ক’ভিড-১৯ মহামাৰীয়ে ভয়ংকৰ ৰূপ ধাৰণ কৰাৰ সময়তে অসমৰ ৮খন তৈলক্ষেত্ৰ ব্যক্তিগত কোম্পানিক গতাব বিচৰা আৰু দিহিং পাটকাই অভয়াৰণ্যত কয়লাৰ মুক্ত খননত অনুমতি প্ৰদান কৰা বুলি ওলোৱা খবৰৰ প্ৰতিক্ৰিয়া প্ৰকাশ কৰিছে সংযুক্ত মুক্তি বাহিনী, অসম(স্বাধীন) চমুকৈ আলফা(স্বাঃ)ই।
আজি সংবাদ মাধ্যমলৈ প্ৰেৰণ কৰা বিজ্ঞপ্তিৰ জৰিয়তে প্ৰদান মন্ত্ৰী নৰেন্দ্ৰ মোদী নেতৃত্বাধীন কেন্দ্ৰীয় চৰকাৰক সমালোচনা কৰিছে সংগঠনটোৱে।
বিজ্ঞপ্তিটোত কয় যে জাতীয় অৰ্থনীতি শক্তিশালী কৰাৰ স্বাৰ্থত ব্যক্তিগত খণ্ডৰ বিনিয়োগৰ প্ৰয়োজনীয়তাক আলফাই ঋণাত্মক দৃষ্টিভংগী গ্ৰহণ কৰা নাই।
কিন্তু অসমৰ জাতীয় সম্পদ তৈলক্ষেত্ৰসমূহ বহিৰাগত কোম্পানিক হস্তান্তৰ কৰা কাৰ্য আমি কেতিয়াও সমৰ্থন নকৰো। বৰঞ্চ বহিৰাগত কোম্পানিৰ ক্ষেত্ৰত সংগঠনটোৱে সশস্ত্ৰ প্ৰতিৰোধ গঢ়ি তুলিব বুলিহে হুংকাৰ প্ৰদান কৰে।
সংগঠনটোৱে লগতে কয় যে থলগিৰিৰ কোনো ব্যক্তিগত খণ্ডক যদি অসমৰ তৈলক্ষেত্ৰ হস্তান্তৰ কৰিলে সমৰ্থন কৰিব বুলি কয়।
ইফাল দিহি-পাটকাই অভয়াৰণ্যত কয়লা খননৰ অনুমতি দিয়া শুনি আচৰিত হোৱাৰ লগতে এই কাৰ্যক বিৰোধিতা কৰা বুলিও সংগঠনটোৱে বিজ্ঞপ্তিটোত উল্লেখ কৰে।
এই ক্ষেত্ৰত সংগঠনটোৱে দিহিং-পাটকাইত হাত নিদিবলৈ সকলো পক্ষকে সকীয়াই দিয়ে।
কয়লাৰ অবৈধ ব্যৱসায়ত কেৱল মাফিয়াই জড়িত হৈ থকা নাই বুলি উল্লেখ কৰি এই চিণ্ডিকেটত জড়িত সকলৰ তালিকা দীঘলীয়া বুলি কয় সংগঠনটোৱে।
