অসমৰ কণ্ঠশিল্পী নাহিদ আফ্ৰিনক ইউনিচেফে আনুষ্ঠানিকভাৱে বৃহস্পতিবাৰে প্ৰথমবাৰৰ বাবে ইয়াৰ ‘যুৱ অধিবক্তা’ হিচাপে নিযুক্তি দিছে।
ভাৰতৰ ২৫৩ নিযুত যুৱ শক্তিক শিশু তথা যুৱ সমাজৰ সমস্যাৰ প্ৰতি সহমৰ্মী তথা অনুপ্ৰাণিত কৰি তোলাৰ লক্ষ্যৰে এই পদক্ষেপ গ্ৰহণ কৰা হৈছে।
ইউনিচেফৰ সৈতে নাহিদৰ সহযোগ উত্তৰ-পূৰ্বাঞ্চলৰ শিশুৰ অধিকাৰ সম্পৰ্কত সচেতনতা গঢ়াৰ উদ্দেশ্যে এক অংশ বিশেষ।
বিশ্বনাথ চাৰিআলিৰ নাহিদে ২০১৬ চনত সোণাক্ষী সিনহা অভিনীত বলীউদৰ আকিৰা ছবিত কণ্ঠদানেৰে পাৰ্শ্ব গায়িকা হিচাপে ভূমুকি মাৰিছিল।
২০১৭ চনত ‘ধুনীয়া জোন’ গানটোৰ বাবে তেওঁ শ্ৰেষ্ঠ মহিলা কণ্ঠশিল্পীৰ বঁটা লাভ কৰিছিল। তেওঁ লগতে ২০১৮ বৰ্ষত অসম ৰাজ্যিক চলচ্চিত্ৰ বঁটাও লাভ কৰিছিল।
এগৰাকী যুৱ অধিবক্তা হিচাপে নাহিদে শিশুৰ অধিকাৰ তথা সন্মান নিশ্চিত কৰি পৃথিৱীখনক এখন উন্নত স্থান হিচাপে গঢ়ি তোলাৰ দিশত শিশু আৰু যুৱসকলক অনুপ্ৰাণিত কৰাৰ ক্ষেত্ৰত আদৰ্শ ব্যক্তি (role model) হিচাপে কাম কৰিব।
যুৱ অধিবক্তাই গুণগত শিক্ষা আহৰণ, বুনিয়াদী স্বাস্থ্যসেৱা, শিশুৰ বিৰুদ্ধে হিংসাৰ অৱসান আদিকে ধৰি ইতিবাচক পৰিৱৰ্তনৰ ব্যৱস্থাসমূহত সহযোগ কৰিব।
‘’ মই ইউনিচেফৰ যুৱ অধিবক্তা হিচাপে নিযুক্তি লাভ কৰি সন্মানিত বোধ কৰিছো। মই আশাবাদী যে মই অধিক শিশুক তেওঁলোকৰ সপোন পূৰণ কৰাৰ দিশত অনুপ্ৰাণিত তথা উৎসাহিত কৰি তুলিবলৈ সক্ষম হ’ম। গান গোৱাটো মোৰ চখ আৰু ভৱিষ্যতে মই এগৰাকী সফল কণ্ঠশিল্পী হ’ব বিচাৰো। মই মোৰ সংগীতৰ অনুৰাগীসকলে দেখুওৱা সহযোগিতাৰ প্ৰতি কৃতজ্ঞ। তেওঁলোকে দিয়া মৰমৰ বাবে মই আজিৰ অৱস্থাত উপনীত হৈছো। মোৰ অনুৰাগীসকলক শিশুৰ অধিকাৰৰ বাবে যুঁজ দিয়াৰ ক্ষেত্ৰত সহযোগিতা আগবঢ়াবলৈ বিনম্ৰভাৱে আহ্বান জনাইছো,‘’ নাহিদে এক বিবৃতিত এইদৰে কয়।
সংবাদ মাধ্যমৰ আগত ইউনিচেফৰ ভাৰতৰ প্ৰতিনিধি ড০ য়াছমিন আলী হকে কয় যে নাহিদৰ নিযুত নিযুত যুৱ সম্প্ৰদায়ক তেওঁলোকৰ সপোন তথা হেঁপাহ সম্পৰ্কে উদ্বুদ্ধ কৰাৰ প্ৰতিভা আছে।
