কেন্দ্ৰীয় বিত্ত মন্ত্ৰী নিৰ্মলা সীতাৰমণে মঙলবাৰে আগন্তুক পাঁচ বছৰত আন্তঃগাঠনি নিৰ্মানৰ বাবে ১০২ লাখ কোটি টকাৰ প্ৰকল্প মুকলি কৰে।
ৰাষ্ট্ৰীয় আন্তঃগাঠনি পাইপলাইন (এন আই পি) ২০১৯-২০২৫ শীৰ্ষক প্ৰকল্পটো দেশৰ আৰ্থনৈতিক বিকাশত যাতে আন্তঃগাঠনিৰ উন্নয়ন বাধা হ’ব নোৱাৰে সেই উদ্দেশ্যৰে মুকলি কৰা হৈছে।
২০১৯-২০১৫ বৰ্ষৰ বাবে মুকলি কৰা এন আই পিৰ ৰোড মেপ প্ৰস্তত কৰাৰ বাবে বিত্তীয় মন্ত্ৰ্যালয়ৰ সচিৱৰ নেতৃত্বত গঠিত এখন সমিতিক দায়িত্ব অৰ্পন কৰা হৈছে।
বিত্তীয় মন্ত্ৰ্যালয়ৰ তৰফৰ পৰা জাৰি কৰা এক জাননী অনুসৰি এন আই পিয়ে আন্তঃগাঠনিৰ উন্নয়নৰ বাবে আঁচনি প্ৰস্তুত কৰাৰ ফলত নিয়োগৰ সুবিধা বৃদ্ধি পোৱাৰ লগতে সকলোলৈ সমান হাৰৰ উন্নত আন্তঃগাঠনি প্ৰদান কৰিব বুলি জানিব পৰা গৈছে।
এন আই পিৰ অধীনত পানীযোগান আৰু গাঁৱসমূহৰ আন্তঃগাঠনি উন্নয়নৰ বাবে ৭.৭ লাখ কোটি টকা নিৰ্ধাৰণ কৰা হৈছে।
আনহাতে, শক্তি, পথ আৰু ৰেলৱেৰ আন্তঃগাঠনি উন্নয়নৰ বাবে ক্ৰমে ২৪.৫ লাখ কোটি, ১৯.৬৩ কোটি আৰু ১৩.৬৮ কোটি টকা নিৰ্ধাৰণ কৰা হৈছে।
নৌ বন্দৰ আৰু বিমান বন্দৰৰ বাবে এক লাখ কোটি আৰু ১.৪৩ লাখ কোটি টকাৰ লগতে নগৰীয়া আন্তঃগাঠনি আৰু টেলিকম খণ্ডৰ আন্তঃগাঠনিৰ বাবে ক্ৰমে ১৬.২৯ লাখ কোটি আৰু ৩.২ লাখ কোটি নিৰ্ধাৰণ কৰা হৈছে।
মঙলবাৰে সংবাদমেল সম্বোধন কৰি নিৰ্মলা সীতাৰমণে প্ৰধান মন্ত্ৰীয়ে স্বাধীনতা দিৱসত দেশত ১০০ লাখ কোটি টকাৰ আন্তঃগাঠনি উন্নয়নৰ কাম কৰা হ’ব বুলি কোৱাৰ প্ৰসংগ উল্লেখ কৰি বিজেপিয়ে নিজৰ প্ৰতিশ্ৰুতি ৰাখিলে বুলি কয়।
