অসমৰ ডিমা হাছাও জিলাৰ উমৰাংচুত যোৱা শনিবাৰে এক উত্তপ্ত পৰিস্থিতিৰ সৃষ্টি হয়। সংবিধানৰ ষষ্ঠ অনুসূচীৰ অন্তৰ্গত জনজাতীয় ভূমি ব্যক্তিগত কোম্পানী তথা বিভিন্ন কৰ্পোৰেট প্ৰকল্পক আবণ্টন দিয়াৰ অভিযোগ তুলি উমৰাংচুৰ স্থানীয় ৰাইজ আৰু কেইবাটাও ৰাজনৈতিক দলে তীব্ৰ প্ৰতিবাদ সাব্যস্ত কৰে।
ভাৰতীয় জাতীয় কংগ্ৰেছ, অল পাৰ্টি হিলছ লিডাৰ্ছ কনফাৰেন্স (APHLC) আৰু ইউনাইটেড অপজিশ্বন পাৰ্টীৰ যৌথ উদ্যোগত এই প্ৰতিবাদী সমদল উলিওৱা হয়। বিৰোধী দলসমূহৰ অভিযোগ অনুসৰি, বিজেপি নেতৃত্বাধীন উত্তৰ কাছাৰ পাৰ্বত্য স্বায়ত্বশাসিত পৰিষদ আৰু ৰাজ্য চৰকাৰে জনজাতীয় লোকৰ ভূমিৰ সাংবিধানিক অধিকাৰ খৰ্ব কৰিছে। এই প্ৰতিবাদী কাৰ্যসূচীৰ ফলত উমৰাংচু চহৰৰ স্বাভাৱিক জনজীৱন ব্যাহত হৈ পৰা পৰিলক্ষিত হয়।
প্ৰতিবাদকাৰীসকলৰ মতে, জনজাতীয় লোকৰ বাবে সংৰক্ষিত ভূমি সৌৰ শক্তি প্ৰকল্প, পাম তেলৰ খেতি আৰু অন্যান্য ঔদ্যোগিক কাম-কাজৰ বাবে বৃহৎ কৰ্পোৰেট গোষ্ঠীসমূহক গতাই দিয়া হৈছে। প্ৰতিবাদত অংশগ্ৰহণ কৰা নেতাসকলে ক্ষোভ প্ৰকাশ কৰি কয় যে জনজাতীয় সম্প্ৰদায়ৰ ভূমি বৃহৎ পুঁজিপতি গোষ্ঠীক অৰ্পণ কৰাৰ ফলত স্থানীয় লোকৰ অধিকাৰ আৰু জীৱিকাৰ প্ৰতি তীব্ৰ ভাবুকি নামি আহিছে। তদুপৰি, পৰ্যটন আৰু থলুৱা ব্যৱসায়ৰ বাবে উপযোগী ভূমিবোৰ কল-কাৰখানা নিৰ্মাণৰ বাবে ব্যৱহাৰ কৰাক লৈও তেওঁলোকে তীব্ৰ আপত্তি দৰ্শায়।
প্ৰতিবাদকাৰীসকলে এই নতুন উদ্যোগসমূহৰ দ্বাৰা থলুৱা যুৱক-যুৱতীসকল কেনেদৰে উপকৃত হ’ব, তাক লৈও গভীৰ সন্দেহ প্ৰকাশ কৰে। তেওঁলোকৰ দাবী অনুসৰি, এই উদ্যোগসমূহৰ বাবে প্ৰয়োজনীয় কাৰিকৰী দক্ষতা বা ডিগ্ৰীধাৰী স্থানীয় যুৱকৰ সংখ্যা যিহেতু কম, সেয়েহে থলুৱা লোকে কেৱল নিৰাপত্তাৰক্ষীৰ দৰে নিম্ন বেতনৰ কামতহে নিয়োজিত হ’বলগীয়া হ’ব পাৰে।
ডিফুৰ পাছত এতিয়া উমৰাংচুত আৰম্ভ হোৱা এই আন্দোলনে সমগ্ৰ ডিমাহাছাও জিলাতো গা কৰি উঠিছে। প্ৰতিবাদকাৰীসকলে “ষষ্ঠ অনুসূচী ৰক্ষা কৰক” শ্ল’গানেৰে পৰিৱেশ উত্তাল কৰি তোলাৰ লগতে শাসনত থকা দলটোক জনজাতীয় সম্পদ লুণ্ঠন কৰা বুলি সমালোচনা কৰে।
কাৰ্যসূচীৰ অন্তত বিৰোধী দলসমূহৰ নেতৃত্বত এক স্মাৰক পত্ৰ দাখিল কৰা হয়। এই স্মাৰক পত্ৰত ষষ্ঠ অনুসূচীৰ ব্যৱস্থাসমূহ সুৰক্ষিত কৰিবলৈ আৰু জিলাখনত ক্ষমতাৰ অপব্যৱহাৰ বন্ধ কৰিবলৈ দাবী জনোৱা হৈছে। এই পত্ৰখন যাৱতীয় ব্যৱস্থা গ্ৰহণৰ বাবে উচ্চ কৰ্তৃপক্ষলৈ প্ৰেৰণ কৰা হ’ব বুলি সূত্ৰই প্ৰকাশ কৰিছে।
উল্লেখ্য যে ভাৰতীয় সংবিধানৰ ষষ্ঠ অনুসূচীয়ে উত্তৰ-পূৰ্বাঞ্চলৰ জনজাতীয় অঞ্চলসমূহক ভূমিৰ অধিকাৰ আৰু স্বায়ত্বশাসিত পৰিষদৰ জৰিয়তে স্ব-শাসনৰ এক বিশেষ সাংবিধানিক সুৰক্ষা কৱচ প্ৰদান কৰি আহিছে।
