কেন্দ্ৰীয় চৰকাৰে ২০২৬-২৭ বিত্তীয় বৰ্ষৰ বাজেটত আলফাৰ (ULFA) আলোচনাপন্থী গোটৰ বাবে ৫০০ কোটি টকাৰ এক বিশেষ পেকেজ ঘোষণা কৰিছে। এই ধনৰাশি মূলসুঁতিলৈ উভতি অহা আলফা কেডাৰসকলৰ পুনৰ সংস্থাপনৰ কামত ব্যৱহাৰ কৰা হ’ব। অৱশ্যে প্ৰশ্ন উঠিছে—কেৱল আৰ্থিক পেকেজেৰে বিদ্ৰোহী সমস্যাৰ স্থায়ী সমাধান হ’ব নে কেডাৰসকলৰ দীৰ্ঘদিনীয়া ভূমি আৰু সাংস্কৃতিক সুৰক্ষাৰ প্ৰশ্নবোৰ কেৱল কাগজতে সীমাবদ্ধ থাকিব?
বাজেটৰ আবণ্টন আৰু ত্ৰিপাক্ষিক চুক্তি: বাজেটত উল্লেখ কৰা অনুসৰি, উত্তৰ-পূৰ্বাঞ্চল উন্নয়ন মন্ত্ৰালয়ৰ (DoNER) অধীনত আলফা গোটটোৰ বাবে এই বিশেষ পেকেজ ধাৰ্য কৰা হৈছে। উল্লেখ্য যে, ২০২৩ চনৰ ২৯ ডিচেম্বৰত কেন্দ্ৰীয় গৃহমন্ত্ৰী অমিত শ্বাহৰ উপস্থিতিত অৰবিন্দ ৰাজখোৱাৰ নেতৃত্বত আলোচনাপন্থী গোটটোৱে কেন্দ্ৰ আৰু ৰাজ্য চৰকাৰৰ সৈতে এক ঐতিহাসিক ত্ৰিপাক্ষিক শান্তি চুক্তিত স্বাক্ষৰ কৰিছিল।
আলফাৰ উপৰিও অসমৰ অন্যান্য স্বায়ত্তশাসিত পৰিষদ আৰু জনগোষ্ঠীয় গোটসমূহৰ বাবেও বাজেটত বিশেষ অনুদান ঘোষণা কৰা হৈছে:
কাৰ্বি আংলং স্বায়ত্তশাসিত পৰিষদ: ২০০ কোটি টকা।
বড়োলেণ্ড আঞ্চলিক পৰিষদ (BTR): ১৫৬ কোটি টকা।
আদিবাসী আৰু ডিমাছা জনগোষ্ঠী: পৃথকে পৃথকে ৭০ কোটি টকাকৈ।
২০২৪ চনৰ আৰম্ভণিতে আলোচনাপন্থী গোটটোৱে জ্যেষ্ঠ কেডাৰসকলৰ সুবিধাৰ বাবে প্ৰায় ৩০০ কোটি টকা ব্যয়সাপেক্ষ ছটা পুনৰ সংস্থাপন প্ৰকল্পৰ প্ৰস্তাৱ কেন্দ্ৰক দাখিল কৰিছিল। শান্তি চুক্তিৰ চৰ্ত অনুসৰি এই প্ৰকল্পসমূহ অতি সোনকালে ৰূপায়ণ কৰা হ‘ব।
গোটটোৰ সাধাৰণ সম্পাদক অনুপ চেতিয়াই জানিবলৈ দিয়ে যে চৰকাৰে ভূমি আৰু অন্যান্য প্ৰতিশ্ৰুতিসমূহ পূৰণৰ দিশত ক্ষিপ্ৰতাৰে কাম কৰি আছে। ২০২৬ চনৰ বিধানসভা নিৰ্বাচনৰ পূৰ্বেই এই চুক্তিৰ সকলো চৰ্ত সম্পূৰ্ণৰূপে কাৰ্যকৰী হ’ব বুলি আশা কৰা হৈছে। ইফালে, কেন্দ্ৰীয় চৰকাৰৰ এই বাজেটক উত্তৰ-পূৰ্বাঞ্চলৰ উদ্যোগিক সংস্থা আৰু সচেতন মহলে আদৰণি জনাইছে।
