেৰিকাৰ ৰাষ্ট্ৰদূত ৱাকছানা মাৰকাৰোভাই চিনেটৰ সদস্য সকলৰ সৈতে সাক্ষাৎ কৰিছিল। তেতিয়াই তেওঁ কৈছিল যে ৰাছিয়াৰ বিৰুদ্ধে যুদ্ধ কৰিবলৈ তেওঁলোকৰ দেশলৈ জৰুৰীভাৱে আৰু অস্ত্ৰসৰবৰাহৰ প্ৰয়োজন।
শনিবাৰে ৰাছিয়াৰ সামৰিক অভিযানৰ দশম দিন। যোৱা ৯টা দিনত ৰাছিয়াৰ সেনা বাহিনীয়ে দেশখনৰ বিভিন্ন চহৰ দখল কৰিছে।
যুদ্ধৰ আৰম্ভণিতে ৰাছিয়াৰ ৰাষ্ট্ৰপতি পুটিনে দাবী কৰিছিল যে পূব ইউক্ৰেইন আৰু লুহানস্ক তথা ডোনেটস্কৰ নাগৰিকসকলৰ সুৰক্ষাৰ বাবেই এই সামৰিক অভিযান চলোৱা হৈছে।
যুদ্ধ চলি থকাৰ মাজতে ইউক্ৰেইনৰ সৈতে হোৱা আলোচনাত ৰাছিয়াই নিৰাপত্তা সম্পৰ্কীয় তিনিটা চৰ্ত আগবঢ়ায়। সেইবোৰ হ’ল ক্ৰিময়াত ৰাছিয়াৰ সাৰ্বভৌমত্বৰ স্বীকৃতি প্ৰদান, ইউক্ৰেইনক নিৰস্ত্ৰীকৰণ আৰু নাজীবাদৰ প্ৰভাৱৰ পৰা মুক্ত কৰা তথা দেশখনৰ নিৰপেক্ষ অৱস্থান (পাশ্চাত্য প্ৰীতিত পাৰ কৰা) নিশ্চিত কৰা।
জেলেনস্কিৰ দাবী যে ৰাছিয়াৰ এই আক্ৰমণ কেবল এক সামৰিক অভিযান নহয়, বৰঞ্চ এক সভত্যতা ধ্বংসৰ চেষ্টা।
