কোন হ’ব ৰাষ্ট্ৰসংঘৰ পৰৱৰ্তী সচিব প্ৰধান, এই লৈ বিশ্বজুৰি চৰ্চা আৰম্ভ হৈছে। কিয়নো, ২০২৭ চনৰ ১ জানুৱাৰীত কাৰ্যভাৰ গ্ৰহণ কৰিবলগীয়া ৰাষ্ট্ৰসংঘৰ পৰৱৰ্তী সচিব প্ৰধান (Secretary-General) নিৰ্বাচনৰ প্ৰক্ৰিয়া আনুষ্ঠানিকভাৱে আৰম্ভ কৰা হ’ল।
ৰাষ্ট্ৰসংঘৰ নিৰাপত্তা পৰিষদ আৰু সাধাৰণ পৰিষদৰ সভাপতিয়ে এক যৌথ পত্ৰৰ জৰিয়তে সদস্য ৰাষ্ট্ৰসমূহক এই উচ্চ পদৰ বাবে প্ৰাৰ্থী মনোনীত কৰিবলৈ আমন্ত্ৰণ জনাইছে। ইয়াৰ জৰিয়তে ২০২৬ চনত কাৰ্যকাল শেষ হ’বলগীয়া বৰ্তমানৰ সচিব প্ৰধান এণ্টনিঅ’ গুটেৰেছৰ উত্তৰাধিকাৰী বাছনিৰ প্ৰক্ৰিয়াৰ আৰম্ভণি কৰা হৈছে।
মহিলা প্ৰাৰ্থীৰ বাবে আহ্বান
পত্ৰখনত উল্লেখ কৰা হৈছে যে আজিলৈকে কোনো মহিলাই ৰাষ্ট্ৰসংঘৰ সচিব প্ৰধানৰ নেতৃত্ব বহন কৰা নাই। সেয়েহে, এই ভূমিকাৰ বাবে মহিলাসকলক মনোনয়ন দিয়াৰ কথাটো বিবেচনা কৰিবলৈ দেশসমূহক আহ্বান জনোৱা হৈছে। সংস্থাটোৰ পৰৱৰ্তী নেতা বাছনি কৰাত লিংগ সমতা আৰু আঞ্চলিক বৈচিত্ৰ্য উভয় দিশৰ ওপৰত গুৰুত্ব আৰোপ কৰা হৈছে।
নিৰ্বাচন প্ৰক্ৰিয়া আৰু ভেটো ক্ষমতা
১৫ জনীয়া নিৰাপত্তা পৰিষদে চূড়ান্ত অনুমোদনৰ বাবে ১৯৩ জনীয়া সাধাৰণ পৰিষদলৈ এজন বা ততোধিক প্ৰাৰ্থীৰ নাম পৰামৰ্শ হিচাপে পঠিয়াব। কিন্তু এই চূড়ান্ত সিদ্ধান্তটো নিৰ্ভৰ কৰে নিৰাপত্তা পৰিষদৰ পাঁচখন স্থায়ী সদস্য ৰাষ্ট্ৰ— আমেৰিকা, ৰাছিয়া, চীন, যুক্তৰাজ্য (ব্ৰিটেইন) আৰু ফ্ৰান্সৰ সন্মতিৰ ওপৰত। এই পাঁচখন দেশে ভেটো ক্ষমতা লাভ কৰাৰ বাবে তেওঁলোকৰ চুক্তি অবিহনে কোনো প্ৰাৰ্থী নিৰ্বাচিত হ’ব নোৱাৰে।
সম্ভাব্য প্ৰাৰ্থীসকল
এতিয়ালৈকে কোনো প্ৰাৰ্থী আনুষ্ঠানিকভাৱে ঘোষণা কৰা হোৱা নাই যদিও সম্ভাব্য প্ৰাৰ্থীসকলৰ ভিতৰত মিচেল বাচেলেট (চিলিৰ প্ৰাক্তন ৰাষ্ট্ৰপতি আৰু জাতিসংঘৰ প্ৰাক্তন মানৱ অধিকাৰ হাইকমিছনাৰ), ৰেবেকা গ্ৰীনস্পেন (কোষ্টা ৰিকাৰ প্ৰাক্তন উপ-ৰাষ্ট্ৰপতি), ৰাফেল গ্ৰ’ছি (আৰ্জেণ্টিনাৰ কূটনীতিবিদ) ৰ নাম চৰ্চিত হৈছে।
