আমেৰিকাৰ এখন চিকিৎসালয়ত কৰ্মৰত ১৪গৰাকী নাৰ্ছ একে সময়তে গৰ্ভৱতী হৈছে। কেৱল সেয়াই নহয়, তেওঁলোকৰ সন্তান জন্ম দিয়াৰ সময়ো ওচৰ চাপিছে। উইচকনচিনৰ গ্ৰীণ বে’ৰ ছেইণ্ট ভিনচেণ্ট হাস্পতালত সংঘটিত হোৱা এই আচৰিত ঘটনাই ইতিমধ্যে সমগ্ৰ বিশ্বতে চাঞ্চল্যৰ সৃষ্টি কৰিছে।
চিকিৎসালয় কৰ্তৃপক্ষই জাননী জাৰি কৰি ঘটনাৰ কথা ঘোষণা কৰে।
আন্তঃৰাষ্ট্ৰীয় সংবাদ মাধ্যমত প্ৰকাশিত এক প্ৰতিবেদন অনুসৰি শিশুৰ উন্নত চিকিৎসাৰ বাবে সুপৰিচিত ছেইণ্ট ভিনচেণ্ট হাস্পতালত প্ৰায় প্ৰতিদিনে এগৰাকী মহিলাই সন্তান প্ৰসৱ কৰিবলৈ আহে। আৰু সেই নৱজাতকবোৰৰ যত্ন লয় চিকিৎসালয়খনৰ নিষ্ঠাবান নাৰ্ছসকলে। কিন্তু এইবাৰ ছবিখন বেলেগ। সেই নাৰ্চিং টিমৰ চৈধ্যগৰাকী সদস্যই একে সময়তে মাতৃত্বৰ অভিজ্ঞতা লাভ কৰিবলৈ ওলাইছে।
চিকিৎসালয়ৰ এজন বিষয়াই এই কাণ্ডক “অবিশ্বাস্য” বুলি অভিহিত কৰিছে। এই ঘটনা চিকিৎসালয় কৰ্তৃপক্ষ আৰু নাৰ্ছসকলৰ বাবে আনন্দৰ বিষয় যদিও বিশ্বৰ বহু লোকৰ বাবেও ই এক আচৰিত হৈ পৰিছে। একেটা কৰ্মক্ষেত্ৰতে ইমানবোৰ নাৰ্ছৰ গৰ্ভধাৰণৰ ঘটনা সঁচা অৰ্থত বিৰল আৰু আলোচনাৰ কেন্দ্ৰবিন্দু হৈ পৰিছে।
