আই পি আৰ (ইন্টেলেক্টছুৱেল প্ৰপাৰ্টি ৰাইটছ)কলৈ ভাৰতৰ ভূমিকাত আমেৰিকাই পুনৰবাৰ অসন্তুষ্টি প্ৰকাশ কৰিছে। আমেৰিকাৰ বাণিজ্য প্ৰতিনিধিৰ কাৰ্যালয়ে ভাৰতক ২০২৬ চনৰ ‘প্ৰাইঅ’ৰিটি ৱাচ লিষ্ট’ত অন্তৰ্ভুক্ত কৰিছে।
বৃহস্পতিবাৰে প্ৰকাশ পোৱা প্ৰতিবেদনত স্পষ্টকৈ উল্লেখ কৰা হৈছে যে ভাৰতত পেটেণ্ট আৰু কপিৰাইট সুৰক্ষাৰ ক্ষেত্ৰত দীৰ্ঘদিনীয়া সমস্যাসমূহ এতিয়াও সমাধান হোৱা নাই।
প্ৰতিবেদনত কোৱা হৈছে যে, “আই পি আৰ আৰু আইন প্ৰয়োগৰ ক্ষেত্ৰত ভাৰত এতিয়াও বিশ্বৰ অন্যতম প্ৰত্যাহ্বানমূলক দেশ।”
প্ৰতি বছৰে আমেৰিকাৰ বাণিজ্যিক অংশীদাৰ দেশসমূহে পেটেণ্ট, কপিৰাইট আৰু ট্ৰেডমাৰ্কৰ দৰে অধিকাৰসমূহ কিমান গুৰুত্বসহকাৰে সুৰক্ষিত কৰে তাৰ ওপৰত ভিত্তি কৰি এই প্ৰতিবেদন প্ৰকাশ কৰা হয়।
এইবাৰ ভাৰত, চীন, ৰাছিয়া, ইণ্ডোনেছিয়া, চিলি আৰু ভেনিজুৱেলাৰ সৈতে – ছখন দেশক বিশেষ নিৰীক্ষণৰ তালিকাত স্থান দিয়া হৈছে। আমেৰিকাই দাবী কৰে যে যদিও ভাৰতে এই ক্ষেত্ৰত কিছু অগ্ৰগতি লাভ কৰিছে, তথাপিও মূল সমস্যাবোৰ এতিয়াও আছে।
ভাৰতত জাল সামগ্ৰী আৰু পাইৰেচি ৰোধৰ ক্ষেত্ৰত প্ৰশাসনিক কাৰ্যকলাপ যথেষ্ট দুৰ্বল বুলিও প্ৰতিবেদনত উল্লেখ কৰা হৈছে। বিভিন্ন চৰকাৰী সংস্থাৰ মাজত সমন্বয়ৰ অভাৱ। আনকি আমেৰিকাই আই পি সম্পৰ্কীয় সামগ্ৰীৰ ওপৰত উচ্চ আমদানি শুল্কক লৈ ক্ষোভ প্ৰকাশ কৰিছে। বাণিজ্যিক গোপনীয়তাৰ সুৰক্ষাৰ অভাৱ আৰু ট্ৰেডমাৰ্কৰ গোচৰ নিষ্পত্তি কৰিবলৈ লোৱা দীৰ্ঘ সময়ৰ কথাও তেওঁলোকে আঙুলিয়াই দিছে।
প্ৰতিবেদনত কোৱা হৈছে যে, “আমেৰিকাই এই বিষয়ত ভাৰতৰ সৈতে আলোচনা অব্যাহত ৰাখিবলৈ আগ্ৰহী। দুয়োখন দেশৰ মাজত দ্বিপাক্ষিক বাণিজ্যিক পৰ্যায়ত এই সমস্যা সমাধানৰ বাবে প্ৰচেষ্টা চলোৱা হ’ব।”
আনহাতে, এদশকৰো অধিক সময়ৰ পাছত আমেৰিকাই ভিয়েটনামক ‘প্ৰাইঅ’ৰিটি ফৰেইন কান্ট্ৰী’ (পিএফচি) হিচাপে চিনাক্ত কৰিছে। আমেৰিকাৰ বাণিজ্য আইন অনুসৰি এইটোৱেই আটাইতকৈ কঠোৰ মৰ্যাদা। ফলত অহা ৩০ দিনৰ ভিতৰত ভিয়েটনামৰ বিৰুদ্ধে তদন্ত আৰম্ভ হ’ব পাৰে, যাৰ ফলত দেশখনৰ ওপৰত বাণিজ্যিক নিষেধাজ্ঞা আৰোপ কৰা হ’ব পাৰে। ইফালে দীঘলীয়া আলোচনা সত্ত্বেও ভিয়েটনামে এই সন্দৰ্ভত কোনো সদিচ্ছা প্ৰকাশ কৰা নাই বুলি অভিযোগ উত্থাপন হৈছে।
এই তালিকাত কেইবাটাও পৰিৱৰ্তনও দেখা গৈছে। পৰিস্থিতি কিছু উন্নত হোৱাৰ বাবে আৰ্জেণ্টিনা আৰু মেক্সিকোক সাধাৰণ ‘ৱাচ লিষ্ট’ত স্থান দিয়া হৈছে। যদিও বুলগেৰিয়াক এই তালিকাৰ পৰা বাদ দিয়া হৈছে যদিও ইউৰোপীয় ইউনিয়নক নতুনকৈ অন্তৰ্ভুক্ত কৰা হৈছে। পাকিস্তান, তুৰস্ক, ব্ৰাজিলকে ধৰি মুঠ ১৯খন দেশ বৰ্তমান নিৰীক্ষণৰ তালিকাত আছে। প্ৰয়োজন হ’লে কঠোৰ ব্যৱস্থা গ্ৰহণ কৰিব বুলি আমেৰিকা প্ৰশাসনে কঠোৰ বাৰ্তা দিছে।
