এইবাৰ চ’চিয়েল মিডিয়াত শিক্ষিত যুৱক টাৰ্গেট হৈ পৰিছে আলফা(স্বাধীন)ৰ । ছ’চিয়েল মিডিয়া যোগে চিনাকী হোৱা যুৱকক অপহৰণ, কূটাঘাতৰ বাবে ব্যৱহাৰ কৰিছে আলফাই। আজি শিৱসাগৰৰ শিমলুগুৰিত শিৱসাগৰ জিলা আৰক্ষী অধীক্ষক অমিতাভ সিনহাই এই বিস্ফোৰক মন্তব্য কৰে। অ’এনজিচিৰ তিনি বিষয়াৰ অপহৰণৰ লগত জড়িত এজন যুৱকক আটক কৰাৰ পাছতেই আলফা(স্বাধীন)এই ব্লুপ্ৰিন্ট ফাদিল হয়।
অপহৰণৰ ঘটনাৰ কিছু নিলগত উদ্ধাৰ হোৱা এখন মটৰ চাইকল সন্দৰ্ভত তদন্ত কৰি ডিব্ৰুগড়ৰ পৰা বিৰাজ চেতিয়া নামৰ এজন যুৱকক আটক কৰে শিৱসাগৰ আৰক্ষীয়ে। যুৱকজনক সোধাপোচা কৰাত তেওঁ অপহৰণ কাণ্ডৰ লগত জড়িত থকাৰ কথা স্বীকাৰ কৰে। যুৱক জনৰ প্ৰকৃত ঘৰ শিৱসাগৰ সদৰ আৰক্ষী থামাৰ অন্তৰ্গত মগৰাহাটত।
আৰক্ষীৰ আগত স্বীকাৰ কৰা মতে ফেচবুকত বিপ্লৱজ্যোতি মহন নামৰ এজন ব্যক্তিৰ লগত তেওঁৰ চিনাকী হৈছিল আৰু বিপ্লৱজ্যোতি মহনে বিৰাজ চেতিয়াক আলফাৰ বাবে এখন বাইক যোগান ধৰিবলৈ কৈছিল।
সেই মতে বিৰাজ চেতিয়াৰ বেংক একাউন্টত ১৬ এপ্ৰিলত ২০,০০০ টকা ভৰাই দিয়া হয়। আৰু একে দিনাই বিৰাজ চেতিয়াই ১৮০০০ টকা উলিয়াই দীৰ্ঘদিন ধৰি এটা গেৰেজত পৰি থকা এখন বাইক ১৮০০০ টকাত ক্ৰয় কৰি মৰাণ তিনিআলিত বিপ্লৱজ্যোতি মহনৰ কথা মতে দুজন যুৱকক বাইকখন গতাই দিয়ে।
আলফা(স্বাধীন)ই সম্পূৰ্ণ পৰিকল্পনা কৰি এই অপহৰণ কাণ্ড কৰা বুলি মন্তব্য কৰে আৰক্ষী অধীক্ষক অমিতাভ সিনহাই।
ঘটনাৰ লগত ফেচবুকত সক্ৰিয় আলফা(স্বাধীন)ৰ নেতা বিপ্লৱজ্যোতি মহন জডিত থকাৰ কথা কয় আৰক্ষী অধীক্ষকে।
অ’এনজিচিৰ বিষয়াৰ অপহৰণ কাণ্ডত জড়িত বাইকখন অভিজিত গগৈৰ নামত ক্ৰয় কৰা হৈছিল আৰু এই অভিজিত গগৈয়েই বিপ্লৱজ্যোতি মহন ওৰফে আইচেং অসম।
ফেচবুকত বিপ্লৱজ্যোতি মহনে অসমৰ বহু শিক্ষিত যুৱকক আলফাৰ হৈ কাম কৰোৱাই আছে বুলি আৰক্ষীয়ে তথ্য লাভ কৰিছে।
ঘটনাৰ লগত জড়িত থকাৰ সন্দেহত বৰ্তমানলৈকে প্ৰায় ২০ জন ব্যক্তিক আটক কৰা হৈছে। ইয়াৰে ভিতৰত এম্বুলেঞ্চৰ ড্ৰাইভাৰজনে এজন ব্যক্তিক চিনাক্ত কৰা বুলি আৰক্ষী অধীক্ষক গৰাকীয়ে কয়। ইপিনে আটক কৰাৱ২০ গৰাকীৰ ভিতৰত ১১ গৰাকী আলফাৰ পৰিয়ালৰ সদস্য বুলি জানিবলৈ দিয়ে আৰক্ষী অধীক্ষক গৰাকীয়ে।
আলফা(স্বাধীন)ৰ লগত যোগসূত্ৰ থকাৰ তথ্য পোৱাৰ বাবে এই সকল ব্যক্তিক আটক কৰা হৈছে বুলি কয় অমিতাভ সিনহাই।